1, 2. Aha do sungkunsungkun na adong di roha ni torop halak?

TSUNAMI mangaup sada huta. Sahalak baoa mamboan senjata tu gareja jala ditembaki halak na ro tusi. Mate sada ina alani kanker, manadingkon lima ianakhonna.

² Molo masa mara manang hasusaan, sungkunsungkun do rohanta mandok, ”Boasa masa on?” Sungkunsungkun do roha ni torop halak boasa portibi on gok hajahaton dohot hasusaan. Hea do hamu manungkun songon i?

3, 4. (a) Aha do sungkunsungkun ni si Habakuk tu Jahowa? (b) Songon dia do alus ni Jahowa?

³ Songon na dipaboa di Bibel, halak na marhaporseaon na togu pe, hea do manungkun songon i. Umpamana, disungkun panurirang Habakuk tu Jahowa, ”Boasa tung pataridahononmu tu ahu hageduhon, jala marsombusombu ho paidaida hangaluton? Pangarupaon dohot hadoboon di jolongku; masa parsalisian, jala tubu parbadaan.”​—Habakuk 1:3.

⁴ Di Habakuk 2:2, 3, dialusi Debata do sungkunsungkun ni si Habakuk jala marjanji do Ibana patigoronNa do na masa i. Dihaholongi Jahowa do jolma. Bibel mandok, ”Ai disarihon do hamu.” (1 Petrus 5:7) Hansit do rohanta mangida hasusaan. Alai, humansitan dope roha ni Jahowa. (Jesaya 55:8, 9) Saonari, taida ma: Boasa godang hasusaan di portibi on?

5. Aha do na jotjot didok pangula ni huria dohot guru agama taringot hasusaan? Aha do na diajarhon Bibel?

⁵ Molo masa hasusaan, jotjot do pastor, pandita dohot guru agama mandok, nunga songon i sangkap ni Debata. Adong muse na mandok, sude na masa tu hita songon angka parungkilon nunga ditontuhon Debata hian. Na asing muse mandok, molo mate sasahalak umpamana dakdanak, asa boi do nasida rap dohot Debata di surgo. Alai, ndang tutu songon i. Ndang hea diulahon Jahowa mambahen na roa. Bibel mandok, ”Dao ma sian Debata anggo hajahaton, jala dao sian Nasunhinagogo i uhum hageduhon!”​—Job 34:10.

6. Boasa jotjot disalahon halak Debata tingki masa hasusaan?

⁶ Tingki masa hasusaan, jotjot do Debata disalahon godang halak, ninna roha nasida, Debata do na marhuaso di portibi on. Alai, songon na taparsiajari di Pasal 3, Sibolis do sasintongna na mangarajai portibi on.

7, 8. Boasa godang hasusaan di portibi on?

⁷ Bibel paboahon, ”Di bagasan hajahaton do nasa portibi on.” (1 Johannes 5:19) Sibolis, raja ni portibi on jahat jala kejam do. Ibana do ”na paotootohon liat portibi on”. (Pangungkapon 12:9) Torop jolma na mangihuthon ibana. Jala, i ma sada siala boasa portibi on gok hajahaton, sogo ni roha dohot gabus.

⁸ Adong siala na asing na mambahen godang hasusaan di portibi on. Mardosa si Adam dohot si Hawa, gabe dohot ma pinomparna mardosa. Alani dosa, jotjot jolma mambahen hasusaan tu donganna jala lomo rohana asa umsangap nasida sian na asing. Jotjot nasida marbada, marporang jala manusai  donganna. (Parjamita 4:1; 8:9) Sipata, hita marsitaonon alani tingki dohot parsorion mangonai tu hita saluhutna. (Parjamita 9:11) Olo do hita hona mara ala masa parmaraan di ingananta di tingki na so panagaman.

9. Boasa boi pos rohanta tu Jahowa nang pe dipaloas masa hasusaan?

⁹ Ndang Jahowa na mambahen hasusaan. Ndang salahononta Ibana molo masa porang, hajahaton dohot penindasan. Ndang Debata na mambahen mara songon gempa, halisungsung dohot banjir. Alai, olo do ra sungkunsungkun rohanta, boasa ndang dipasohot Debata hasusaan hape Ibana do pargogo na so hatudosan? Taboto do, dihaholongi jala disarihon Debata hita. Alani i, adong do alana boasa dipaloas Debata masa hasusaan.​—1 Johannes 4:8.

10. Songon dia do Sibolis mandok na so tutu taringot Debata?

¹⁰ Tingki di porlak Eden, diotootoi Sibolis do si Adam dohot si Hawa. Sibolis mandok, margabus do Debata tu nasida jala ndang denggan pamarentaon ni Debata i. Lomo roha ni Sibolis asa porsea si Adam dohot si Hawa na so porlu nasida aturon ni Debata jala dumenggan do ibana mamarenta sian Jahowa.​—1 Musa 3:2-5; ida Lampiran 27.

11. Sungkunsungkun aha do na porlu taboto alusna?

¹¹ Ndang mangoloi si Adam dohot si Hawa tu Jahowa. Ninna rohanasida, boi do nasida sandiri manontuhon aha na sintong dohot na so sintong di nasida. Songon dia do bahenon ni Jahowa laho  patuduhon na sala do angka na mangalo tu Ibana jala holan Ibana do umboto na dumenggan tu hita?

12, 13. (a) Boasa ndang pintor diripashon Jahowa sude na mangalo tu Ibana? (b) Boasa dipaloas Jahowa dirajai Sibolis portibi on? Jala boasa dipaloas jolma mangarajai dirina sandiri?

¹² Ndang pintor mate si Adam dohot si Hawa diuhum Debata. Alai, dipaloas do nasida marpinompari. Dilehon Jahowa do tingki tu pinompar ni si Adam laho mamillit ise do na laho oloan ni nasida. Sangkap ni Jahowa, i ma tano on diingani jolma na tipak. Aha pe dibahen Sibolis, pasauton ni Jahowa do sangkapNa.​—1 Musa 1:28; Jesaya 55:10, 11.

¹³ Marjuta surusuruan di surgo mangida Sibolis mangalo tu Jahowa. (Job 38:7; Daniel 7:10) Alani i, dilehon Jahowa ma tingki laho patuduhon tutu manang ndang na didok ni Sibolis i. Jala, dilehon Jahowa do tingki tu jolma laho mamarenta dirina sandiri, patuduhon boi do denggan manang na ndang pamarentaon ni nasida pulik sian Debata.

14. Aha do pinatudu ni angka na masa di tano on?

¹⁴ Nunga marribu taon jolma mamarenta dirina sandiri, alai ndang hea denggan pamarentaon nasida. Patar ma gabus ni Sibolis. Tutu ma, ingkon Debata do na mamarenta jolma. Didok panurirang Jeremia, ”Nunga huboto, ale Jahowa, ndada guru di jolma dalanna, ndada guru di baoa pardalandalan, pahothon langkana.”​—Jeremia 10:23.

15, 16. (a) Boasa songon i leleng dipaloas Jahowa masa hasusaan? (b) Boasa ndang dipasohot Jahowa hasusaan?

¹⁵ Boasa songon i leleng dipaloas Jahowa masa  hasusaan di tano on? Boasa ndang dipaso Ibana hasusaan? Dilehon Jahowa do tingki asa tarida ndang denggan pamarentaon ni Sibolis. Godang do ragam ni pamarentaon dibahen jolma, hamajuon ni sains dohot teknologi. Alai, godang dope hapogoson, uhum na so tigor, hajahaton dohot porang. Alani i, ndang boi jolma mamarenta dirina sandiri.

¹⁶ Molo dipaso Jahowa hasusaan di tingkinta on, dos songon na mangurupi Sibolis ma Ibana. Ndang tutu bahenon ni Debata songon i. Jala, ndang tutu jolma boi marhasil mamarenta dirina sandiri alana gabus do i. Alani i, ndang pasintongon ni Jahowa gabus na nidok ni Sibolis i, alana ndang hea Ibana margabus.​—Heber 6:18.

17, 18. Songon dia do bahenon ni Jahowa tu sude na sega binahen ni Sibolis?

¹⁷ Boi do padengganon ni Jahowa sude na sega binahen ni Sibolis dohot na binahen ni jolma? Boi. Sude do tarbahen ni Jahowa. Nunga diboto Jahowa, sada tingki boi do taralusi sude gabus ni Sibolis. BahenonNa ma tano on gabe Paradeiso songon naung sinangkapNa hian. PaheheonNa ma sude ”na di angka tanoman”. (Johannes 5:28, 29) Ndang adong be sahit dohot hamatean. Dipangke Jahowa do Jesus ”laho manegai angka ulaon ni Sibolis”. (1 Johannes 3:8) Mauliate ma tadok tu Jahowa ala dilehon tingki tu hita mananda Ibana jala mamillit pamarentaonNa. (Jaha 2 Petrus 3:9, 10.) Nang pe masa hasusaan, urupanNa do hita asa boi martahan.​—Johannes 4:23; jaha Jesaya 40:29.

¹⁸ Ndang dipaksa Jahowa hita mangoloi Ibana.  Dilehon Ibana do tu hita silehonlehon na arga, boi hita mamillit ise sioloanta. Saonari, taparsiajari ma taringot tu silehonlehon na arga on.

19. Aha do silehonlehon na arga na dilehon Jahowa tu hita? Boasa mandok mauliate hita alani silehonlehon on?

¹⁹ Dilehon Jahowa do tu jolma roha dohot pingkiran, i ma silehonlehon na arga na mambahen hita marimbar sian binatang. Binatang mangolu mangihuthon naluri. Alai jolma, boi manontuhon aha siulahononna jala boi mamillit ise do na laho dioloi. (Poda 30:24) Hita ndang dos songon masin na marputar ala dipangolu. Boi do hita songon na tahalomohon, ise na laho gabe alealenta jala aha na laho bahenonta di ngolunta. Lomo roha ni Jahowa asa marlas ni roha hita di ngolunta.

20, 21. Aha do na dumenggan na boi tapillit saonari?

²⁰ Lomo roha ni Jahowa molo tahaholongi Ibana. (Mateus 22:37, 38) Songon sahalak ama, las rohana mangida anakna patuduhon holong na sian roha ndang ala dipaksa. Suang songon i ma Jahowa. Alai, si Adam, si Hawa dohot Sibolis dipillit nasida do ndang mangoloi Jahowa. Songon dia do hita mamangke silehonlehon ni Debata? Ise do na laho taoloi?

²¹ Pillit ma mangoloi Jahowa. Marjuta halak mamillit mangoloi Debata ndang Sibolis. Alani i, tapillit ma mangoloi Jahowa. (Poda 27:11) Aha do na boi taulahon asa boi hita sipardohot tu tano na imbaru na so adong be hasusaan? Taalusi ma sungkunsungkun i di pasal na mangihut.