1-3. (a) Songon dia do situasi na borat masa tu rumatangga ni si Abigail? (b) Aha do na laho taparsiajari di artikel on?

SIAN pardompahan ni dolidoli i, diida si Abigail ma na busisaon ibana. Adong situasi na borat jala na mambahen mabiar ibana. Hirahira 400 tentara ro laho mambunu sude baoa di rumatangga ni si Nabal. Boasa?

² Si Nabal do bonsir ni sude na masa on. Kejam jala jahat do ibana maradophon na asing. Di tingki i, dileai ibana ma sahalak pamimpin ni tentara. Alani i, dipaboa sahalak parmahan manang naposo ni si Nabal ma tu si Abigail. Pos do rohana, marbisuk do si Abigail laho paluahon nasida. Alai, boi do sahalak borua monang mangalo sada punguan ni tentara?

³ Saonari, taparsiajari ma taringot tu borua na marbisuk on. Ise do si Abigail? Boasa masa situasi na borat i? Jala, aha do na taparsiajari sian haporseaon ni si Abigail?

4. Songon dia do pangalaho ni si Nabal?

⁴ Parange ni si Abigail imbar do sian parange ni si Nabal. Na burju do si Abigail, alai baoa na so hasea do si Nabal. Tutu, na mora do si Nabal, alani i ma gabe ginjang rohana. Alai, songon dia do pandapot ni halak taringot tu ibana? Ndang adong halak na asing disurat di Bibel na mamangke panjouon songon na dibahen tu si Nabal. Lapatan ni goarna, ”Jogal”, manang ”Oto”. Tutu do on goar na dibahen natuatuana, manang goar panjouonna do i di pudian ni ari? Aha pe alusna, pangalahona hombar do tu goarna. Baoa na kasar do si Nabal jala roa pangalahona. Parmabuk jala parmuruk do si Nabal, alani i dihabiari jala dipasiding halak do ibana.​—1 Sam. 25:2, 3, 17, 21, 25.

5, 6. (a) Pandapotmuna, pangalaho na dia do na denggan sian si Abigail? (b) Boasa olo si Abigail marhamulian tu baoa na so hasea?

 ⁵ Imbar sian si Nabal, lapatan ni goar ni si Abigail, i ma ”Marlas ni Roha do Bapakku”. Balga do roha ni sahalak ama molo uli rupa ni boruna. Alai, umbalga do roha ni ama na marbisuk mangida boruna marpangalaho na denggan. Jotjot do halak na uli rupana mangkilala ndang porlu marbisuk, marhabaranion, marhaporseaon, dohot marpangantusion. Alai di Bibel, dipuji do si Abigail alani bisuk dohot uli ni rupana.​—Jaha 1 Samuel 25:3.

⁶ Ra, sungkunsungkun rohanta, ’Boasa ma olo borua na marbisuk muli tu baoa na so hasea?’ Di tingki i, natuatua do na patohotohohon anakkonna asa marhasohotan. Antong, naung satolop do natuatua ni si Abigail asa marhamulian ibana tu si Nabal? Jala, hamoraon dohot hasangapon ni si Nabal do umbahen dipatohotoho nasida? Aha pe alana, nang pe na mora si Nabal, alai ndang tungganedoli na burju ibana.

7. (a) Aha do na ingkon antusan ni natuatua molo naeng mangajari ianakhonna taringot tu pardongansaripeon? (b) Aha do na ringkot ulahonon ni si Abigail?

⁷ Manat do natuatua na marbisuk mangajari ianakhonna taringot tu pardongansaripeon. Ndang paksaon ni nasida asa marhasohotan ianakhonna alani hepeng, manang manjujui nasida mardongandongan di haposoonna, hape ndang boi dope nasida martanggung jawab. (1 Kor. 7:36) Alai, ndang i be na ringkot dipingkirhon si Abigail. Nunga marhamulian ibana tu si Nabal. Alani i, ingkon marsitutu do ibana asa marbisuk mangadopi na masa di parsaripeonna.

8. Ise do na dileai si Nabal, jala boasa parohon hasusaan i tu ibana?

⁸ Pambahenan ni si Nabal i, parohon parsoalan na borat tu si Abigail. Baoa na dileai, i ma si Daud. Naposo ni Jahowa na marsihohot jala na miniahan ni si Samuel do ibana. On patuduhon, na pinillit ni Debata do ibana ganti ni raja Saul. (1 Sam. 16:1, 2, 11-13) Sogo do roha ni si Saul jala naeng mambunu si Daud. Alani i, martabuni ma si Daud rap dohot 600 tentarana tu halongonan.

9, 10. (a) Songon dia do inganan partabunian ni si Daud dohot tentarana? (b) Aha do na mambahen si Nabal ingkon mandok mauliate tu si Daud dohot tentarana? (Ida ma surat na di toru di paragraf 10.)

⁹ Di huta Maon do si Nabal maringanan, alai karejo jonok tu  Karmel, ra disi do bidang tanona. * Di humaliangna, gok duhut jala denggan marmahan birubiru. Adong 3.000 birubiru ni si Nabal. Di sabola selatan, adong adaran Elaparan. Di sabola timur, adong halongonan na gok lombang dohot liang, jala sian i ma dalan tu Laut Sira. Dison ma si Daud martabuni dohot tentarana. Ingkon marburu jala mangadopi gok hasusaan do nasida. Jotjot do jumpang nasida dolidoli parmahan birubiru ni si Nabal.

¹⁰ Songon dia do tentara ni si Daud maradophon angka parmahan i? Sasintongna, boi do nasida mambuat manang manangko birubiru ni si Nabal. Alai, ndang diulahon nasida songon i. Gariada, dilinggomi nasida do angka birubiru dohot naposo ni si Nabal. (Jaha 1 Samuel 25:15, 16.) Godang do paraloan na diadopi angka parmahan i. Godang binatang buas jala jonok do inganan i tu parbalokan ni Israel di sabola selatan. Alani i, mura do ro angka panamun dohot panangko. *

11, 12. (a) Songon dia do si Daud patuduhon bisuk dohot pangargaion tu si Nabal? (b) Aha do na sala sian cara ni si Nabal mambalos tona ni si Daud?

¹¹ Maol do mangalului sipanganon di adaran i. Alani i, dipangido si Daud ma pangurupion tu si Nabal. Disuru ma sampulu halak mandapothon si Nabal tingki masa panggustingan imbulu ni birubiru. Diboto si Daud do, tingki ulaon on somal do halak patuduhon burju ni roha dohot las ni roha manamue. Dung i, dipatuduhon si Daud do bisuk dohot pangargaion tu si Nabal na tumua sian ibana. Didok si Daud do molo ibana ’anak’ ni si Nabal. Alai, Songon dia do alus ni si Nabal?​—1 Sam. 25:5-8.

¹² Songon na pinatorang ni dolidoli i tu si Abigail, muruk situtu jala dileai si Nabal do nasida. Si Nabal siholit mangging i, manuru nasida mulak balging tingki dipangido nasida sipanganon, aek siinumon, dohot pinahan sipotongon. Didok roha ni si Nabal, halak na lintun do si Daud. Songon si Saul, sogo do roha ni si Nabal tu si Daud. Alai, dihaholongi jala dipillit Jahowa do si Daud gabe Raja ni Israel. Tangkas ma, ndang hombar pingkirannasida tu lomo ni roha ni Debata.​—1 Sam. 25:10, 11, 14.

13. (a) Songon dia do pangkilalaan ni si Daud tu alus ni si Nabal? (b) Boasa sala na sinangkap ni si Daud mangihuthon prinsip di Jakobus 1:20?

¹³ Muruk situtu ma si Daud dung dibege ibana alus ni  si Nabal i. Diparentahon ma asa ”masisandang podangna” be nasida. Diuluhon ma 400 tentarana mamorangi si Nabal. Marsumpa do si Daud laho mambunu sude baoa di rumatangga ni si Nabal. (1 Sam. 25:12, 13, 21, 22) Ndang sala molo muruk si Daud, alai ndang denggan cara ni ibana patuduhon murukna i. Bibel mandok, ”Ndang diulahon rimas ni jolma hatigoran ni Debata.” (Jak. 1:20) Songon dia do si Abigail boi paluahon rumatanggana?

14. (a) Aha do na niulahon ni si Abigail umbahen tadok nunga diulahon ibana cara na parjolo pasaehon parsoalan i? (b) Aha do na taparsiajari sian pangalaho ni si Abigail na imbar sian si Nabal? (Ida surat na di toru.)

¹⁴ Nunga diulahon si Abigail cara na parjolo pasaehon parsoalan i. Ndang songon si Nabal, rade do si Abigail manangihon. Taringot si Nabal, didok dolidoli i, ”Ai na so hasea do i, tung so olo do i manangihon manang ise!” * (1 Sam. 25:17, Bibel siganup ari) Ala ginjang roha ni si Nabal, ndang rade ibana manangihon nasida. Saonari, godang do na marparange sisongon i. Alai, diboto dolidoli i do ndang songon i si Abigail, alani i dipasahat ma parsoalan i tu si Abigail.

15, 16. (a) Songon dia do si Abigail patuduhon na tutu sahalak tungganeboru na marbisuk songon na tarsurat di buku Poda? (b) Boasa boi didok ndang mangalo si Abigail tu tungganedolina?

¹⁵ Pintor dipingkirhon si Abigail do dalan pasaehon parsoalan i. Didok di Bibel, ”Hapogan [manang, ”humalaput”] ma si Abigail.” Taringot tu si Abigail, adong do tolu hali dipangke hata ”hapogan”, jala sahali hata ”humalaput”. Pintor diparade ibana do gok silehonlehon tu si Daud dohot tu tentarana. Dilehon do roti, anggur, birubiru, sasagun, roti kismis dohot roti ara. Taboto ma, tungganeboru na martanggung jawab do si Abigail tu rumatanggana, tudos tu na tarsurat di buku Poda. (Poda 31:10-31) Disuru do parjolo naposona laho, jala ibana mangihut sian pudi. Alai, didok di Bibel, ”Ndang dipaboa langkana i anggo tu si Nabal sinondukna i.”​—1 Sam. 25:18, 19.

¹⁶ Na mangalo do si Abigail tu tungganedolina? Ndang songon i. Taingot ma, nunga dileai si Nabal halak na miniahan ni Jahowa, jala boi do pambahenanna i parohon mara tu halak na  so marsala di rumatanggana. Molo ndang hatop si Abigail laho, ra parsidohot do ibana marsala rap dohot tungganedolina. Alani i, dipatudu si Abigail do na rumingkot unduk tu Debata sian tu tungganedolina.

17, 18. Aha do dibahen si Abigail tingki mandapothon si Daud, aha do dihatahon ibana, jala boasa i marhasil?

¹⁷ Ndang sadia leleng, pajumpang ma si Abigail dohot si Daud. Sahali nai, humalaput do ibana tuat sian halodena jala marsomba di adopan ni si Daud. (1 Sam. 25:20, 23) Dipatolhas ibana ma na di rohana i, dung i dipangido ibana ma asa asi roha ni si Daud tu rumatanggana. Boasa denggan situtu cara ni si Abigail on?

¹⁸ Si Abigail martanggung jawab padengganhon parsoalan on, jala dipangido ibana do asa marpamuati roha ni si Daud. Dipaboa ibana do molo tungganedolina, baoa na so marbisuk hombar tu goarna. Ra, on patuduhon ndang tama sahalak na sangap songon si Daud manguhum baoa sisongon i. Pos do roha ni si Abigail molo si Daud, suruan ni Debata. Diparhatutu ibana do molo na diulahon si Daud, i ma ”porang ni Jahowa”. Porsea do muse si Abigail taringot janji ni Jahowa tu si Daud dohot hasangaponna gabe raja. Alani i, didok ibana ma, ”Dibahen Jahowa . . . ho gabe partogi di halak Israel.” Dipangido ibana do muse asa unang diulahon si Daud ulaon na parohon utang hosa tu dirina, manang mambahen sega panggora ni rohana di pudian ni ari. (Jaha 1 Samuel 25:24-31.) Tangkas ma, marbisuk do si Abigail!

19. Songon dia do pandapot ni si Daud tu hata ni si Abigail, jala boasa dipujihon si Daud ibana?

¹⁹ Songon dia do pandapot ni si Daud? Dijangkon si Daud do silehonlehon ni si Abigail. Ibana mandok, ”Pinuji ma Jahowa Debata ni Israel ala sinuruna ho sadarion manjumpangkon ahu! Pujion do huhut hapistaranmu, pujion nang ho, ala diambat ho ahu sadarion unang mandurushon mudar.” Dipujihon si Daud do habaranion ni si Abigail na pintor ro mandapothon ibana. Dung i, ala diambati si Abigail do si Daud asa unang mandurushon mudar, didok ibana ma, ”Nangkok ma ho [mulak] tu jabum mardamedame.” Lambok ma ibana mandok, ”Nunga hutangihon soarami.”​—1 Sam. 25:32-35.

20, 21. (a) Pandapotmuna, aha do na mambahen mulak muse si Abigail tu tungganedolina? (b) Songon dia do si Abigail barani jala marbisuk mamillit tingki na dumenggan laho mangkatai tu si Nabal?

²⁰ Dipingkirhon si Abigail do na masa i dung mulak ibana.  Ra, diparrohahon do imbar ni si Daud na marsihohot, tu tungganedolina, na kejam. Alai, ndang i be na sai dipingkiri ibana. Didok di Bibel, ’Sahat ma si Abigail tu si Nabal.’ Mulak do ibana mandapothon tungganedolina, jala dipatudu ibana do tanggung jawab ni sahalak tungganeboru. Tama do botoon ni si Nabal aha naung dihatahon ibana tu si Daud dohot ambatambat na boi diatasi. Boi do marjea si Abigail molo diboto si Nabal sian na asing. Alai, ndang pintor dipaboa si Abigail tingki i, ala marpesta do si Nabal songon raja jala nunga mabuk.​—1 Sam. 25:36.

²¹ Sai dipatudu si Abigail do habaranion dohot bisuk. Dipaima do sahat tu manogot, asa boi denggan tangihonon ni si Nabal hatana. Alai boi do on parohon jea, ala parmuruk do si Nabal. Nang pe songon i, tongtong do dipaboa si Abigail sude na masa i. Di bagas roha ni si Abigail, pintor muruk ma ra si Nabal jala lalu tangan. Alai, holan hundul do ibana jala ndang manghordit.​—1 Sam. 25:37.

22. Aha do na masa tu si Nabal, jala aha do na taparsiajari taringot tu ulaon na kejam di keluarga?

²² Aha do na masa tu baoa i? ”Gabe mate pusupusuna di bagasan andorana, jala tudoshon batu do i.” Ra mate sambola do pamatangna. Sampulu ari nai mate ma si Nabal, alai ndang alani na marsahit. Didok Bibel do, ”Dipastap Jahowa ma si Nabal, laos mate.” (1 Sam. 25:38) Marhite panguhuman na tigor, marujung ma parbogason ni si Abigail. Saonari, ndang diuhum Jahowa parjahat marhite tanda halongangan. Alai, na masa tu si Nabal patuduhon, diida Jahowa do angka ulaon na kejam di keluarga, jala patuduon ni Jahowa do hatigoranNa dung jumpang tingkina.​—Jaha Lukas 8:17.

23. Aha do muse pasupasu na jinalo ni si Abigail, jala songon dia do ibana tongtong martoruk ni roha nang pe gabe tungganeboru ni si Daud?

²³ Adong do muse pasupasu na dijalo si Abigail, asing ni malua sian parrumatanggaon na sursar. Dung diboto si Daud naung mate si Nabal, disuru do suruanna asa mangaririt si Abigail. Didok si Abigail ma, ’Ida ma, naposom boruboru do ahu gabe hatoban laho mamburi pat ni angka naposo ni tuan.’ Toruk do roha ni si Abigail nang pe gabe tungganeboru ni  si Daud, gariada rade ibana gabe hatoban ni naposo ni si Daud! Hatop do muse ibana paradehon dirina laho mandapothon si Daud.​—1 Sam. 25:39-42.

24. Aha do parungkilon na diadopi si Abigail di parsaripeonna dohot si Daud, alai songon dia do tungganedolina dohot Debata mangurupi ibana?

²⁴ Adong do hasusaan di parsaripeon ni si Abigail dohot si Daud. Nunga dioli si Daud hian si Ahinoam. Nang pe ndang diorai Jahowa asa unang martungganeboru lobi sian sada, alai susa do borua na marsihohot mangadopi i. Ndang sai mura mangulahon lomo ni roha ni Jahowa ala ndang raja dope si Daud tingki i. Alai, sai diurupi jala ditolopi si Abigail do si Daud saleleng ngoluna, jala adong do sada anakna sian si Daud. Diboto si Abigail do na urupan jala linggoman ni si Daud do ibana. Hea do si Daud paluahon si Abigail sian panamun! (1 Sam. 30:1-19) Ditiru si Daud do Jahowa, na mangkaholongi angka borua na barani, marbisuk, jala marhaporseaon.