Hamu boi mandapot parsiajaran taringot Jahowa marhite manjaha Bibel. Na uju i dipillit Debata do pigapiga halak laho manurathon isi ni pingkiranNa. Angka na disuratna i digoari ma Bibel. Saonari hita marsiajar taringot Debata marhite manjaha Bibel. Ala Bibel on marisi hata dohot barita sian Jahowa gabe digoari ma on Hata ni Debata. Hita boi porsea tu na didok ni Bibel ala Jahowa ndang hea margabus. ”Na so tarbahen Debata margabus.” (Heber 6:18) Hata ni Debata marisi hasintongan.—Johannes 17:17.

Bibel sada silehonlehon ni Debata na umarga na dilehon tu hita. On songon sada surat sian ama na parholong tu ianakhonna. Dipaboa Bibel do tu hita taringot janji ni Debata na laho paulionna portibi on gabe sada inganan na mansai sonang—i ma Paradeiso. Bibel pe paboahon tu hita aha naung diulahon Ibana uju i, aha na diulahon Ibana saonari jala aha siulahonnonNa di ari na naeng ro tu angka ianakhonNa na marsihohot. Bibel pe mangurupi hita laho mangadopi angka sitaonon jala mandapot hasonangan ni roha.—2 Timoteus 3:16, 17.

 Angka Sitindangi Ni Jahowa i ma aleale ni Debata; nasida naeng mangurupi hamu asa mangantusi aha na diajarhon ni Bibel. Paboa ma tu nasida molo hamu naeng marsiajar Bibel. Ndang pola digarar nasida. (Mateus 10:8) Asing ni i, hamu boi ro tu parpunguan Kristen. Parpunguan on dipatupa di inganan na digoari Bale Harajaon. Molo ro hamu tu parpunguan Kristen i, lam bagas ma parbinotoan muna taringot Debata.

Boi do hamu marsiajar taringot Debata sian angka na binahenNa. Songon na didok ni Bibel: ”Ditompa Debata langit dohot tano on.” (1 Musa 1:1) Tingki ditompa Jahowa ”langit” dibahen ma mata ni ari. Sian tompaan on aha ma na taboto taringot Debata? On paboahon tu hita Jahowa i pargogo na so hatudosan. Holan Ibana do na boi mambahen mata ni ari. On patuduhon bisuk ni Jahowa tu hita. Bisuk dihaporluhon mambahen mata ni ari na mohop jala torang alai ndang marnasuda.

Tompaan ni Jahowa patuduhon holongNa tu hita. Pingkiri ma taringot ragam ni angka parbue ni hau na adong di tano on. Jahowa, boi do manompa holan sada ragam ni parbue ni hau—manang ndang ditompa nanggo sada pe. Baliksa, dilehon Jahowa do parbue ni hau na marragam rupana, balgana, warnana, dohot daina. On patuduhon Jahowa ndang holan Debata parholong, alai marbasa ni roha, na burju, jala diparrohahon do hita.—Psalmen 104:24.