Gabe aleale ni Debata i ma na sun denggan na boi dihilala hamu. Na laho ajaran ni Debata do hamu asa boi martua jala dame; paluaonNa ma hamu sian angka haporseaon na sala dohot pangalaho na parohon jea. TangihononNa do angka tangiangmu. UrupanNa ma hamu asa manghilala hadameon ni roha dohot marpos ni roha. (Psalmen 71:5; 73:28) Diurupi Debata do hamu tingki jumpang hasusaan. (Psalmen 18:19) Jala, lehonon ni Debata do basabasaNa tu hamu i ma hangoluan salelenglelengna.—Rom 6:23.

Huhut dipajonok hamu dirimu tu Debata, laos jonok ma hamu tu angka alealeNa. Nasida pe boi gabe aleale muna. Sasintongna, boi do nasida songon hahaanggi muna sandiri. Las do roha ni nasida mangajari hamu taringot Debata, mangurupi dohot patoguhon haporseaonmu.

Ndang dos hita dohot Debata. Huhut tabahen paralealeon tu Debata, adong do sada na mansai ringkot ingkon taantusi. Paralealeon tu Debata ndang dos songon paralealeon ni dua halak na satorbang. Ibana dao umtua, umbisuk, jala umgogo sian hita. Ibana do na marhuaso tu hita jala na marhadaulaton. Alani i, molo lomo do rohanta gabe alealeNa, ingkon tatangihon Ibana jala mangulahon aha na hombar tu lomo ni rohaNa. Molo taulahon on sai parohon laba ma tu hita.—Jesaya 48:18.