“TIKKI diumumhon na dipecat anaknami, hira na masursur do portibi on huhilala”, ninna si Julian. “Anak siakkangannami do ibana, jala kompak do hami. Sering do hami rap mangulahon manang aha pe. Burju do ibana, alai toppu do diulahon ibana na so denggan. Torus ma istrikku tangis, jala dang huboto boha carana mangapuli ibana. Hira na gagal ma huhilala hami mangajari gellengnami.”

Molo dipecat sasahalak sian huria, pasti lungun do roha ni keluargana dohot akka dongan di huria. Attong, na patuduhon holong do molo dipecat sasahalak sian huria? Ayat ni Bibel na dia ma na diihutton umbahen na adong halak na dipecat sian huria? Jala boasa sappe dipecat sasahalak?

Adong dua alasan na mambahen sahalak Saksi Jahowa sappe dipecat. Na parjolo, mangulahon dosa na balga do ibana hape nga tardidi. Jala na paduahon, dang olo ibana muba.

Memang, dang dipaksa Jahowa hita asa sempurna. Alai hirim do rohana asa sude naposona mangihutton aturanna lao manjaga pangalaho ni nasida toktong ias. Contohna, disuru Jahowa do hita asa dang mangulahon dosa na balga songon mangulahon seks na so patut, manomba patung, manakko, hahisapon, mambunu, jala mangulahon spiritisme.—1 Kor. 6:9, 10; Pgk. 21:8.

Pasti setuju do hamu, masuk akkal do aturan ni Jahowa i jala boi manjaga hita. Alana pasti lomo do rohatta rap dohot akka halak na marroha na dame jala na boi dihaporseai. Boi do tahilala sisongon i, tikki rap hita dohot akka donganta. Tikki talehon ngolutta tu Jahowa, nungnga marjanji hita lao mangihutton aturanna di ngolutta.

Boha molo diulahon sasahalak dosa na balga alani hagaleonna? Hea do naposo ni Jahowa najolo mangulahon i. Alai dang pittor dibolokkon Jahowa nasida. Contohna Raja Daud. Mangalakkup do ibana dohot istri ni halak, jala dibunu ibana do suamina. Alai dipaboa Nabi Natan do tu ibana, “Sesaon ni Jahowa do dosami.”—2 Sam. 12:13.

Ala diakkui si Daud dosana jala olo ibana muba, diampuni Jahowa do ibana. (Ps. 32:1-5) Dos songon i ma saonari. Molo dang olo sasahalak muba sian pangalahona na so denggan, jala torus diulahon ibana i, pasti dipecat do ibana. (Ul. 3:19; 26:20) Tikki dibahen akka sintua panitia pengadilan lao mangadili sasahalak, jala dang adong diida nasida bukti na patuduhon naung muba halak i, ikkon dipecat nasida do ibana.

Olo do ra tahilala, pakejamhu do molo dipecat sasahalak. Jala hira na so patuduhon holong. Apalagi ma molo kompak hita tu ibana. Alai dipaboa do di Bibel alasan na masuk akkal na patuduhon bukti ni holong do molo dipecat sasahalak.

Didok Jesus do, “Tarida do bisuk sian parniulaonna.” (Mat. 11:19) Adong do manfaatna molo dipecatna sasahalak na so olo muba. Taparrohahon ma tolu manfaatna.

Gabe dipasangap ma goar ni Jahowa. Ala naposo ni Jahowa hita, boi do pangalahotta mempengaruhi goarna. (Jes. 43:10) Molo taihutton aturan ni Jahowa na adong di Bibel, boi do gabe dipasangap goarna. Contohna, boi do pangalaho ni sahalak dakdanak mambahen gabe dipuji manang gabe marlea natua-tuana. Dos songon i ma, boi do pangalahotta na denggan manang na so denggan, mambahen gabe dipuji manang gabe marlea goar ni Jahowa. Di jaman ni Nabi Hesekiel najolo, dihubungkon akka bangso do goar ni Jahowa tu pangalaho ni halak Jahudi.—Hes. 36:19-23.

Molo taulahon seks na so patut, gabe marlea ma goar ni Jahowa. Alani i ma didok Apostel Petrus tu hita, “Songon dakdanak pangoloi ma hamu, unang be olo hamu dirajai sakkap ni rohamuna najolo tikki dang ditanda hamu dope Debata. Alai songon Debata Nabadia na manjou hamu, badia ma hamu di sude parniulaonmuna. Songon na nidok ni na tarsurat i, ‘Ikkon badia do hamu, ai badia do Au.’” (1 Ptr. 1:14-16) Alai molo denggan pangalahotta, gabe dipasangap ma goar ni Jahowa.

Molo adong Saksi Jahowa na mangulahon dosa na balga, pasti tarboto do i annon tu akka donganna dohot tu akka halak na mananda ibana. Jadi molo dipecat ibana sian huria, boi ma naposo ni Debata na adong di huria i tetap badia ala mangihutton petunjuk ni Debata na adong di Bibel. Adong sahalak bawa na ro tu Bale Harajaon na di Swiss. Didok ibana lomo rohana naeng gabe Saksi Jahowa. Dipecat do kakakna ala mangulahon seks na so patut. Jadi didok ibana ma lomo rohana naeng bergabung tu organisasi “na so manabunihon pangalaho ni anggotana na so denggan”.

Gabe tetap ma ias akka dongan di huria. Dipaboa Apostel Paulus do tu huria na di Korint, bahaya do molo sai dipasombu halak na sengaja mangulahon dosa tetap bergabung di huria. Dipatudos ibana do pengaruh ni halak na mangulahon dosa i songon ragi na mambahen kabbang sude adonan. Didok ibana, “Otik pe ragi boi do mambahen kabbang sude adonan.” Jala didok ibana muse, “Pakaluar hamu ma halak na mangulahon na jahat sian huria.”—1 Kor. 5:6, 11-13.

“Halak na mangulahon na jahat” na didok Apostel Paulus i, mangulahon seks na so patut do ibana. Jala gabe adong ma halak di huria na setuju tu pangalahona i. (1 Kor. 5:1, 2) Molo sai dipasombu do ibana tetap bergabung di huria, boi do gabe terpengaruh halak Kristen na asing lao mangihutton pangalaho ni halak Korint na so hasea. Jala boi do akka halak na di huria, gabe dang mangargai aturan ni Debata. (Pjm. 8:11) Asing ni i, dipatudos do halak na so olo muba songon “batu karang na buni di toru ni aek” na boi mambahen karam kapal. Boi do ibana manegai haporseaon ni halak Kristen na asing.—Jud. 4, 12.

Boi do mambahen halak na dipecat i gabe sadar. Hea do diceritahon Jesus perumpamaan taringot sahalak doli-doli na lao sian jabu ni bapakna. Marsonang-sonang do ibana pahabisson parbagiananna, jala diulahon ibana do seks na so patut. Akibatna, haccit ma ditaon ibana jala dang martujuan be ngoluna. Dung i, sadar ma ibana, muba, jala mulak tu jabu ni bapakna. (Luk. 15:11-24) Las hian do roha ni bapakna tikki mulak anakna naung muba i. Sian perumpamaan ni Jesus on, boi ma taattusi songon dia perasaan ni Jahowa. Didok ibana do tu hita, “Dang lomo rohakku molo mate parjahat i, unlomo do rohakku molo muba ibana sian pangalahona na jahat i jala toktong mangolu.”—Hes. 33:11.

Dos songon i ma, dang boi be halak na dipecat i mardongan tu akka dongan di huria. Alani i, olo do ra gabe taronjar rohana naeng mulak muse tu huria ala masihol tu nasida. Jala ala nungnga dihilala ibana na haccit alani pangalahona i, olo do ra gabe masihol ibana naeng jonok muse tu Jahowa dohot tu akka donganna.

Asa boi mangurupi halak na dipecat, ikkon tegas do hita. Didok Raja Daud do, “Molo diattuk halak na tigor marroha au, patuduhon holongna do i. Molo dipissang ibana au, dos songon miak do i di ulukku.” (Ps. 141:5) Bayakkon ma adong sasahalak na mendaki gunung na bersalju. Ala palojahu ibana jala pangalihu cuaca, olo do ibana mengalami hipotermia. Lapatanna, di toru ni suhu tubuh normal do suhu tubuhna. Jala boi do i mambahen ibana mondok-ondok. Molo tarpodom ibana, pasti gabe mate do ibana. Sambil paimahon tim penyelamat, olo do dipastap donganna ibana asa tetap sadar. Nang pe haccit na dipastap i, alai boi do i mambahen ibana tetap mangolu. Dos songon i ma, diakkui si Daud do molo mangulahon dosa sasahalak, porlu do tegas ibana dipissang asa boi ibana selamat.

Molo dipecat halak na so olo muba, boi ma dihilala ibana pisang-pissang na sian Jahowa. Songon i ma na dihilala anak ni si Julian na dipaboa di mula ni artikel on. Dung sappulu taon ibana dipecat, dipadenggan ibana ma ngoluna. Dung i, mulak ma muse ibana tu huria jala saonari nungnga gabe sintua. Didok ibana do, “Ikkon taonokku do akibat ni pangalahokku na so denggan. Jala porlu do memang pissang-pissang na songon i di au.”—Heb. 12:7-11.

Pasti lungun do rohatta molo adong na dipecat. Alai adong dope harapan. Boi do hita sude mangurupi halak na dipecat i asa boi mulak muse tu huria.

Akka sintua. Tikki paboahon keputusan taringot na dipecat i, porlu do dipatudu nasida holong ni Jahowa. Ikkon dipaboa nasida do tu na dipecat i, aha ma na porlu diulahon ibana asa boi mulak muse tu huria. Molo adong perubahan na dibahen ibana, boi do akka sintua manjuppangi ibana lao paingotton boha carana asa boi mulak muse tu Jahowa. *

Anggota keluarga. Asa boi nasida patuduhon holongna tu huria dohot tu halak na dipecat i, porlu do nasida mangihutton keputusan na dibahen akka sintua. Didok si Julian, “Tetap do anaknami ibana, alai pangalahona i do na manirang hami.”

Sude akka dongan di huria. Na patuduhon holong do molo dang mardongan be nasida jala dang makkatai tu halak na dipecat i. (1 Kor. 5:11; 2 Joh. 10, 11) Molo songon i dibahen nasida, na setuju do nasida tu pissang-pissang na dilehon Jahowa marhite akka sintua. Jala porlu do nasida mamparrohahon jala mangurupi keluarga na dipecat i. Alana pasti lungun do roha ni nasida. Unang ma sappe dihilala keluarga na dipecat i, gabe dohot nasida dipapulik sian akka dongan di huria.—Rom 12:13, 15.

Didok si Julian do, “Pengaturan na denggan do molo adong halak na dipecat asa boi hita mangihutton aturan ni Jahowa. Memang pasti haccit do i. Alai pasti godang do manfaatna tu ari na naeng ro. Molo hutabunihon pangalaho ni anakku, pasti dang boi denggan hubunganna tu Jahowa sahat tu andigan pe.”