Disurat do di Hesekiel bindu 23 sipasingot sian Debata tu naposona na so setia. Mirip do isi ni bindu 23 tu bindu 16. Di dua bindu i dipaboa do tudosan taringot boru-boru na so hasea. Digombarhon do Jerusalem songon adekna, jala Samaria songon kakakna. Diihutton adekna do kakakna i gabe boru-boru na so hasea. Alai ungngeri do pangalaho ni adekna. Di bindu 23, dipaboa ma goar ni nasida, si Ohola dohot si Oholiba. Si Ohola ma kakakna, i ma Samaria ibu kota ni harajaon Israel na sappulu marga. Si Oholiba ma adekna, i ma Jerusalem ibu kota ni harajaon ni Juda. *​—Hes. 23:1-4.

Adong dope na sarupa di bindu 16 dohot di bindu 23. Di dua bindu on, dipatudos do boru-boru na so hasea i songon istri ni Jahowa na menghianati Ibana. Adong do muse dipaboa barita na denggan di dua bindu i. Memang dang takkas dipaboa di bindu 23 na lao dijalo Jahowa muse naposona i. Alai, adong do di bindu 23 on janji ni Debata na mirip tu janji na disurat di bindu 16. Didok Jahowa do, “Marujung ma bahenokku akka ulaonmu na so umboto ila i dohot ulaonmu na melacur i.”​—Hes. 16:16, 20, 21, 37, 38, 41, 42; 23:4, 11, 22, 23, 27, 37.

Najolo publikasitta mandok molo si Ohola dohot si Oholiba on manggombarhon Gareja naung tarbagi gabe Katolik dohot Protestan. Alai dung bagas diparsiajari, dirimangi, jala ditangiakkon, gabe tubu do sukkun-sukkun alani hatorangan na di publikasi i. Ai hea do huroa Gareja i gabe istri ni Jahowa? Hea do dibahen nasida parjanjian dohot Debata? Daong. Ai dang adong dope Gareja tikki Jesus gabe parhitean lao mambahen “parjanjian na imbaru” tu Israel ni Debata manang halak Kristen na dimiahi. (Jer. 31:31; Luk. 22:20) Dang hea Gareja gabe bagian ni Israel ni Debata. Ai di abad na paopatton pe baru adong Gareja, dung leleng mate akka apostel. Akka halak na mangakku Kristen do na gabe bagian ni organisasi na murtad i. Nasida do na digombarhon songon “simareme-eme” di surirang ni Jesus.​—Mat. 13:24-30.

Adong dope na patuduhon molo nasida dang manggombarhon Gareja. Dipaboa Jahowa do na lao jaloonna muse Jerusalem dohot Samaria na so setia i. (Hes. 16:41, 42, 53-55) Alai adong do dipaboa di Bibel molo Gareja dohot manjalo barita na denggan sisongon i sian Debata? Daong! Dang na lao diampuni Jahowa be Gareja dos songon agama na asing na termasuk tu Babel na Balga.

Jadi si Ohola dohot si Oholiba dang manggombarhon Gareja. Alai sian cerita i, boi ma taboto perasaan ni Jahowa tu halak na mangakku naposona alai mambahen marlea goarna, jala perasaan ni Debata tu halak na so mangihutton standarna. Massai balga do hasalaan ni Gareja. Ai sude aliran dohot sektena mangakku molo nasida wakil ni Debata. Diakkui do muse molo pamimpin ni nasida i ma Jesus Kristus, Anak haholongan ni Jahowa. Alai diajarhon do molo Jesus i bagian sian Tritunggal. Dang dioloi nasida muse paretta ni Jesus asa unang parsidohot tu portibi on. (Joh. 15:19) Takkas do muse molo Gareja i bagian ni “boru-boru na so hasea”. Ai torus do ibana manomba debata na so sittong jala parsidohot tu politik. (Pgk. 17:1) Jadi pos do rohatta, hancur do ujung ni Gareja i dos songon agama palsu na di portibi on!