1-3. (a) Aha do akibatna molo ‘marsigorgor rimas’ ni Jahowa? (Ida gambar di mula ni parsiajaran.) (b) Aha do na lao tabahas di pasal on?

BAYAKKON ma adong piga-piga bawa jongjong rap marpungu dohot borua, dakdanak, huhut mangendehon ende Harajaon. Dung i martangiang ma sahalak sintua tu Jahowa. Dipangido ibana ma asa dijaga Jahowa nasida. Pos do roha ni halak na di huria i, na lao dijaga Jahowa nasida. Alai porlu dope nasida diurupi asa lam porsea. Di luar ni inganan i, tarbege do soara ni akka halak na marporang. Nungnga mulai be Armagedon!​—Pgk. 16:14, 16.

² Dipamate Jahowa ma akka jolma saleleng porang Armagedon i. Alai nang pe ‘marsigorgor rimasna’, boi do dibedahon Ibana ise na lao dipamate. (Jaha Hesekiel 38:18.) Dang holan tu sada pasukan tentara, manang holan tu sada bangso diusehon Jahowa rimasna i. Alai di ari i, “marpeakan ma di atas ni tano on, sian ujung sahat tu ujung ni tano on” akka halak na dipamate Jahowa. (Jer. 25:29, 33) Jadi dang taretong godang ni halak na dipamate di liat portibi on.

³ Boasa ‘marsigorgor rimas ni Jahowa’, hape Debata parholong do Ibana, “burju”, “parasi roha”, jala “lambat tarrimas”? (2 Mus.  34:6; 1 Joh. 4:16) Tabahas ma sukkun-sukkun i. Alusna boi mambahen hita gabe lam marpos ni roha, lam barani, jala tamba semangat lao marbarita.

4, 5. Aha do beda ni Jahowa dohot jolma tikki muruk?

⁴ Porlu do taboto, dang songon halak na so sempurna Jahowa tikki muruk. Anggo jolma, molo muruk situtu ibana, dang boi dikendalihon emosina. Biasana gabe parohon na roa do. Umpamana, “muruk situtu” do si Kain, anak siakkangan ni si Adam ala dang dijalo Jahowa peleanna. Hape pelean ni si Abel dijalo do. Ujungna dipamate si Kain ma adekna, nang pe so marsala ibana. (1 Mus. 4:3-8; Heb. 11:4) Contoh na asing, si Daud. Didok do ibana halak na mangulahon lomo ni roha ni Jahowa. (Ul. 13:22) Nang pe ibana didok halak na burju, alai hea do hampir diulahon ibana dosa na balga. Di tikki i, si Nabal sahalak bawa na mora, jala na bidang tanona mangaleai ibana dohot tentarana. Alani murukna, “diikkat” si Daud dohot akka tentarana ma podang ni nasida. Naeng dipamate ma si Nabal dohot sude bawa na adong di jabuna. Uttung ma marhasil si Abigail istri ni si Nabal mangabbati si Daud dohot akka tentarana. (1 Sam. 25:9-14, 32, 33) Alani i ma marhite si Jakobus didok Jahowa songon on, “Ai halak na tarrimas dang diulahon i na sittong di jolo ni Debata.”​—Jak. 1:20.

⁵ Alai dang songon jolma Jahowa. Nang pe muruk situtu Debata, torus do boi dikendalihon Ibana emosina jala takkas do aha alasanna muruk. Bahkan tikki dialo Ibana pe musuna dang hea dipamate Ibana “halak na sittong rap dohot halak na jahat”. Adil do Ibana. (1 Mus. 18:22-25) Molo muruk pe Jahowa, toktong do sittong alasanna mangulahon i. Taida ma adong dua alasanna jala parsiajaranna tu hita.

6. Aha do na diulahon Jahowa molo adong na mangaleai goarna?

⁶ Alasanna: Dileai goar ni Jahowa. Godang do halak mangakku molo nasida wakil ni Debata, alai marlea do dibahen nasida goar ni Jahowa alani pangalaho ni nasida na jahat. Jadi pantas do molo muruk Jahowa tu nasida. (Hes. 36:23) Songon naung tabahas di pasal sebelumna, pangalaho ni halak Israel mambahen goar ni Jahowa dileai godang halak. Jadi pantas do gabe muruk Jahowa tu nasida. Alai dang hea gabe dang terkendali emosina. Dibahen Jahowa do hukuman na patut dijalo nasida. (Jer. 30:11) Jala molo dung dihukum Ibana akka na marsala, dang sogo be rohana tu nasida.​—Ps. 103:9.

7, 8. Aha do parsiajaran na boi tadapot sian na dibahen Jahowa tu halak Israel?

⁷ Parsiajaranna: Aha na dibahen Jahowa tu halak Israel gabe sada sipasingot na massai penting tu hita. Ai songon halak Israel, dipillit Debata do hita lao mamakke goarna. Didok do hita Saksi Jahowa. (Jes. 43:10) Jadi hata dohot pangalahotta berpengaruh  do i tu pandangan ni halak taringot Debata na tasomba. Unang ma sengaja hita mangulahon dosa asa unang marlea goar ni Jahowa. Pasti muruk do Debata molo gabe halak na munafik hita. Dang soal sadia leleng nai, pasti adong do bahenonna lao paulakkon goarna na sangap i.​—Heb. 3:13, 15; 2 Ptr. 2:1, 2.

⁸ Tikki dipaboa tu hita na boi marsigorgor rimas ni Jahowa, gabe mabiar do hita jonok tu Ibana? Daong. Taboto do sabar Ibana jala rade manalpuhon hasalaan. (Jes. 55:7; Rom 2:4) Alai dilehon Ibana do sipasingot molo taulahon na sala. Molo torus sasahalak mangulahon dosa, dang olo muba, pasti muruk do Jahowa jala dang pasombuonna halak sisongon i torus adong di tonga-tonga ni naposona. On pasti mambahen lam holong rohatta tu Jahowa. (1 Kor. 5:11-13) Takkas do muse dipaboa Jahowa tu hita akka aha na boi mambahen Ibana gabe muruk. Alani i, marsitutu ma hita manjaga pangalahotta asa unang tabahen Debata muruk.​—Joh. 3:36; Rom 1:26-32; Jak. 4:8.

9, 10. Aha do na diulahon Jahowa molo tarancam ngolu ni naposona na setia? Paboa ma sada contoh.

⁹ Alasanna: Molo tarancam naposo ni Debata na setia. Muruk do Jahowa molo adong musu na menyerang naposona na setia. Umpamana, dung kaluar halak Israel sian Mesir, ro do si Firaun dohot tentarana na gogo mangalele halak Israel i tu Laut Merah. Dirippu nasida do dang margogo halak Israel i jala dang boi lari be manang tudia. Tikki ro tentara ni si Firaun mangalele halak Israel tu tonga-tonga ni laut naung koring i, dibahen Jahowa ma malua roda ni kareta porang ni nasida, jala gabe maup ma nasida di laut i. “Dang adong nanggo sada pe na dipasombu mangolu.” (2 Mus. 14:25-28) Alani holongna tu naposona, marsigorgor do rimas ni Jahowa tu halak Mesir.​—Jaha 2 Musa 15:9-​13.

¹⁰ Alani holong ni Jahowa, diurupi Ibana do muse naposona di tikki ni Raja Hiskia. Ro do tentara ni Asiria na massai gogo jala kejam mangepung kota Jerusalem. Susa do ditaon naposona molo torus nasida dikepung, jala boi do gabe mate. (2 Raj. 18:27) Alani i, disuru Jahowa ma sada suru-suruanna. Alai holan na sada i pe disuru, boi do dipamate 185.000 tentara ni musu di bagasan saborngin. (2 Raj. 19:34, 35) Boi ma tabayakkon songon dia ngeri ni perkemahan ni halak Asiria manogotna i. Marpeakan ma akka bakke disi. Dang adong tarbege soara ni tarompet lao mandungoi tentara i paboahon na ro serangan. Tombak, perisai, dohot podang ni nasida pe dang adong meret sian ingananna.

11. Boasa cara ni Jahowa manjaga naposona mambahen hita lam marpos ni roha jala lam barani?

¹¹ Parsiajaranna: Cara ni Jahowa manjaga akka naposona na tarancam i gabe sipasingot do tu akka musu. “Marjea do halak na madabu tu panguhuman ni Debata na mangolu i” tikki marsigorgor murukna. (Heb. 10:31) Alai anggo di hita, cara ni Jahowa i gabe mambahen hita lam marpos ni roha jala gabe lam barani. Pos  do rohatta, manang aha pe na dibahen Sibolis mangancam hita pasti gagal do, jala satokkin nai lao marujung nama pamarettaon ni Sibolis. (Pgk. 12:12) Andorang so masa i, toktong ma hita barani manomba Jahowa. Ai pos do rohatta dang adong manang ise pe, organisasi, manang pamaretta na boi mangabbati hita mangulahon lomo ni roha ni Jahowa. (Jaha Psalmen 118:6-9.) Sarupa do pos ni rohatta songon Apostel Paulus. Disurat ibana do, “Molo Debata do donganta, ise ma na boi mangalo hita?”​—Rom 8:31.

12. Aha do na mambahen Jahowa muruk saleleng hasusaan bolon?

¹² Pasti jagaon ni Jahowa do hita saleleng masa hasusaan bolon i. Jagaonna do hita dos songon carana manjaga halak Israel na dilele tentara Mesir, jala tikki dikepung halak Asiria halak Jahudi na di Jerusalem. Tikki marsitutu annon musu pamatehon hita, pasti muruk do Jahowa ala massai holong do rohana tu hita. Ulaon ni halak na oto do na dibahen musu i molo barani nasida menyerang hita. Ai dos songon na manjama anak ni mata ni Jahowa do nasida disi. Pasti hatop do urupanna hita. (Sak. 2:8, 9)  Satokkin nai pamateon ni Debata ma godang halak. Alai dang pola tarsonggot musu tikki marsigorgor rimas ni Jahowa tu nasida. Boasa?

13. Aha do sipasingot na dilehon Jahowa?

¹³ “Lambat tarrimas” do Jahowa. Mulak-hulak do dilehon Debata sipasingot andorang so dipamate halak na mangalo Ibana jala na mangancam naposona. (2 Mus. 34:6, 7) Dipakke Jahowa do si Jeremia, si Hesekiel, dohot si Daniel, songon i nang Jesus Kristus dohot akka apostel songon si Petrus, si Paulus, dohot si Johannes lao mangalehon sipasingot na lao dihancurhon sude musuna marhite sada porang na massai balga.​—Ida kotak “Sipasingot taringot Porang na Massai Balga”.

14, 15. Aha do naung diulahon Jahowa, jala boasa?

¹⁴ Dibahen Jahowa do asa disurat akka sipasingot i di Bibel. Dipastihon Ibana do asa Bibel on bukku na unggodang diterjemahon jala boi sahat tu godang halak. Dibahen Jahowa do naposona  na songon pasukan tentara na massai balga di liat portibi on rade mangurupi akka halak marale-ale dohot Ibana. Rade do nasida paboahon sipasingot naung jonok ‘ari ni Jahowa na balga i’. (Sep. 1:14; Ps. 2:10-12; 110:3) Diurupi Ibana do naposona asa manerjemahon Bibel tu marratus bahasa. Ganup taon dipakke naposona do marmilliar jam lao paboahon janji ni Debata dohot sipasingot na sian Bibel.

¹⁵ Diatur Jahowa do asa boi diulahon sude ulaon i. Ai “dang lomo rohana diripasson manang ise pe” alai lomo do rohana asa sude jolma marhamubaon. (2 Ptr. 3:9) Tugas na istimewa do boi gabe wakil ni Debata na sabar, parholong, jala boi parsidohot paboahon barita na sian Ibana! Satokkin nai habis nama tikki na dilehon tu akka halak na so mangulahon sipasingot na sian Debata.

16, 17. Sian dia do diboto Jahowa andigan tikki ni musu menyerang naposona?

¹⁶ Nungnga ditottuhon Jahowa andigan masa porang na massai balga i. Nungnga diboto Ibana andigan musu i menyerang naposona. (Mat. 24:36) Sian dia do diboto Jahowa?

 ¹⁷ Songon na tabahas di Pasal 17, didok Jahowa do tu Gog, “Bahenokku ma hait-hait tu osang-osangmuna.” Bahenon ni Jahowa do cara asa taronjar roha ni akka bangso menyerang naposona. Serangan i ma na mambahen masa porang na massai balga. (Hes. 38:4) Alai dang na gabe Jahowa mamukka parporangan i manang na mamaksa musuna mangulahon lomo ni rohana. Alai sian on taboto ma, boi do dijaha Jahowa roha ni musuna jala diboto do na jahat roha ni nasida. Diboto Jahowa do, molo adong kesempatan diida musuna i, pasti diserang nasida do naposo ni Debata.​—Ps. 94:11; Jes. 46:9, 10; Jer. 17:10.

18. Boasa barani jolma i mangalo Debata na marhuaso?

¹⁸ Molo dang Jahowa na mambahen mulai porang i manang na mamaksa musuna lao marporang, boasa barani jolma i mangalo Debata na marhuaso? Di tikki i, nungnga marhasil akka bangso manghancurhon agama palsu. Jadi olo do ro tu pikkiran ni nasida, na so adong Debata manang dang parduli be Debata mangida na masa tu jolma. Didok roha ni nasida, molo tutu do adong Debata, pasti belaonna do akka organisasi na mangakku manomba  Ibana. Jadi dang na lao botoon ni nasida molo sasittongna Jahowa do na mambahen asa taronjar roha ni nasida manghancurhon agama na mangaleai goarna.​—Pgk. 17:16, 17.

19. Aha do na lao masa molo dung hancur agama palsu?

¹⁹ Dung dihancurhon agama palsu, mungkin suruon ni Jahowa do naposona paboahon barita panguhuman. Di bukku Pangungkapon, barita i dipatudos songon udan es. Borat ni sada es na didok disi hira-hira 20 kilogram. (Pgk. 16:21) Mungkin isi ni barita i, paboahon taringot na lao dihancurhon ma dunia politik dohot dunia perdagangan. Sogo do roha ni akka musu mambege barita panguhuman i. Alani i, gabe dileai nasida ma Debata. Mungkin barita i ma na mambahen akka bangso naeng pamatehon sude naposo ni Debata. Didok roha ni nasida mura do pamatehon hita sude, ai diida gale do hita jala dang adong na olo mangurupi. Alai sala do nasida!

20, 21. Ise do Gog, jala aha do na lao masa tu ibana?

²⁰ Songon na tabahas di Pasal 17, dipaboa si Hesekiel do surirang taringot “Gog na sian luat Magog”, i ma gabungan ni akka bangso na marsada lao menyerang naposo ni Debata. (Hes. 38:2) Nang pe marsada akka bangso i, alai dos songon sada bonang do nasida sude na mura diputusson. Memang idaon do nasida songon na kerja sama, alai sasittongna marsaing do nasida. Bangsona sandiri do na dipikkirhon nasida. Jadi mura do di Jahowa mambahen bangso na sada marbada dohot bangso na asing. (Hes. 38:21) Alai, takkas do botoon ni akka bangso i haduan Jahowa sandiri na mambahen nasida hancur.

²¹ Andorang so dihancurhon akka bangso i, idaon ni nasida ma “tanda ni Anak ni jolma i”. (Mat. 24:30) On mungkin sada peristiwa na luar biasa lao patuduhon huaso ni Jahowa dohot Jesus. Pasti mabiar do musu mangida akka na masa i. Ai nungnga didok Jesus hian, “Pingsan ma akka halak alani biarna paima-imahon na lao masa tu portibi on.” (Luk. 21:25-27) Di tikki i, botoon ni nasida ma dang serangon ni nasida hian naposo ni Jahowa. Dang boi be dohononna manang aha. Sadar ma nasida molo komandan ni parporangan i, i ma Debata Sitoppa saluhutna, Jahowa Pamimpin ni Akka Tentara. (Ps. 46:6-11; Hes. 38:23) Pasti pakkeon ni Jahowa do sude tentarana na di surgo, dohot kekuatan ni alam lao manjaga naposona na setia sekaligus lao pamatehon musuna.​—Jaha 2 Petrus 2:9.

22, 23. Ise do na lao manjaga naposo ni Debata, jala songon dia do pakkilalaan ni nasida mandapot tugas sisongon i?

²² Bayakkon ma songon dia las ni roha ni Jesus mamimpin parporangan mangalo musu ni Debata dohot manjaga akka halak na setia na manomba Bapakna i. Bayakkon ma muse perasaan ni halak na dimiahi. Andorang so Armagedon, dipahehe do sude halak na dimiahi na adong di tano on dope tu surgo asa pungu sude na 144.000 i marporang rap dohot Jesus. (Pgk. 17:12-14) Saleleng ari parpudi, godang do sian  halak na dimiahi rap karejo jala marale-ale dohot halak na sian biru-biru na asing. Alani i, di Armagedon pakkeon ni halak na dimiahi ma huaso na dilehon i lao mambela akka halak naung hea mangurupi nasida di tikki susa.​—Mat. 25:31-40.

²³ Termasuk do akka suru-suruan pasukan ni Jesus na di surgo i. (2 Tes. 1:7; Pgk. 19:14) Nungnga diurupi suru-suruan i Jesus mangusir Sibolis dohot suru-suruanna sian surgo. (Pgk. 12:7-9) Dohot do muse nasida papunguhon akka halak na olo manomba Jahowa. (Pgk. 14:6, 7) Jadi cocok do molo dipakke Jahowa akka suru-suruan i di ari na naeng ro lao manjaga akka naposona na setia! Na uppetting muse, pasti las situtu do roha ni sude pasukan tentara na di surgo i boi dohot pabadiahon goar ni Jahowa marhite pamatehon sude akka musuna.​—Mat. 6:9, 10.

24. Aha do na diulahon punguan bolon na sian biru-biru na asing i saleleng masa Armagedon?

²⁴ Massai gogo do pasukan tentara ni Jahowa jala las situtu do roha ni nasida manjaga naposo ni Debata. Alani i, dang porlu mabiar punguan bolon na sian biru-biru na asing i saleleng masa porang Armagedon. Alai jongjong do annon punguan bolon i, ‘pos do roha ni nasida jala barani’. Ai ‘nungnga jonok haluaon ni nasida’. (Luk. 21:28) Jadi sebelum ro ari ni Jahowa, massai penting do taurupi halak sagodang ni godangna lao mananda jala makkaholongi Bapakta parasi roha na torus rade manjaga hita!​—Jaha Sepania 2:2, 3.

25. Aha do na lao tabahas di pasal na mangihut?

²⁵ Biasana molo dung sae porang di tano on, godang do halak na susa jala gabe gaor. Alai porang Armagedon i, parohon hadameon dohot las ni roha do. Aha do na masa molo dung sae Jahowa muruk, dang marporang be pasukan tentarana i, jala molo dang tarbege be soara ni na marporang? Lao tabahas ma di pasal na mangihut akka aha na lao masa di ari na naeng ro.