1, 2. Aha do porang na balga na lao masa, jala aha do sukkun-sukkun na porlu taboto alusna? (Ida gambar di mula ni parsiajaran.)

SALELENG marribu taon, nungnga massai godang halak na mate alani porang. Umpamana di abad 20, masa do dua porang na balga na mambahen godang halak mate. Alai na lao masa do muse satokkin nai porang na umbalga na so hea dope masa. On dang porang ni jolma manang porang ni bangso mangalo bangso lao mangalului uttung tu diri sandiri. Alai on ma porang “di ari na balga, i ma ari ni Debata Pargogo na So Hatudosan i”. (Pgk. 16:14) Lao diserang musu ma luat na massai arga di Jahowa jala serangan on ma na mambahen masa porang i. Dipakke Jahowa Tuan Natumimbul i ma huasona na massai balga manghancurhon nasida. Dang hea dope masa sisongon i di tano on.

² Ise do musu i? Luat na dia do na lao diserang? Andigan, boasa, jala songon dia do musu menyerang luat i? Porlu do taboto alusna, ala terlibat do hita tu na masa i. Terlibat do sude naposo ni Jahowa na mangulahon ibadat na sittong di tano on. Tabahas ma sada surirang na di Hesekiel bindu 38 dohot 39.

3. Ceritahon ma songon dia surirang ni si Hesekiel paboahon taringot Gog na sian Magog.

 ³ Jaha Hesekiel 38:1, 2, 8, 18; 39:4, 11. Hira songon on ma isi  ni surirang i: “Di ujung ni akka taon i”, ro ma musu na digoari “Gog na sian . . . Magog” menyerang “luat” ni naposo ni Debata. Gabe ‘marsigorgor ma rimas ni Jahowa’ alani serangan i, ujungna ro ma Ibana manaluhon Gog. * Dibahen Jahowa ma sude musuna dohot sude na marpihak tu nasida gabe “siallangon ni sude ragam ni pidong siallang bakke” dohot “binatang buas”. Jala ujungna dilehon Jahowa ma “kuburan” tu Gog. Songon dia do surirang on saut di ari na naeng ro? Parjolo, taida ma jo ise Gog i.

4. Aha do na boi taboto taringot Gog na sian Magog?

⁴ Ise do Gog na sian Magog? Sian na disurat si Hesekiel boi ma taboto molo Gog, i ma musu ni halak na mangulahon ibadat na sittong. Taboto do, Sibolis do musu na umbalga tu ibadat na sittong. Alai ibana do Gog i? Saleleng marpulu taon, memang songon i ma na dipaboa di publikasitta. Alai dung bagas diparsiajari surirang ni si Hesekiel, adong dope pangattusion na porlu tasesuaihon. Di Menara Pengawal dipaboa, molo Gog na sian Magog dang musu na so boi taida. Alai Gog, i ma gabungan ni akka bangso na mangalo ibadat na sittong. * Boasa tadok songon i? Sebelum tabahas alusna, taida ma dua hatorangan sian surirang ni si Hesekiel na patuduhon molo Gog i dang suru-suruan manang musu na so boi taida.

5, 6. Songon dia do surirang ni si Hesekiel patuduhon molo Gog na sian Magog dang musu na so boi taida?

⁵ “Bahenokku ma ho gabe siallangon ni sude ragam ni pidong siallang bakke.” (Hes. 39:4) Jotjot do dipakke di Bibel, pidong siallang bakke lao patuduhon sipasingot taringot panguhuman na sian Debata. Dilehon Jahowa do sipasingot sisongon i tu bangso Israel dohot tu bangso na asing. (5 Mus. 28:26; Jer. 7:33; Hes. 29:3, 5) Alai dang hea sipasingot sisongon i dilehon tu akka suru-suruan, tu jolma do. Asing ni i, pidong siallang bakke dohot binatang buas i, jagal do diallang. Hape so adong mudar dohot sibuk ni suru-suruan. Jadi sipasingot na disurirang ni si Hesekiel patuduhon molo Gog i dang suru-suruan.

⁶ “Lehonokku ma kuburan tu Gog di Israel.” (Hes. 39:11) Dang adong hea didok di Bibel adong suru-suruan na dikubur di tano on. Alai adong do dipaboa na lao dipamasuk Sibolis dohot akka suru-suruanna tu lobbang na massai bagas saleleng 1.000 taon. Lao disappatton ma nasida tu laut api manang dipamate saleleng ni lelengna. (Luk. 8:31; Pgk. 20:1-3, 10) Ala dilehon do “kuburan” tu Gog i di tano on, boi ma tasimpulhon molo ibana dang suru-suruan.

7, 8. Dos songon na masa tu Gog na sian Magog, andigan do “Raja Utara” dihancurhon?

⁷ Molo dang suru-suruan ibana, ise do Gog na sian Magog musu na mambahen serangan na parpudi tu akka halak na mangulahon ibadat na sittong? Taparrohahon ma dua surirang na mangurupi hita mamboto alusna.

 ⁸ ”Raja Utara.” (Jaha Daniel 11:40-45.) Disurirangkon si Daniel do akka ise na marhuaso di portibi on mulai sian tikkina sahat tu tikkinta on. Dipaboa do muse adong dua kelompok politik na torus marsaing, i ma “Raja Selatan” dohot “Raja Utara”. Torus do margatti-gatti na manggombarhon akka raja on. Ai marporang do akka bangso asa gabe na unjago di portibi on. Tikki dipaboa si Daniel serangan na parpudi na dibahen raja utara “di tikki ari parpudi”, didok ibana do, “Alani murukna, gabe lao ma ibana pamatehon godang halak.” Naposo ni Jahowa do target utama ni raja utara i. * Alai songon Gog na sian Magog, na lao “dihancurhon” ma raja utara i dung gagal ibana menyerang naposo ni Debata.

9. Aha do persamaan ni Gog na sian Magog tu akka raja na di tano on?

⁹ “Akka raja na di tano on.” (Jaha Pangungkapon 16:14, 16; 17:14; 19:19, 20.) Disurirangkon do di bukku Pangungkapon na lao diserang “akka raja na di tano on” do “Raja ni akka raja”, i ma Jesus Raja na di surgo i. Alai ala dang boi nasida menyerang Harajaonna na di surgo i, diserang nasida ma akka halak na di tano on na marpihak tu Harajaon i. Alai na lao ditaluhon do akka raja i di porang Armagedon. Dos songon Gog na sian Magog, na lao dihancurhon do nasida molo dung diserang naposo ni Jahowa. *

10. Aha do na boi tasimpulhon sian Gog na sian Magog?

¹⁰ Aha do na boi tasimpulhon taringot Gog? Na parjolo, ibana dang suru-suruan. Na paduahon, Gog i manggombarhon akka bangso na di tano on na menyerang naposo ni Debata satokkin nai. Marsada do akka bangso i lao menyerang nasida. Boasa? Ala nungnga rarat naposo ni Debata di liat portibi on, jadi ikkon kerja sama do sude bangso mangalului cara menyerang nasida. (Mat. 24:9) Nang pe akka bangso na mangulahon i, alai sasittongna Sibolis do na mambahen rencana jala na mangatur i sude. Mulai sian najolo do disegai ibana pikkiran ni sude halak asa mangalo ibadat na sittong. (1 Joh. 5:19; Pgk. 12:17) Alai na uppetting na dipaboa di bukku Hesekiel taringot Gog na sian Magog, i ma aha na diulahon akka bangso na di tano on tikki menyerang naposo ni Jahowa. *

11. Aha do na dipaboa surirang ni si Hesekiel taringot “luat” na lao diserang Gog?

¹¹ Songon na tabahas di  paragraf 3, Gog na sian Magog do na mambahen muruk Jahowa. Ai diserang ibana do luat na massai arga di Debata. Luat na songon dia do maksudna? Taida ma muse surirang ni si Hesekiel. (Jaha Hesekiel 38:8-12.) Didok do disi, na lao ro ma Gog mangalo “sada luat appuna ni akka halak naung mulak” jala ‘naung dipapungu sian akka bangso’. Didok do muse di surirang i, “dame” do tinggal akka penduduk na mulak tu luat i. “Tinggal do nasida sude di akka huta na so martembok, marpalang, manang margerbang”, jala “papunguhon arta dohot hamoraon” do nasida. Hira na tinggal di luat sisongon i do sude naposo ni Jahowa na di liat portibi on. Sian dia boi taboto?

12. Aha do na dipadenggan di luat ni halak Israel najolo?

 ¹² Na parjolo, tabahas ma luat ni halak Israel najolo naung dipadenggan i. Disi do naposo ni Jahowa tinggal, karejo, jala manomba Debata saleleng marratus taon. Dung mangalo halak Israel, dipaboa Debata ma marhite si Hesekiel na lao dihancurhon luat i jala dipasombu tarulang. (Hes. 33:27-29) Alai dipaboa Jahowa do muse, na lao adong dope na mangolu sian bangso i jala olo mambahen hamubaon. Na lao mulak ma nasida sian Babel jala dipadenggan ma ibadat na sittong di luat i. Dipasu-pasu Jahowa ma muse luat ni halak Israel jala gabe subur “songon Taman Eden”. (Hes. 36:34-36) Mulai ma dipadenggan luat i taon 537 SM, tikki mulak halak Jahudi na ditawan i tu Jerusalem jala dipadenggan ma ibadat na sittong disi.

13, 14. (a) Tu luat na songon dia do diboan Jahowa naposona taon 1919? (b) Boasa massai arga luat i di Jahowa?

¹³ Di tikkinta on, dipadenggan Jahowa do situasi ni naposo ni Debata na mangulahon ibadat na sittong. Songon na tabahas di Pasal 9, dung leleng naposo ni Debata ditawan Babel na Balga, dipalua ma nasida taon 1919. Di taon i, diboan Jahowa ma naposona tu sada luat. Luat na didok dison, i ma situasi na aman jala na mambahen halak boi marale-ale dohot Debata. Situasi on ma na dihilala sude naposona ala disomba nasida Debata na sittong. Dang adong na mambahen hita mabiar. Dame do roha nang pikkiranta. (Poda 1:33) Dilehon do tu hita godang situtu sipanganon na mambahen lam togu parale-aleotta tu Jahowa. Dilehon do tugas na mambahen las roha, paboahon barita Harajaon ni Debata.  Tutu ma hata na mandok, “Pasu-pasu ni Jahowa do na mambahen halak mamora, jala dang mardongan na haccit i dibahen Ibana.” (Poda 10:22) Dang soal didia inganatta, boi do hita toktong tinggal di luat na dilehon Debata, i ma situasi na dame jala na aman i, asal ma tapatudu sian hata dohot pangalahotta na taulahon ibadat na sittong.

¹⁴ Massai arga do luat on di Jahowa. Boasa? Alana di Jahowa, dos songon ‘arta na arga’ na diboan sian sude bangso do penduduk ni luat i. Nasida do akka halak na ditarik Jahowa lao mangulahon ibadat na sittong. (Hag. 2:7; Joh. 6:44) Marsitutu do nasida mambahen hamubaon asa boi maniru akka sifat ni Debata na massai denggan. (Eps. 4:23, 24; 5:1, 2) Dibahen nasida do sian nasa tolapna lao manomba Debata. Ai dihaholongi nasida do Jahowa jala dipasangap do Ibana. (Rom 12:1, 2; 1 Joh. 5:3) Boi do tabayakkon songon dia las ni roha ni Jahowa tikki diida Ibana nasida marsitutu mambahen luat i lam uli. Ingot ma on: Molo tabahen ibadat na sittong i uppetting di ngolutta, boi ma hita torus marale-ale tu Debata dohot tu sude naposona di liat portibi on. Alai dang holan i, molo taulahon i tabahen ma las roha ni Jahowa!​—Poda 27:11.

15, 16. Andigan do Gog na sian Magog menyerang luat na dilehon Debata naung dipadenggan i?

¹⁵ Nungnga taboto be na lao marsada satokkin nai sude bangso menyerang luat na arga na dilehon Jahowa tu naposona. Lao diserang ma naposo ni Jahowa na mangulahon ibadat na sittong  songon naung disurirangkon i. Jadi porlu do godang taparsiajari taringot on. Parrohahon ma tolu sukkun-sukkun.

¹⁶ Andigan do Gog na sian Magog menyerang luat na dilehon Debata naung dipadenggan i? Didok di surirang ni si Hesekiel, “Di ujung ni akka taon i lao ma ho mangalo sada luat.” (Hes. 38:8) Sian on taboto ma, na lao diserang ma hita dang leleng andorang so dihancurhon portibi on. Taingot ma, hasusaan bolon dimulai dung dihancurhon do Babel na Balga, sude agama palsu na di portibi on. Dung dihancurhon i, jala dang leleng andorang so masa Armagedon, dibahen Gog ma seranganna na parpudi tu naposo ni Debata. Sude cara do dipakke lao pamatehon halak na mangulahon ibadat na sittong.

17, 18. Songon dia do Jahowa mangatur akka na masa saleleng hasusaan bolon?

¹⁷ Boasa diserang Gog luat ni naposo ni Jahowa naung dipadenggan i? Sian surirang ni si Hesekiel i adong dua alasanna. Na parjolo, parsidohot do Jahowa mambahen na masa i. Na paduahon, jahat do roha ni Gog tu naposo ni Debata.

¹⁸ Parsidohot do Jahowa mambahen na masa i. (Jaha Hesekiel 38:4, 16.) Didok Jahowa do tu Gog, “Bahenokku ma . . . hait-hait tu osang-osangmuna” jala “boanokku ma ho lao mangalo luat  appunakki”. Ai na Jahowa do mamaksa akka bangso menyerang naposona? Daong! Tung na so hea do dibahen Debata susa naposona. (Job 34:12) Alai diboto Jahowa do takkas aha na dipikkirhon musuna. Massai sogo do roha ni nasida mangida halak na mangulahon ibadat na sittong. Molo diida nasida adong kesempatan lao menyerang, pasti pakkeon ni nasida do i lao pamatehon sude naposo ni Debata. (1 Joh. 3:13) Alani i, pasangon ni Jahowa ma hait-hait tu osang-osang ni Gog. Jahowa ma na mangatur situasi na lao masa i asa sesuai tu lomo ni rohana dohot tu jadwalna. Di tikki naung ditottuhon, dung dihancurhon Babel na Balga i, bahenon ni Jahowa ma sada cara na mangonjar roha ni akka bangso mangulahon roha ni nasida na jahat i. Ujungna, dibahen nasida ma serangan na parpudi na mambahen masa porang Armagedon, porang na balga na so hea masa di tano on. Dung i, diselamatton Jahowa ma naposona. Dipatudu ma annon na marhak Ibana mamaretta jala dipasangap Ibana ma goarna na badia i.​—Hes. 38:23.

19. Boasa naeng dirampas Gog ibadat na sittong?

¹⁹ Jahat do roha ni Gog tu naposo ni Debata. Mulai sian najolo, massai sogo do roha ni Gog mangida halak na manomba Jahowa.  Alani i, ‘marsakkap ma [akka bangso] mangulahon na jahat’. Di tikki i, gale do naposo ni Debata diida nasida. Dos do nasida songon penduduk ni “akka huta na so martembok, marpalang, manang margerbang”. Marsitutu do akka bangso mambuat “arta dohot barang” ni naposo ni Debata ‘na papunguhon hamoraon’ i. (Hes. 38:10-12) Aha do “hamoraon” ni naposo ni Debata? Hamoraonta i ma, ibadat na talehon tu Jahowa. On do artatta na ummarga. Naeng dirampas akka bangso do i sian hita. Dang ala na arga i di akka bangso i, alai ala na sogo do roha ni nasida tu ibadat na sittong dohot tu sude na mangulahon i.

20. Songon dia do Gog menyerang luat ni naposo ni Debata?

²⁰ Songon dia do Gog menyerang luat ni naposo ni Debata? Mungkin marsitutu do akka bangso manegai pikkiranta asa unang taihutton paretta ni Debata, jala asa unang taulahon be ibadat na sittong. Mungkin diorai ma hita paradehon sipanganon na boi mambahen togu parale-aleotta tu Debata. Diorai ma hita marpungu, disegai ma parale-aleotta dohot dongan, jala dibahen ma cara asa unang semangat be hita marbarita na uli. Diserang nasida ma sude na boi mambahen hita marale-ale tu Debata dohot tu akka dongan. Ala dipengaruhi Sibolis pikkiran ni akka halak, marsitutu ma akka bangso pamatehon sude naposo ni Jahowa asa unang adong be ibadat na sittong di portibi on.

21. Boasa mandok mauliate hita tu sipasingot ni Jahowa taringot na lao masa di ari na naeng ro?

²¹ Sude do halak na tinggal di luat na dilehon Debata makkilala akibat ni serangan ni Gog na sian Magog. Mandok mauliate do hita tu Jahowa, ala nungnga dipaingot taringot aha na lao masa. Jadi, andorang so masa hasusaan bolon, torus ma tabahen ibadat na sittong na uppetting di ngolutta. Molo tabahen songon i, parsidohot ma hita mambahen lam uli luat na dilehon Debata naung dipadenggan i. Boi ma taida satokkin nai peristiwa na luar biasa. Taida ma songon dia Jahowa mambela naposona jala patuduhon goarna na badia i di Armagedon. Tabahas ma i di pasal na mangihut.