Masturbasi, i ma hasomalan na manegai partondion jala na mambahen sasahalak holan mamingkirhon giotgiot ni dagingna dohot angka na rorang. * Halak na mangulahon masturbasi, olo do sai marpingkiran na rorang molo mangida sasahalak. Manang dibahen ibana sada alat holan laho papuashon giotgiot ni daging, na so diulahon dua halak. Holan parsatongkinan do sonang ni roha na dapot sian i. Sasintongna, on ndang na laho pamatehon giotgiot ni daging na sala, alai gabe lam marsigorgor do di pingkiranna ’parmainanon, hahodaron dohot hisaphisap ni daging na so tarrajai’.​—Kolosse 3:5.

Didok apostel Paulus, ”Hamu angka haholongan . . . tapaias ma dirinta sian nasa na tau pahodarhon daging dohot tondi laho patulushon habadiaon mardongan biar mida Debata!” (2 Korint 7:1) Molo maol hita mangihuthon poda on, unang marmetmet ni roha. Sai ”marpamuati” do Jahowa jala rade mangurupi. (Psalmen 86:5; Lukas 11:9-13) Molo nunga marsitutu pasohon i alai sai manguhumi dope panggora ni rohamuna, on patuduhon na olo do hamu muba. Nang pe olo ro muse tu roha dohot tu pingkiran laho mangulahon i. Ingot ma, ”Umbalga do Debata sian rohanta jala diboto saluhutna.” (1 Johannes 3:20) Ndang holan dosanta na diida Debata, alai diida do naung marsitutu hita mambahen hamubaon. Ala tangkas do ditanda Debata hita, rade do Ibana manangihon  tangiang jala mangalehon asi ni roha tu hita. Unang ma marnaloja mangido pangurupion marhite tangiang, songon dakdanak na mangido pangurupion tu bapana. Lehonon ni Jahowa do panggora ni roha na ias. (Psalmen 51:3-14, 19; Jesaya 1:18) Ulahon ma ulaon na hombar tu tangiangmuna, songon marsitutu pasidingkon sijahaon manang sitontonon na marisi pornografi. *

Molo maol do dipasiding hamu giotgiot ni daging taringot masturbasi, unang maila paboahon tu natuatua na sahaporseaon dohot tu dongan na toras di partondion. *—Poda 1:8, 9; 1 Tessalonik 5:14; Titus 2:3-5.