Paradeiso ndang dos songon portibi ingananta nuaeng. Ndang lomo roha ni Debata portibi on digohi hasusaan, hangalutan, habot ni roha dohot parungkilon. Di ari na naeng ro laho bahenon ni Debata ma portibi on gabe paradeiso. Songon dia do Paradeiso i? Taida ma aha na didok ni Bibel:

Angka Halak na burju. Paradeiso naeng gabe inganan ni aleale ni Debata. Marparange na denggan do nasida maradophon donganna. Nasida mangolu hombar tu angka dalan ni Debata na tigor.—Poda 2:21.

Gok sipanganon. Di Paradeiso ndang adong masa haraparon. Bibel mandok: ”Jadi gabe situtu ma eme [manang, sipanganon] di tano on.”—Psalmen 72:16.

Jabu na denggan dohot ulaon na sonang. Di Paradeiso ganup ripe paulihon jabuna sandiri. Ganup halak mangulahon ulaon na parohon hasonangan.—Jesaya 65:21-23.

 Hadameon di liat Portibi on. Ndang masa be porang jala ndang adong be na mate alani i. Hata ni Debata mandok, ”[Debata] do pasohothon hamusuon.”—Psalmen 46:9, 10.

Hahisaron na denggan. Bibel manjanjihon, ”Na so tupa be dohonon ni pangisina [Paradeiso]: ’na gale do ahu.’” (Jesaya 33:24) Jala ndang adong be na pampang, manang na mapitung, na so marbinege, manang na ngungu.—Jesaya 35:5, 6.

Pasohotonna ma parungkilon, hangalutan, dohot hamatean. Hata ni Debata mandok: ”ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i.”—Pangungkapon 21:4.

Ndang adong be angka parjahat. Jahowa marjanji, ”alai anggo halak parjahat siap sian tano on, jala halak pangoseose pidom sian i.”—Poda 2:22.

Masihaholongan jala masipasangapan ma nasida. Ndang adong be hageduhon, pangarupaon, pangahut, dohot hosom. Marsada ni roha ma nasida jala mangolu hombar tu angka dalan ni Debata na tigor.—Jesaya 26:9.