1. Ise do na boi paboahon tu hita songon dia cara na sintong manomba Debata?

SUDE agama mandok mangajarhon na sintong taringot Debata. Alai, ndang tutu songon i. Alana, marasingasing do diajarhon sude agama taringot Debata jala songon dia laho manomba Ibana. Songon dia do boi taboto cara na sintong manomba Debata? Holan Jahowa do na boi paboahon tu hita songon dia hita laho manomba Ibana.

2. Songon dia do boi taparsiajari cara na sintong manomba Debata?

² Dilehon Jahowa do tu hita Bibel asa taboto songon dia cara manomba Ibana. Alani i, taparsiajari ma Bibel, urupan ni Jahowa do hita laho mandapot laba sian pangajarionNa ala disarihon Ibana do hita.​—Jesaya 48:17.

3. Aha do na dipangido Debata asa taulahon?

³ Torop halak mandok, sude do agama dihalomohon Debata. Alai ndang songon i diajarhon Jesus. Didok ibana, ”Ndada saluhut halak, na mandok Ahu Tuhanna, bongot sogot tu harajaon banua ginjang i, holan angka na mangulahon lomo ni roha ni damang na di banua ginjang i do!” Alani i, ringkot taparsiajari aha na dihalomohon Debata na ingkon taulahon. Ringkot situtu do on botoonta, alana dipatudos Jesus do halak na so mangulahon hata ni Debata songon parjahat, ”na mambahen na so jadi”.​—Mateus 7:21-23.

4. Aha do dipaboa Jesus taringot mangulahon lomo ni roha ni Debata?

⁴ Dipaboa Jesus tu hita, godang do tantangan na laho  taadopi tingki mangulahon lomo ni roha ni Debata. Didok ibana, ”Bongoti hamu ma harbangan na gogot i; ai ruak do harbangan jala lambas do dalan na tu hamagoan, jala torop do angka na bongot sian i. Alai na hopit do ia harbangan jala gogot do dohot dalan na tu hangoluan, jala otik do halak na jumpangan i.” (Mateus 7:13, 14) Dalan na hopit, i ma cara na sintong manomba Debata na manogunogu tu hangoluan. Dalan na lambas, i ma cara na so sintong na parohon hamatean. Ndang lomo roha ni Jahowa sahalak pe mate. Alani i, dilehon Ibana do tingki tu sude jolma laho mananda Ibana.​—2 Petrus 3:9.

5. Songon dia do boi tatanda halak na manomba Debata marhite cara na sintong?

⁵ Jesus mandok, boi do tatanda halak na manomba Debata mangihuthon cara na sintong. Boi tatanda nasida sian haporseaon dohot parniulaon ni nasida. Didok ibana, ”Sian parbuena do tandaonmuna nasida.” Didok muse, ”Marparbuehon na denggan do nasa hau na denggan.” (Mateus 7:16, 17) Lapatanna, ndang na ingkon halak na tipak sude na manomba Debata. Alai, ingkon marsitutu do sude naposo ni Debata mangulahon na sintong. Saonari, taparsiajari ma songon dia mananda halak na manomba Debata mangihuthon cara na sintong.

6, 7. Boasa panombaon na sintong tu Debata ingkon marojahan tu Bibel? Aha do na boi tatiru sian Jesus?

⁶ Ajaranna marojahan tu Bibel. Dipaboa di Bibel, ”Ai nasa surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran, asa rimpas halak ni Debata, hobas tu nasa  ulaon na denggan.” (2 Timoteus 3:16, 17) Apostel Paulus manurat tu halak Kristen di Tessalonik, ”Ai dijangkon hamu do hata ni Debata na binegemuna sian hami; ndada songon hata ni jolma dijangkon, hamu i, tung songon hata ni Debata do.” (1 Tessalonik 2:13) Panombaon na sintong ingkon marojahan tu hata ni Debata, i ma Bibel. Ndang marojahan tu pingkiran ni jolma dohot adat istiadat manang na asing.

⁷ Sude na diajarhon ni Jesus marojahan tu hata ni Debata. (Jaha Johannes 17:17.) Jotjot do dienet ibana hata ni Debata. (Mateus 4:4, 7, 10) Halak na manomba Debata ingkon maniru Jesus jala sude ajaran ni nasida ingkon marojahan tu Bibel.

8. Aha do diajarhon Jesus taringot tu halak na manomba Debata?

⁸ Manomba Debata Jahowa. Psalmen 83:19 mandok, ”Asa ditanda nasida sasada Ho do na margoar Jahowa, Natumimbul gumonggom liat portibi on.” Lomo roha ni Jesus asa sude halak manomba Debata na sintong jala diajari ibana do halak mamboto goar ni Debata. (Jaha Johannes 17:6.) Jesus mandok, ”Puji ma Jahowa Debatam, holan Ibana do sisombaonmu.” (Mateus 4:10, Bibel siganup ari) Alani i, naposo ni Debata ingkon mangihuthon Jesus. Nasida manomba Debata Jahowa, mamangke goarNa jala mangajarhon goar dohot sangkap ni Debata.

9, 10. Songon dia do hita patuduhon holong tu donganta?

⁹ Mangkaholongi dongan jolma. Diajari Jesus do siseanna asa masihaholongan. (Jaha Johannes 13:35.) Ise pe hita, sian dia haroroanta, na mora manang na pogos, holong ma na pasadahon hita songon halak na marhahamaranggi. (Kolosse 3:14) Alani i, ndang dohot hita marporang manang mambunu jolma. Bibel  mandok, ”Disi do tanda anak ni Debata dohot anak ni Sibolis: Ndang sian Debata ganup halak na so mangulahon hatigoran, jala na so marholong ni roha di donganna.” Jala didok muse, ”Unang ma songon si Kain, ai sian hajahaton do ibana, gabe dibunu do anggina.”​—1 Johannes 3:10-12; 4:20, 21.

¹⁰ Tapangke ma tingkinta, gogonta dohot artanta laho mangurupi jala patoguhon angka donganta. (Heber 10:24, 25) ”Taulahon ma na denggan di saluhut halak.”​—Galatia 6:10.

11. Boasa porsea hita molo Jesus i parhitean tu Debata?

¹¹ Mangoloi Jesus ala ibana do parhitean tu Debata. Di Bibel dipaboa, ”Ndang adong haluaon di bagasan manang ise na asing; ai ndang adong goar na asing di toru ni langit dilehon tu jolma, parhiteanta tu haluaon.” (Ulaon ni Apostel 4:12) Nunga taparsiajari di Pasal 5 di buku on, disuru Jahowa do Jesus tuat tu tano on bahen tobusan tu angka jolma na mangoloi Ibana. (Mateus 20:28) Jesus do na dipillit laho mamarenta tano on. I do alana Bibel paboahon tu hita, ingkon taoloi do Jesus asa mandapot hangoluan salelengna.​—Jaha Johannes 3:36.

12. Boasa ndang parsidohot hita tu politik?

¹² Ndang parsidohot tu politik. Ndang parsidohot Jesus tu politik. Tingki ditangkup ibana, didok ibana tu si Latus, ”Ndang sian portibi on harajaonku.” (Jaha Johannes 18:36.) Songon Jesus, hita pe ingkon marsihohot tu Harajaon ni Debata. Alani i ma, didia pe hita maringanan, ndang parsidohot hita tu politik. Alai, diparentahon do di Bibel asa unduk hita tu ”panggomgomi”, i ma pamarenta. (Rom 13:1) Ingkon oloanta do uhum di negaranta. Alai, molo maralo do uhum ni  Debata tu uhum ni pamarenta, tatiru ma angka apostel na mandok, ”Ingkon oloan do iba di Debata asa di jolma.”​—Ulaon ni Apostel 5:29; Markus 12:17.

13. Boasa ingkon tabaritahon taringot Harajaon ni Debata?

¹³ Mangkirim tu Harajaon ni Debata na boi pasaehon hasusaan na adong di portibi on. Jesus mandok, ingkon baritahononhon do ”barita na uli on na taringot tu Harajaon i” di liat portibi on. (Jaha Mateus 24:14.) Ndang tolap pamarentaon ni jolma mambahen aha na laho bahenon ni Harajaon ni Debata tu hita. (Psalmen 146:3) Diajari Jesus hita manangiangkon Harajaon i, tingki didok ibana, ”Sai ro ma harajaonmu! Sai saut ma lomo ni roham di banua tonga on songon na di banua ginjang!” (Mateus 6:10) Bibel paboahon tu hita, ropuhon ni Harajaon ni Debata ma sude pamarentaon ni jolma jala ”hot do anggo na sasada i ro di salelenglelengna.”​—Daniel 2:44.

14. Ise do na manomba Jahowa marhite cara na sintong?

¹⁴ Dung taparsiajari on, tasungkun ma dirinta: Punguan dia do na ajaranna marojahan tu Bibel? Punguan dia do na mamaritahon goar ni Debata? Punguan dia do na marholong ni roha tu donganna jala na porsea molo Jesus parhitean tu Debata ? Punguan dia do na so parsidohot tu politik? Punguan dia do na mamaritahon holan Harajaon ni Debata na boi pasaehon hasusaan? Holan Sitindangi Ni Jahowa do na mangulahon songon i.​—Jesaya 43:10-12.

15. Aha do na ingkon taulahon asa dijalo Debata panombaonta?

¹⁵ Ndang sae holan mamboto adong Debata. Sibolis pe diboto do adong Debata, alai ndang dioloi ibana  Debata. (Jakobus 2:19) Alani i, asa dijalo Debata panombaonta ingkon tatanda do Ibana jala taulahon parentaNa.

16. Boasa ingkon tatadingkon agama palsu?

¹⁶ Asa dijalo Debata muse panombaonta, ingkon tatadingkon do agama palsu. Panurirang Jesaya manurat, ”Ruar, ruar, borhat ma hamu sian i, unang jama hamu na ramun!” (Jesaya 52:11; 2 Korint 6:17) Alani i, unang ma taihuthon hasomalan na diulahon ni agama palsu.

17, 18. Aha do ”Babel na balga” i jala boasa ingkon hatop i tatadingkon?

¹⁷ Aha do agama palsu i? Agama palsu, i ma agama na mangajari asa manomba Debata, alai ndang mangihuthon hataNa. Di Bibel, agama palsu i digoari ”Babel na balga”. (Pangungkapon 17:5) Boasa? Sian Babilon do mula ni ajaran ni agama palsu dungkon Aek na Sumar di tingki ni si Noak. Dung i, rarat ma ajaran ni agama palsu i tu liat portibi on. Umpamana, halak Babilon manomba debata Sitolusada. Saonari on, godang do agama na mangajarhon molo Debata i Sitolusada. Dipaboa di Bibel, holan Jahowa do Debata na sintong jala Jesus anakNa. (Johannes 17:3) Dihaporseai halak Babilon do muse na mangolu dope tondi ni halak naung mate. Jala tondi i, boi do dipasiaksiak di api na roko. Alai ndang tutu i.​—Ida Lampiran 14, 17 dohot 18.

¹⁸ Nunga dipaboa Debata, ndang sadia lelengnai laho pasohotonNa ma sude agama palsu. (Pangungkapon 18:8) Boi do taantusi boasa ringkot situtu manadingkon agama palsu? Dipangido Jahowa do asa hatop tatadingkon agama palsu unang sanga tarlambat.​—Pangungkapon 18:4.

19. Songon dia do Jahowa mangurupi hita tingki tapillit mangoloi Ibana?

 ¹⁹ Tingki tatadingkon agama palsu jala tapillit mangoloi Jahowa, olo do ra adong aleale manang keluarga na marsogo ni roha. Alai, ndang pasombuon ni Jahowa hita. Alana, boi do hita marsada tu marjuta halak na masihaholongan songon sada keluarga di liat portibi on. (Markus 10:28-30) Jala, olo do ra adong aleale manang keluarga di pudian ni ari na olo marsiajar Bibel.

20. Boasa ingkon tasomba Debata marhite cara na sintong sian saonari?

²⁰ Ndang sadia lelengnai, ripashonon ni Debata ma angka hajahaton jala mamarenta ma HarajaonNa di portibi on. (2 Petrus 3:9, 13) Denggan situtu ma sude taida di tingki i! Sude halak disi manomba Jahowa mangihuthon cara na dihalomohonNa. Alani i, tapillit ma sian saonari laho manomba Debata marhite cara na sintong.