Jesus Kristus anak ni Debata jala alealeNa na solhot, na dihaholongi. Andorang so gabe jolma ibana di tano on, nunga sada surusuruan na gogo Jesus di surgo. (Johannes 17:5) Dung i, ro ma ibana tu tano on laho mangajarhon hasintongan taringot Debata tu angka jolma. (Johannes 18:37) Dilehon ibana do ngoluna laho paluahon angka jolma na mangoloi Debata sian dosa dohot hamatean. (Rom 6:23) Saonari, Jesus nunga gabe raja di Harajaon ni Debata, sada pamarentaon na di surgo na laho mambahen Paradeiso di portibi on.—Pangungkapon 19:16.

Angka surusuruan na burju tong do aleale ni Debata. Andorang so adong dope portibi on nunga ditompa angka surusuruan di surgo. Ndang ditompa nasida songon jolma di tano on. (Job 38:4-7) Marloksaloksa do angka surusuruan. (Daniel 7:10) Angka aleale ni Debata na di surgo on marlomo ni roha asa marsiajar hasintongan ni Jahowa angka jolma.—Pangungkapon 14:6, 7.

Adong do aleale ni Debata di tano on; digoari do nasida angka sitindangiNa. Sahalak sitindangi di pengadilan, manghatindanghon angka aha na binotona taringot sasahalak manang na asing. Angka Sitindangi Ni Jahowa manghatindanghon aha na diboto nasida taringot Jahowa dohot lomo ni rohaNa. (Jesaya 43:10) Songon angka surusuruan, angka Sitindangi lomo do rohana mangurupi hamu marsiajar taringot hasintongan ni Jahowa. Nasida pe marlas ni roha molo hamu gabe aleale ni Debata.