Lomo do roha ni Jahowa molo halak na marhasohotan tongtong marsihohot tu padan ni parsaripeonna. Tingki dipasupasu Debata pardongansaripeon ni baoa dohot borua na parjolo, didok Jahowa do, ”Tadingkonon ni baoa do amana dohot inana mandongani jolmana, jadi sada sibuk nasida.” Di pudian ni ari, diulahi Jesus do muse hata on, dung i didok, ”Naung pinadomu ni Debata, ndang jadi sirangon ni jolma.” (1 Musa  2:24; Mateus 19:3-6) Alani i, di adopan ni Jahowa dohot Jesus, ingkon hot do pardongansaripeon ro di salelengna asing ni disirang hamatean. (1 Korint 7:39) Ala badia do di adopan ni Debata pardongansaripeon, ndang boi leas roha tu parsirangan. Gariada, dihagigihon Jahowa do parsirangan na so hombar tu Bibel.​—Maleaki 2:15, 16.

 Aha do na diajarhon Bibel taringot parsirangan? Dihasogohon Jahowa do ulaon mangalangkup dohot parmainanon. (1 Musa 39:9; 2 Samuel 11:26, 27; Psalmen 51:6) Ala dihagigihon Jahowa do parmainanon, diloas Ibana ma sasahalak marsirang alani on. (Laho mamboto angka aha do ulaon na parsidohot tu parmainanon, ida ma Pasal 9, paragraf 7.) Dilehon Jahowa do hak tu dongan saripe na so marsala, laho mamillit marsirang manang ndang dohot dongan saripena. (Mateus 19:9) Jala, ndang muruk Jahowa molo dongan saripe na so marsala mamillit ingkon marsirang. Nang pe songon i, ndang boi huria manjujui manang ise laho marsirang. Ra, adong do pigapiga na so marsala tongtong olo rap dohot dongan saripena na mangulahon dosa i, tarlumobi molo diida adong panolsolion jala marsitutu laho muba. Alai, ingkon halak na so marsala i sandiri do na mamillit naeng marsirang manang ndang, ingkon rade do ibana mangadopi pangkorhon ni on.​—Galatia 6:5.

Tingki mangadopi situasi na borat, halak Kristen boi do mamillit padaodao manang ndang dohot dongan saripena, nang pe ndang mangulahon parmainanon. Alai, didok Bibel do taringot halak na padaodao asa ”unang marhamulian be, tagonan ma domu muse” dohot dongan saripena. (1 Korint 7:11) Ndang boi sahalak Kristen na padaodao marsangkap laho marhasohotan tu halak na asing. (Mateus 5:32) Taparrohahon ma pigapiga situasi na borat na boi mambahen sasahalak padaodao.

Ndang disarihon keluargana. Ra, boi do pogos hian parngoluon di keluarga ala ndang olo tungganedoli paradehon na ringkot di keluarga. Bibel mandok, ”Alai na so sumarihon donganna . . . sabagas, naung mansoadahon haporseaon do i; jumahat do i sian halak na so porsea.” (1 Timoteus 5:8) Molo ndang adong hamubaon ni tungganedoli i, boi do tungganeboru mamillit laho padaodao sian tungganedolina asa boi digohi ibana na ringkot tu dirina dohot tu ianakhonna. Ringkot do angka sintua manat mamingkirhon alualu ni halak Kristen taringot dongan saripena na so olo manarihon keluargana.  Molo sasahalak ndang manarihon keluargana, boi do ibana dipabali sian huria.

Jotjot mamungkuli dongan saripena. Ra, boi do marsahit manang mate sasahalak molo jotjot ibana dipungkuli dongan saripena. Molo sahalak Kristen do halak na jotjot mamungkuli dongan saripena i, porlu do patangkason ni angka sintua. Sasahalak na mura tarrimas jala somal mamungkuli dongan saripena, boi do dipabali sian huria.​—Galatia 5:19-21.

Diorai mangulahon sude ulaon partondion. Ra, olo do sasahalak marsitutu mangorai dongan saripena asa unang mangulahon ulaon partondion. Jala, dipaksa ibana laho mangulahon ulaon na so dihalomohon Debata. Alani i, marbisuk ma dongan saripe na diorai mangulahon ulaon partondion mamingkorhon, tutu do holan na padaodao dalan laho patuduhon na oloan ibana di Debata asa di jolma?​—Ulaon ni Apostel 5:29.

Di sude situasi na taparsiajari nangkin, ndang adong na boi mamaksa halak na so marsala ingkon manirangkon manang ingkon rap dohot dongan saripena. Nang pe angka dongan na toras di partondion dohot angka sintua boi mangalehon poda na hombar sian Bibel, alai ingot ma ndang diboto nasida sude na masa di parsaripeon ni sasahalak. Holan Jahowa do na mangida saluhut na masa. Ndang parohon sangap tu Debata manang pardongansaripeon, molo sahalak tungganedoli manang tungganeboru manggandai barita taringot dongan saripena, holan asa boi marsirang. Ndang boi tabunihonon ni sasahalak sian adopan ni Jahowa aha na mambahen nasida ingkon padaodao. Tutu ma, ”tung saluhut do tedek, so adong na hungkup diida matana. Tu Ibana do hita mardabudabu”! (Heber 4:13) Alai, olo do sahalak Kristen padaodao ala adong situasi na mansai borat naung leleng masa. Ise pe ndang boi manguhumi sasahalak na mangulahon on. Didok do di Bibel, ”Hita sasude pajongjongonna sogot tu adopan ni habangsa ni Debata.”​—Rom 14:10-12.