Ida ma gombar ni dakdanak on. Lungun do dihilala ibana ala so adong donganna. Hea do dihilala hamu na songon i?​— Sude jolma hea do mangkilala sisongon i. Dipaboa do di Bibel taringot aleale ni Jahowa na hea lungunlungunan jala mabiar. Taparsiajari ma taringot tu si Elia.

Andorang so tubu Jesus, nunga adong si Elia. Ibana tading di Israel. Tingki i, si Ahab ma raja disi. Alai, si Ahab ndang manomba Debata Jahowa. Si Ahab dohot tunggani boruna, si Izebel manomba Baal, debata na so sintong. Alani i, torop ma halak Israel gabe dohot manomba Baal. Jahat do ratu Izebel on, naeng bunuonna do si Elia dohot sude na manomba Jahowa! Diboto hamu do aha na diulahon si Elia?​—

Laho ma si Elia sian Israel! Tu padang pasir ma ibana laho jala martabuni di bagasan  liang. Molo pandapotmu, boasa ibana martabuni?​— I do, ala mabiar ibana. Alai sasintongna, ndang porlu mabiar si Elia. Boasa? Ala diboto ibana do molo Jahowa sai mangurupi ibana. Nunga hea dipatudu Jahowa huasoNa tu si Elia. Dialusi Jahowa do tangiang ni si Elia marhite tanda halongangan. Dibahen Jahowa ma turun api sian langit. Tontu, sai urupan ni Jahowa do si Elia!

Tingki di bagasan liang si Elia, disungkun Jahowa ma ibana: Marhua do ho dison? Dialusi si Elia ma: Holan sasada ahu nama na manomba Ho. Saonari, holan ahu nama na tading jala mabiar do ahu dipamate. Dirimpu si Elia, sude na manomba Jahowa nunga dibunu. Alai, didok Jahowa tu si Elia: Ndang toho i. Adong dope 7.000 halak nai na manomba Ahu. Unang ho mabiar. Godang dope na laho siulahononmu! Molo pandapotmu, las do roha ni si Elia mambege i?​—

Aha do na taparsiajari sian si Elia?​— Unang pola lungun jala mabiar ho. Godang do donganmu na mangkaholongi Jahowa jala mangkaholongi hamu. Asing ni i, mansai gogo do Jahowa i, jala rade do ibana mangurupi hamu! Jadi, las do roham mamboto i?​—