Ulaon ni Apostel 16:1-40
16 Dung i sahat ma si Paulus di Derbe jala lao ma ibana muse tu Listra.+ Disi adong ma sahalak sisean na margoar si Timoteus.+ Boru Jahudi do omakna jala nungnga gabe sisean, alai halak Junani do bapakna.
2 Dipuji akka dongan na di Listra dohot na di Ikonium do si Timoteus.
3 Dipangido si Paulus ma asa dohot si Timoteus mandongani ibana. Diboan si Paulus ma ibana jala disunat. Ai sude do halak Jahudi na di inganan i+ mamboto na halak Junani bapakna.
4 Huhut didalani nasida akka kota i, dipaboa nasida ma tu akka dongan na disi aturan naung ditottuhon akka apostel dohot akka sintua na di Jerusalem.+ Jala dijujui ma nasida mangulahon i.
5 Gabe lam togu ma haporseaon ni akka huria i jala lam tamba ma godang ni nasida ganup ari.
6 Asing ni i, didalani nasida ma Prigia dohot akka luat na di Galatia.+ Ai marhite tondi parbadia, diorai do nasida paboahon hata ni Debata di Provinsi Asia.
7 Dung sahat nasida di Misia, naeng lao ma nasida tu Bitinia.+ Alai marhite tondi parbadia, diorai Jesus ma muse nasida lao tusi.
8 Gabe dilewati nasida ma Misia jala lao ma nasida tu Troas.
9 Di borngin i, mandapot parnidaan ma si Paulus. Diida ibana ma sahalak bawa sian Makedonia jongjong huhut mangelek-elek tu ibana. Didok ma, “Ro ma ho tu Makedonia, jala urupi ma hami.”
10 Dung mandapot parnidaan si Paulus, pittor hatop ma dibahen hami rencana naeng lao tu Makedonia. Ai dihilala hami, Debata do na manjou hami asa marbarita tu nasida.
11 Dung i markapal ma hami sian Troas tu Samotrake jala marsogotna i tu Neapolis.
12 Jala sian i borhat ma hami tu Pilippi.+ Kota na dijajah Rom do Pilippi i, jala kota na massai penting di Makedonia. Disi ma hami saleleng piga-piga ari.
13 Tikki ari Sabat, lao ma hami tu topi ni sunge na di luar gerbang ni kota. Ai dibege hami, adong do disi inganan martangiang. Hundul ma hami disi jala makkata-hatai dohot akka borua na marpungu disi.
14 Adong ma sahalak borua partiga-tiga kain ungu, goarna si Lidia. Sian Tiatira+ do ibana jala sisomba Debata. Ditangihon ibana do hami, jala dibukka Jahowa* do rohana asa dijalo hata ni si Paulus.
15 Dung tardidi ibana dohot sude donganna sajabu,+ didok ibana ma tu hami, “Molo pos do rohamuna naung porsea au tu Jahowa,* ro ma hamu jala marborngin ma hamu di jabukku.” Sai dielek-elek ibana do hami asa huoloi hami pangidoanna i.
16 Di sada tikki, lao ma hami tu inganan ni halak lao martangiang i. Pajuppang ma hami dohot sahalak hatoban borua na disonggopi suru-suruan na jahat.+ Peramal do ibana jala godang do uttung na diparo ibana tu akka tuanna sian ulaonna i.
17 Torus do diihutton ibana hami dohot si Paulus. Gogo do didok, “Ai akka naposo ni Debata Natumimbul i+ do halak on, na paboahon dalan haluaon i do nasida tu hamu.”
18 Sai dibahen ibana do songon i saleleng piga-piga ari. Ujungna sogo ma roha ni si Paulus mambege i, diida ma doppak borua i jala didok ma tu suru-suruan na jahat i, “Marhite goar ni Jesus Kristus, hudok ma tu ho, kaluar ma ho sian ibana.” Laos satokkin i, kaluar ma suru-suruan na jahat i.+
19 Alai dung diida akka tuanna i dang na lao adong be dapot ni nasida uttung sian borua i,+ ditakkup nasida ma si Paulus dohot si Silas. Disarat ma nasida tu pasar tu jolo ni akka pamaretta.+
20 Diboan nasida ma si Paulus dohot si Silas tu jolo ni akka pejabat pengadilan jala ninna ma, “Guttur do dibahen nasida akka halak na di kota on.+ Halak Jahudi do nasida,
21 diajarhon nasida do akka hasomalan na maralo tu aturanta. Dang boi tajalo manang taihutton hasomalan ni nasida i, ai halak Rom do hita.”
22 Jala dohot do akka jolma i mangalo nasida. Dung diribakkon akka pejabat pengadilan i pakkean ni si Paulus dohot si Silas, disuru ma nasida dipukkuli mamakke hau.+
23 Dung sae dipukkuli, dipamasuk ma nasida tu penjara. Disuru ma akka panjaga manat manjaga nasida.+
24 Alani paretta i, dipamasuk ma nasida tu penjara na massai ketat dijaga jala dipasung* ma pat ni nasida.
25 Hira-hira di tonga borngin, martangiang ma si Paulus dohot si Silas jala marende ma nasida mamuji Debata.+ Dibege akka na di penjara i do nasida marende.
26 Toppu ma ro gempa na gogo jala humutur ma penjara i. Laos di tikki i, bukka ma sude pintu jala malua ma ratte ni sude halak na di penjara i.+
27 Tikki tarsunggul panjaga ni penjara i, diida ibana ma nungnga bukka sude pintu ni penjara i. Disittak ma podangna, naeng bunu diri ma ibana, ai dirippu do naung lari sude halak na di penjara i.+
28 Alai gogo ma didok si Paulus, “Unang ulahon i! Ai dison do hami sude!”
29 Dipangido panjaga penjara i ma asa diboan lampu, dung i marlojong ma ibana tu bagasan. Hitir-hitir ma ibana huhut marsinggang tu jolo ni si Paulus dohot si Silas.
30 Ditogihon ibana ma nasida tu luar jala ninna ma, “Aha do sibahenokku asa diselamatton Debata au?”
31 Didok nasida ma, “Porsea ma ho tu Tuan Jesus, asa selamat ho dohot sude donganmu sajabu.”+
32 Dung i dibaritahon nasida ma hata ni Jahowa* tu ibana dohot tu sude donganna sajabu.
33 Diboan ibana ma nasida borngin i, jala dipaias ma akka lukka ni nasida. Laos di tikki i, tardidi ma ibana dohot sude donganna sajabu.+
34 Dung i ditogihon ibana ma nasida tu jabuna jala diparade ibana ma sipanganon tu nasida. Las situtu ma roha ni panjaga penjara i dohot sude donganna sajabu, ala nungnga gabe porsea nasida tu Debata.
35 Marsogotna i, disuru akka pejabat pengadilan i ma akka petugas i mandapotton panjaga penjara i lao mandok, “Palua ma nasida.”
36 Dipaboa panjaga penjara i ma hata ni nasida i tu si Paulus, ninna ma, “Nungnga disuru akka pejabat pengadilan i halak paboahon asa dipalua hamu. Alani i, kaluar ma hamu, mulak ma hamu di bagasan dame.”
37 Alai didok si Paulus ma, “Nungnga dipukkuli nasida hami di jolo ni godang halak, hape dang jolo diadili hami. Nungnga dipamasuk hami tu penjara, hape halak Rom do hami.+ Saonari naeng sipsip ma hami dipalua? Dang boi songon i! Ikkon nasida do ro paluahon hami.”
38 Dipaboa akka petugas i ma hatana i tu akka pejabat pengadilan i. Dung diboto nasida halak Rom+ do si Paulus dohot si Silas, gabe mabiar ma nasida.
39 Dung i ro ma akka pejabat i, minta maaf ma nasida tu si Paulus dohot tu si Silas. Dung dipalua petugas i nasida sian penjara, dipangido ma asa lao nasida sian kota i.
40 Alai dung kaluar nasida sian penjara, lao ma nasida tu jabu ni si Lidia. Dung pajuppang nasida dohot akka dongan na disi, dipatogu si Paulus dohot si Silas ma nasida.+ Dung i borhat ma si Paulus dohot si Silas.
