Ulaon ni Apostel 3:1-26
3 Lao ma si Petrus dohot si Johannes tu bagas joro hira-hira jam 3 botari,* i ma tikkina lao martangiang.
2 Jala di tikki i, adong ma na mamboan sahalak bawa na lumpu sian mulai tubu tusi. Ganup ari diboan do ibana tu Gerbang na Uli na jonok tu pintu ni bagas joro. Mangido-ido ma ibana disi tu akka halak na masuk tu bagas joro.
3 Tikki diida bawa i naeng masuk si Petrus dohot si Johannes tu bagas joro, didok ibana ma, “Asi ma roham tu au.”
4 Alai dipanotnoti si Petrus dohot si Johannes ma ibana, ninna ma, “Bereng ma doppak hami.”
5 Dipanotnoti ibana ma si Petrus dohot si Johannes, ai dirippu ibana do adong naeng lehonon ni nasida tu ibana.
6 Alai ninna si Petrus ma, “Dang adong mas dohot perakku. Alai lehonokku ma tu ho na adong di au. Di bagasan goar ni Jesus Kristus halak Nasaret i, mardalan ma ho!”+
7 Dung i, ditiop si Petrus ma tangan sabola kanan ni bawa na lumpu i. Diurupi ma ibana jongjong.+ Laos satokkin i malum ma patna i.+
8 Dung i, marinjaki ma ibana.+ Mardalan ma ibana masuk tu bagas joro rap dohot nasida. Tikki na mardalan i ibana, marinjaki do ibana huhut mamuji Debata.
9 Jala diida godang halak do ibana mardalan huhut mamuji Debata.
10 Gabe diboto nasida ma, ibana do bawa na somal hundul mangido-ido di Gerbang na Uli na di bagas joro i.+ Heran situtu ma nasida mangida na masa tu ibana.
11 Tikki sai ditiop bawa i dope tangan ni si Petrus dohot si Johannes di Terras ni si Salomo,+ ro ma godang halak mandapotton nasida tusi. Ai heran do nasida mangida na masa i.
12 Dung diida si Petrus akka jolma i, ninna ma, “Hamu akka halak Israel, boasa pola heran hamu mangida na masa on? Na dirippu hamu do gogonami sandiri na hupakke hami mangulahon i? Na dirippu hamu do ala hulehon hami ngolunami tu Debata umbahen na boi hubahen hami ibana mardalan?
13 Nungnga dipasangap Debata ni si Abraham, si Isak, si Jakkob,+ dohot Debata ni akka omputta i Jesus+ Naposona i.+ Ibana do bawa na dileai hamu di jolo ni si Latus, jala na dipasahat hamu+ tu na asing lao dipamate. Hape nungnga didok si Latus asa dipalua ibana.
14 Dileai hamu do halak na badia jala na mangulahon na sittong i. Dipangido hamu do tu si Latus asa dipalua di hamu sahalak pambunu.+
15 Dibunu hamu do Pamimpin na dipillit lao mangalehon hangoluan.+ Alai dipahehe Debata do ibana sian na mate, jala hami ma saksi na mangida i.+
16 Alani goar ni Jesus jala ala porsea hami tu goarna, gabe margogo ma bawa na niidamuna dohot na tinandamuna on. Haporseaonnami tu Jesus do na mambahen malum bawa on di jolomuna sude.
17 Ale akka dongan, huboto do boasa diulahon hamu songon i najolo.+ Na songon akka pamimpinmuna do hamu, dang diattusi hamu aha na diulahon hamu.+
18 Alai marhite songon i do asa boi saut dibahen Debata hata na pinaboana i tu akka panurirang.* Nungnga dipaboa hian na ikkon marsitaonon Kristus i.+
19 “Alani i, muba+ ma hamu jala mulak+ ma hamu tu Debata asa disesa dosamuna.+ Molo diulahon hamu songon i, bahenon ni Jahowa* ma hamu margogo.
20 Jala suruonna ma Kristus naung pinillitna i tu hamu.
21 Ikkon toktong do ibana di surgo sahat tu na juppang tikkina lao padenggatton saluhutna, songon naung didok Debata tu akka panurirangna na badia i di tikki naung salpu.
22 Ai didok si Musa do, ‘Na lao pilliton ni Jahowa* Debatamuna i do di hamu sahalak panurirang na songon au sian tonga-tongamuna.+ Ikkon ditangihon hamu do sude na dipaboa ibana tu hamu.+
23 Alai manang ise na so manangihon Panurirang i, ikkon dipamate do sian tonga-tongamuna.’+
24 Sasittongna, nungnga takkas dipaboa sude panurirang taringot tu akka ari on. Mulai sian Panurirang Samuel sahat tu akka panurirang na ro dukkon ibana.+
25 Akka anak ni panurirang i do hamu jala dohot do hamu mandapot laba sian parjanjian na dibahen Debata tu ompumuna i.+ Ai didok Debata do tu si Abraham, ‘Mandapot pasu-pasu ma sude keluarga di tano on alani pinopparmu.’*+
26 Dung dipahehe Debata Naposona* i, disuru do ibana parjolo+ mamasu-masu hamu. Diurupi ibana do hamu asa muba sian hajahaton na diulahon hamu.”
Surat na di toru
^ As. “jam pasiahon”.
^ Ida Lampiran A5.
^ Ida Lampiran A5.
^ As. “bonimu”.
^ Na nidokna i ma Jesus.
