Angka Dongan na huhaholongi hami,

Di abad papituhon SM, mandapot parnidaan ma si Hesekiel. Di parnidaan i, diida ibana ma hureta na mansai balga, i ma hureta pardisurgo. Jala Parhuaso na Tumimbo do na hundul disi. Longang do hita mamboto pardalan ni hureta i. Mansai hatop do parlojongna dos songon hilap (sillam). Jala, ndang balik hureta i manang gabe lambat parlojongna tingki marputar!​—Hes. 1:4, 9, 12, 14, 16-27.

Sian parnidaan on taingot ma, tongtong do maju organisasi ni Jahowa na di surgo. Jala songon dia do organisasiNa na di portibi on? Laporan dinas di taon naung salpu patuduhon, diurupi Jahowa do naposoNa na di tano on mambahen hamajuon na mansai hatop!

Songon di Amerika Serikat, godang do ulaon ni keluarga Betel. Adong do na pinda sian Brooklyn tu Warwick, New York manang tu inganan na asing. Adong do muse na ditugashon tu lapangan. Suang songon i nang keluarga Betel di kantor cabang na asing, adong do sian nasida na pajongjongkon, paturehon, pasadahon manang papindahon bangunan ni organisasi tu inganan na asing. Songon dia do molo hamu? Nang pe ndang pinda hamu, alai tontu marsitutu do hamu di ulaon tu Harajaon i.

Dipatogu do rohanami ala marsitutu do hamu mangihuthon hamajuon ni organisasi. Adong do angka dongan na pinda tu inganan na mangkaporluhon parbarita na uli. Adong do na pinda tu huria na marbahasa asing jala mamangke cara na baru laho marbarita. Asing ni i, godang do sian angka dongan na marsitutu asa lam tu denggan na di ulaon marbarita. Sude angka donganta na marsihohot, nang na matua manang na gale dohot do marlojong tu hangoluan. Molo talehon nasa gogonta laho marhobas tu Jahowa, dohot ma hita paboahon na pargabus do Sibolis!​—1 Kor. 9:24.

Pos ma rohamuna, diparrohahon Jahowa do hiras ni rohamuna. (Heb. 6:10) Alani rade ni rohamuna, gabe huingot hami ma si Abraham dohot si Sarah. Tingki marumur hirahira 70 taon, pinda ma si Abraham dohot keluargana sian kota Ur na di tano Kasdim tu inganan na dao, i ma Kanaan. Sahat tu na mate, marpindapinda do ibana jala maringanan di tenda. Sipujion do haradeon ni nasida na dua!​—1 Mus. 11:31; Ul. 7:2, 3.

Ditiru hamu do haradeon ni nasida? Hamu angka dongan, martahan jala marsihohot do hamu di tingki parpudi on, diulahon hamu do parenta ni Jesus na mandok, ”Laho ma hamu, podai hamu ma saluhut bangso, didi hamu ma nasida tu bagasan Goar ni Ama. Anak dohot Tondi Parbadia!”​—Mat. 28:19.

 Hata ”laho” na didok Jesus di ayat on, lapatanna ingkon hiras jala marsitutu do hita. Di bagasan sataon na parpudi on, godang do hamajuon na binahen ni angka siihuthon Jesus. Tontu sude do hita marlas ni roha! Sian on tangkas ma taboto na dipasupasu Jahowa do sude ulaonta laho mamaritahon Harajaon i tu ganup bangso.​—Mrk. 13:10.

Godang do na manjangkon barita na uli on. Di taon naung salpu, sahat tu 8.340.847 ma godang ni penyiar. Jala, hirahira 10.115.264 ma parsiajar Bibel na diuluhon ganup bulan. Tangkas ma, mansai hatop do parlojong ni hureta pardisurgo i, suang songon i nang hamu! Saonari otik nama tingki, tutupon ni Jahowa nama pintu haluaon i. Alani i, girgir jala marhiras ni roha ma hita mamaritahon barita na uli.

Hombar do on tu ayat tahunan 2017, ”Sai marhaposan tu Jahowa ma ho jala ulahon na denggan”! (Ps. 37:3) Molo diulahon i, i ma marhobas tu Jahowa, na patuduhon na marhaposan tu Jahowa do hamu. Ndang holan sahalakmuna na mangulahon on. Ingot ma na nidok ni Jesus, ”Ai ida ma, sai na dongananku do hamu ganup ari, rasirasa ro ajal ni hasiangan on!”​—Mat. 28:20.

Pos ma rohamuna sai pasupasuon ni Jahowa do angka ulaon pangkobasionmuna. Ndang alani godang ni pambahenanmuna, alai ala nunga dilehon hamu na dumenggan sian nasa rohamuna. Lomo do roha ni Jahowa di pangkobasionmuna i. (2 Kor. 9:6, 7) Alani i, sai tongtong ma pajonok hamu tu Ama Parholong i, marhite taratur martangiang, marsiajar Bibel, marpungu, jala marsitutu di ulaon marbarita.

Ala ”otik nama tingkina” di Sibolis, dipangke ibana do marragam cara asa unang marsihohot hita tu Jahowa. (Pgk. 12:12) Tongtong ma jonok tu Jahowa. Asa unang saut lomo ni roha ni Sibolis i. (Ps. 16:8) Pos ma rohamuna, holong do rohanami tu hamu. Jala huargai hami do sude na binahenmuna tu ulaon Harajaon ni Debata.

Angka Donganmuna,

Punguan na Mangaradoti Organisasi ni Sitindangi Ni Jahowa