1, 2. (a) Aha do na ikkon tapatudu sian pangalahotta? (b) Aha do na diulahon sada suru-suruan tikki adong na marsomba tu ibana?

PORLU do taalusi sukkun-sukkun on: Ise do na lao husomba? Godang do halak mandok, holan Debata do na ikkon tasomba. Tutu do alusna i, alai unang ma holan tapatudu sian hata. Ai aha na taulahon boi do patuduhon na tasomba Jahowa manang Sibolis.

² Lomo hian do roha ni Sibolis tasomba ibana. Tarida ma i tikki digoda ibana Jesus. Songon na tabahas di Pasal 1, ditawarhon Sibolis do tu Jesus huaso lao mamaretta sude harajaon na di tano on. Alai aha do na ikkon diulahon Jesus? Didok Sibolis do, ‘Ikkon marsinggang jala marsomba do ho tu au holan sahali pe.’ (Mat. 4:9) Alai asing do anggo suru-suruan na mangalehon parnidaan tu si Johannes. (Jaha Pangungkapon 22:8, 9.) Ai naeng disomba si Johannes do suru-suruan i. Alai serep do rohana, didok suru-suruan i do, “Unang! Unang bahen songon i!” Dang didokkon ibana tu si Johannes, ‘Somba ma au.’ Alai didokkon ibana do, “Somba ma Debata.”

3. (a) Aha do tujuan ni bukku on? (b) Aha do na lao tabahas saonari?

³ Tujuan ni bukku on dibahen lao patoguhon rohatta asa holan Jahowa na tasomba. (5 Mus. 10:20; Mat. 4:10) Saonari tabahas ma muse aha naung taparsiajari taringot ibadat na sittong sian  surirang dohot parnidaan ni si Hesekiel. Tabahas ma sian Bibel taringot ujian na parpudi na lao masa tu akka jolma di ari na naeng ro. Ujian on ma na lao manottuhon ise na boi toktong mangolu jala na boi mangida songon dia ibadat na sittong dipadenggan sahat tu salelengna.

4. Aha do tolu bagian na penting na taboto sian bukku Hesekiel?

⁴ Sian bukku Hesekiel taboto ma adong do na porlu taulahon asa dijalo Debata ibadatta. (1) Holan Jahowa do na ikkon tasomba, (2) ikkon toktong do hita marsada jala ikkon badia do ibadatta, jala (3) tapatudu ma holong tu akka dongan. Taparrohahon ma songon dia surirang dohot parnidaan na di bukku Ibadat na Sittong on paboahon tolu bagian na massai penting on.

5-9. Songon dia do bukku on mangurupi hita mamboto na holan Jahowa ikkon tasomba?

⁵ Pasal 3: Di parnidaan ni si Hesekiel taringot kareta ni Debata, tahta ni Jahowa digombarhon adong di atas ni kerubim. Jala adong pelangi di sakaliling tahtana i. Sian on hita boi marsiajar, holan Debata na marhuaso i do na tama lao tasomba.​—Hes. 1:4, 15-28.

⁶ Pasal 5: Haccit do roha ni Jahowa mangida dang badia be bagas jorona i dibahen naposona. Sian parnidaan on hita boi marsiajar, dang adong na boi ditabunihon sian Jahowa, nang pe jolma na asing dang mangida dosa na taulahon i. Sogo do roha ni Jahowa tu akka jolma na so setia jala na manomba patung. Pasti hukumonna do halak sisongon i.​—Hes. 8:1-18.

⁷ Pasal 7: Nungnga dipaboa si Hesekiel hukuman na lao bahenon ni Debata tu akka bangso na ‘mangaleai’ halak Israel. (Hes. 25:6) On patuduhon, hukumon ni Jahowa do manang ise pe na jahat tu naposona. Asing ni i sian hubungan ni halak Israel tu akka bangso i hita boi marsiajar, manang aha pe na masa ikkon torus do hita setia tu Jahowa. Unang ma gabe talanggar Patik ni Debata ala naeng mambahen las roha ni keluargatta. Unang ma tabahen arta manang hamoraon na uppetting di ngolutta. Torus ma hita netral di urusan politik. Ai taboto do, holan Jahowa do na tama lao tasomba.

⁸ Pasal 13 dohot 14: Parnidaan taringot bagas joro na adong di dolok na timbo patuduhon, ikkon taihutton do standar ni Jahowa na timbo. Jala ikkon taakkui do molo Jahowa, Debata na untimbo sian sude debata.​—Hes. 40:1–48:35.

⁹ Pasal 15: Di surirang ni si Hesekiel, digombarhon do harajaon ni Israel dohot Juda songon boru-boru na so hasea. On paingotton hita, massai sogo do roha ni Jahowa jala magigi do Ibana tu  halak na so setia dohot na manomba debata na asing.​—Hes., bindu 16, 23.

10-14. Aha do na porlu taulahon asa toktong hita marsada jala asa badia ibadatta?

¹⁰ Pasal 8: Di bagasan piga-piga surirang, marjanji do Jahowa lao mamillit “sahalak parmahan” mangurus naposona. On patuduhon Jesus do na mamimpin hita sude. Jadi porlu do hita bekerja sama, marsada, jala mardame dohot na asing.​—Hes. 34:23, 24; 37:24-28.

¹¹ Pasal 9: Disurirangkon si Hesekiel do na lao dipalua naposo ni Debata sian Babel, jala diboan mulak tu luat naung dipadenggan. Godang do parsiajaran na boi tadapot sian surirang i. Ikkon ditinggalhon naposo ni Debata do sude na berkaitan tu agama palsu. Ikkon dipastihon do dao nasida sian ulaon i. Nang pe ro hita sian agama, ekonomi, manang latar belakang na marasing-asing, toktong ma hita marsada. Ai on do na patuduhon molo hita naposo ni Debata.​—Hes. 11:17, 18; 12:24; Joh. 17:20-23.

¹² Pasal 10: Parnidaan taringot holi-holi naung koring na mulak mangolu i patuduhon songon dia naposo ni Debata boi marsada. Massai las do rohatta boi mangulahon ibadat na sittong naung dipadenggan i rap dohot naposo ni Debata, na songon pasukan tentara na massai balga!​—Hes. 37:1-14.

¹³ Pasal 12: Gambaran taringot dua tukkot paboahon surirang taringot naposo ni Debata na marsada. Dipatogu do rohatta mangida akka halak na dimiahi dohot biru-biru na asing marsada saonari on. Nang pe sursar portibi on alani agama dohot politik, alai toktong do hita marsada ala holong do rohatta tu Debata jala setia tu Ibana.​—Hes. 37:15-23.

¹⁴ Pasal 16: Adong do sipasingot na taida sian parnidaan taringot bawa na mamboan inganan ni alat tulis ni sekretaris, dohot onom bawa na mamboan attuk-attuk. Na lao dilehon ma tu hita tanda lao diselamatton, molo toktong taulahon ibadat na sittong sahat tu na ro “hasusaan bolon”.​—Mat. 24:21; Hes. 9:1-11.

15-18. Boasa ikkon tapatudu holong, jala songon dia carana?

¹⁵ Pasal 4: Sian parnidaan taringot opat kerubim i hita boi marsiajar taringot akka sifat ni Jahowa, tarlumobi taringot sifat ni Ibana na umbalga, i ma holong. Tapatudu ma holong sian hata dohot pambahenatta. Molo taulahon i, tapatudu do molo Debata na tasomba, i ma Jahowa.​—Hes. 1:5-14; 1 Joh. 4:8.

¹⁶ Pasal 6 dohot 11: Ala holong ni roha ni Debata tu jolma, dipillit Ibana ma akka panjaga songon si Hesekiel. Ai dang lomo ro hana nanggo sahalak pe mate tikki diparo panguhuman tu pamarettaon ni Sibolis na di tano on. (2 Ptr. 3:9) Saonari pe dilehon do tu hita kesempatan na istimewa lao maniru holong ni Debata. Marsitutu ma hita mangurupi akka panjaga na adong di tikkinta on.​—Hes. 33:1-9.

¹⁷ Pasal 17 dohot 18: Diboto Jahowa do godang halak na so mangargai asi ni rohana, jala na marsitutu pamatehon akka naposona na setia. Alani i, tikki ro “Gog na sian luat Magog” menyerang naposona, belaonna do naposona i, ala holong do rohana tu nasida. Hita pe marsitutu do paboahon barita panguhuman tu godang halak, ala holong rohatta tu nasida.​—Hes. 38:1–39:20; 2 Tes. 1:6, 7.

¹⁸ Pasal 19, 20, dohot 21: Tarida do holong ni Jahowa tu naposona sian parnidaan taringot sunge aek hangoluan, dohot tano dibagi-bagi i. Parnidaan on manggombarhon pasu-pasu na lao dijalo jolma alani tobusan na dilehon Jahowa. Ai tobusan ni Jesus on do bukti na massai holong roha ni Jahowa tu hita. Alani tobusan, disesa ma dosatta, boi ma hita mangolu sempurna haduan, jala gabe bagian keluarga ni Jahowa. Hita pe tapatudu ma na holong rohatta tu sude halak. Tapaboa ma na lao pasauton ni Jahowa janji on tu halak na patuduhon haporseaonna tu tobusan ni Jesus.​—Hes. 45:1-7; 47:1–48:35; Pgk. 21:1-4; 22:17.

19. Aha do na diulahon Jesus saleleng Pamarettaon Saribu Taon? (Ida kotak “Ujian na Parpudi”.)

¹⁹ Saleleng Pamarettaon Saribu Taon, paheheon ni Jesus ma marmilliar halak na mate, jala pamagoonna ma sude na haccit na dibahen ‘musutta, i ma hamatean i’. (1 Kor. 15:26; Mrk. 5:38-42; Ul. 24:15) Saleleng marratus taon, holan na haccit jala na susa do dihilala akka jolma. Alai alani tobusan ni Jesus, dilehon ma kesempatan tu akka halak na dipahehe i makkilala hangoluan na massai denggan. Pamagoon ni Jesus nama sahit, porang, dohot haraparon. Pamagoonna ma na mambahen hita susa, i ma dosa na tawarisi sian si Adam. (Rom 5:18, 19) Diripasson Jesus do sude ulaon ni Sibolis. (1 Joh. 3:8) Dung i aha ma na lao masa?

20. Songon dia do Jesus dohot na 144.000 i patuduhon na massai serep roha ni nasida? (Ida gambar di mula ni parsiajaran.)

²⁰ Jaha 1 Korint 15:24-28. Dung salpu 1.000 taon, sempurna ma sude jolma. Gabe Paradeiso ma sude tano on, sesuai tu lomo ni roha ni Jahowa na parjolo i. Dung salpu 1.000 taon, pasahaton ni Jesus dohot 144.000 i ma Harajaon i tu Jahowa. Massai luar biasa do serep ni roha ni nasida. Rade do nasida mangulahon i, dang alana dipaksa. Dipaulak ma muse huaso na dijalo nasida saleleng 1.000 taon i tu Jahowa. Alai dang na lao mago pasu-pasu na sian Harajaon i, martahan do i sahat tu salelengna.

21, 22. (a) Songon dia do portibi on molo dung marujung Pamarettaon Saribu Taon? (b) Boasa dipalua Jahowa muse Sibolis dohot akka suru-suruan na jahat?

²¹ Dung salpu i, masa ma peristiwa na luar biasa. Peristiwa i patuduhon, massai pos do roha ni Jahowa tu sude jolma. Diparettahon Jahowa ma asa dipalua Sibolis dohot suru-suruanna na jahat sian lombang na massai bagas, inganan ni nasida diratte saleleng 1.000 taon. (Jaha Pangungkapon 20:1-3.) Diida nasida ma situasi ni portibi on dang songon portibi na jahat i be. Ai andorang so Armagedon, massai godang do halak na dililuhon Sibolis. Dibahen nasida do marsogo ni roha akka jolma, asa sursar sude halak na di portibi on. (Pgk. 12:9) Alai dung marujung Pamarettaon Saribu Taon, nungnga marsada be sude halak gabe sada keluarga, manomba Jahowa, jala marsihaholongan. Nungnga gabe Paradeiso na massai dame sude liat portibi on.

²² Attong molo nga dame sude portibi on, boasa pola dipalua Jahowa Sibolis dohot akka suru-suruanna na massai jahat i?  Alana godangan halak na manomba Jahowa di tikki i, dang hea dope mangadopi tantangan na manguji haporseaon ni nasida. Ai godangan sian nasida akka halak na dipahehe do, na so mananda Jahowa hian andorang so mate. Dung dipahehe nasida, dilehon Jahowa do sude na porlu di nasida. Jala boi do nasida marale-ale tu Debata. Akka halak na di sakalilingna pe makkahalongi Jahowa do jala manomba Ibana. Jadi dang adong na mangabbati nasida marale-ale tu Debata. Alani i, boi do ditudu Sibolis nasida molo nasida manomba Jahowa holan ala na dijaga jala dipasu-pasu Debata, dos songon tuduhan na hea dibahen tu si Job. (Job 1:9, 10) Jadi andorang so disurat Jahowa goarta di bukku hangoluan saleleng ni lelengna, dilehon Ibana do tu hita kesempatan lao patuduhon na setia hita tu Ibana. Disi ma tapatudu na Ibana Bapakta jala Debata Natumimbul.​—Pgk. 20:12, 15.

23. Aha do pilihan na dilehon tu ganup halak?

 ²³ Holan saotik do tikki na dilehon tu Sibolis lao mambahen jolma i dang manomba Jahowa be. Ujian aha do na masa tu jolma? Na lao diuji ma hita dos songon si Adam dohot si Hawa najolo. Setiap halak ikkon manottuhon aha sipillitonna. Tatottuhon ma dia sipillitonta, (1) mangihutton standar ni Jahowa, marpihak tu pamarettaonna, jala manomba Ibana do, manang (2) mangalo Debata jala marpihak tu Sibolis.

24. Boasa akka na mangalo di ujung ni Pamarettaon Saribu Taon digoari Gog dohot Magog?

²⁴ Jaha Pangungkapon 20:7-10. Akka halak na mangalo Debata dukkon 1.000 taon i digoari do Gog dohot Magog. Ai sarupa do pangalaho ni nasida songon “Gog na sian luat Magog” na di surirang ni si Hesekiel. (Hes. 38:2) Gog na sian luat Magog on manggombarhon akka bangso na marsada mangalo pamarettaon ni Jahowa. Nasida do na ro menyerang naposo ni Debata di hasusaan bolon i. Dos songon i ma nang akka halak na mangalo di ujung ni 1.000 taon i. Digombarhon do nasida songon “akka bangso”. Adong do na menarik na boi taida sian goar na dilehon tu akka halak na mangalo i. Di Pamarettaon Saribu Taon ni Kristus, dang adong be akka negara. Ai nungnga sada bangso be hita sude,  rakyat pamarettaon ni Harajaon ni Debata. Alani i, tikki dibahen goar ni akka halak na mangalo i Gog dohot Magog manang “akka bangso”, on patuduhon marhasil do Sibolis mambahen sursar godang sian naposo ni Debata. Alai di tikki i, dang adong na lao mamaksa halak lao marpihak tu Sibolis. Sude halak na sempurna i bebas do lao manottuhon pilihanna.

25, 26. Sadia godang do na marpihak tu Sibolis, jala aha do na lao masa tu nasida?

²⁵ Sadia godang do halak na marpihak tu Sibolis? Songon “pasir na di laut” do godang ni nasida. Na gabe unggodang do halak na mangalo di tikki i? Daong. Taingot ma muse janji ni Debata tu si Abraham. Marjanji do Jahowa lao mambahen pinoppar ni si Abraham songon “pasir na di topi ni laut”. (1 Mus. 22:17, 18) Alai, holan 144.001 do pinopparna. (Gal. 3:16, 29) Memang dang na otik pinopparna i, alai molo dibandingkon tu godang ni jolma holan saotik do i. Dos songon i ma nang godang ni halak na marpihak tu Sibolis. Dang otik halak na marpihak tu ibana. Alai dang na gabe unggodang halak na marpihak tu ibana sian na manomba Debata. Jadi tung godang pe halak na marpihak tu Sibolis, dang pola gabe merasa tarancam naposo ni Debata alani nasida.

 ²⁶ Dang pasombuon ni Debata leleng mangolu akka halak na mangalo i. Na lao dipamate ma nasida rap dohot Sibolis dohot akka suru-suruanna na jahat. Dang dilehon be tu nasida kesempatan mulak mangolu muse. Di tikki i, pilihan dohot akibat ni keputusan ni nasida gabe sipasingot na massai penting tu hita.​—Pgk. 20:10.

27-29. Songon dia do na lao masa tu akka halak na marhasil mangalewati ujian na parpudi?

²⁷ Pasti adong do halak na marhasil lewat sian ujian na parpudi i. Goar ni nasida ma na lao disurat di “bukku hangoluan”. (Pgk. 20:15) Marsada ma sude anak ni Jahowa na setia i gabe sada keluarga. Disomba nasida do Jahowa, ai holan Ibana do na tama lao disomba.

²⁸ Bayakkon ma songon dia ngolumuna di ari na naeng ro. Aha na diulahon hamu ganup ari parohon las ni roha. Puas ma dihilala hamu, marlas ni roha ma hamu alani ale-alemuna. Dang dihilala hamu be na susa, songon i nang keluargamuna. Dang porlu be di hamu tobusan ni Jesus asa boi marale-ale tu Jahowa. Sude halak boi marale-ale tu Debata, dang adong na mangabbati. Jala na uppetting, sude toppaan ni Debata na di surgo dohot na di tano on mangulahon ibadat na sittong naung dipadenggan i saleleng ni lelengna!

²⁹ Dohot do hamu annon disi? Pasti boi do hamu dohot disi molo torus diulahon hamu tolu bagian na penting na dipaboa  si Hesekiel i. (1) Holan Jahowa ma somba hamu, (2) toktong ma hamu marsada jala badia ibadatmuna, (3) torus ma patudu hamu holong tu akka halak. Adong dope sada nai parsiajaran na boi taida sian surirang ni si Hesekiel. Aha ma i?

30, 31. Aha do na dipatudu hata “botoon ni nasida ma na Au do Jahowa” (a) tu musu ni Debata? (b) tu naposo ni Debata?

³⁰ Mulak-hulak do hata “botoon ni nasida ma na Au do Jahowa” disurat di bukku Hesekiel. (Hes. 6:10; 39:28) Molo tu akka musu ni Debata, hata on patuduhon na lao hona hukum do nasida sude bahenon ni Jahowa jala pamateonna. Tarpaksa ma ikkon diakkui nasida na tutu adong Jahowa. Alai dang holan i, botoon ni nasida ma lapatan ni goar ni Jahowa na sangap i, “Ibana do na Mambahen, Ibana Pasautton”. “Jahowa Pamimpin ni Akka Tentara” do alo ni nasida, Ibana do “Tentara na gogo” lao marporang mangalo nasida. (1 Sam. 17:45; 2 Mus. 15:3) Di tikki i pe diboto nasida na so adong na boi mangabbati Jahowa pasautton lomo ni rohana. Alai nungnga tarlambat be i diboto nasida.

³¹ Hata “botoon ni nasida ma na Au do Jahowa” paposson roha ni naposo ni Debata. Ai sian i gabe diboto ma na lao dame ngolu ni nasida. Bahenon ni Debata ma hita gabe anakna jala boi maniru sifatna na sempurna. Ai on do lomo ni rohana sian mulana. (1 Mus. 1:26) Saonari nungnga dipatudu Jahowa tu hita songon dia Ibana gabe Ama parholong, jala Parmahan na burju mangurus hita. Satokkin nai Ibana nama na gabe Rajatta, jala dang tartaluhon ni manang ise Ibana. Alai andorang so masa i, taulahon ma sipasingot na dipaboa si Hesekiel. Ganup ari, tapatudu ma sian hata dohot pambahenatta na tatanda ise Jahowa, jala na taboto Debata na songon dia Ibana. Molo taulahon i, dang mabiar be hita tu kehancuran na masa saleleng hasusaan bolon. ‘Barani’ ma hita, ai nungnga taboto ‘jonok haluaon’ i. (Luk. 21:28) Jala andorang so masa i, taurupi ma godang halak didia pe nasida lao mananda jala makkaholongi Jahowa, Debata na sangap i. Ai holan Jahowa do Debata na tama lao disomba!​—Hes. 28:26.