1-3. Songon dia do cara ni halak Babel mangarehei akka naposo ni Jahowa jala boasa?

BAYAKKON ma hamu sahalak sian halak Jahudi na manomba Jahowa na tinggal di Babel. Hira-hira 50 taon ma hamu ditawan disi. Setiap ari Sabat lao ma hamu rap dohot halak Jahudi manomba Jahowa. Tikki dilewati hamu akka dalan, diida hamu ma godang kuil na massai balga. Godang do halak disi manutung pelean, jala marende lao mamuji akka dewa ni nasida, songon dewa Marduk.

² Dung i, juppangmuna ma akka dongan sahaporseaon na marpungu di sada inganan di topi ni sunge. * Marpungu ma hamu rap dohot nasida, martangiang, mangendehon ende pujian na di psalmen, jala mambahas piga-piga sian Hata ni Debata. Sepi do inganan i, tenang, dame, jala olo do ra dibege hamu soara ni kapal na diikkat di pinggir ni sunge i. Harap do rohamuna asa unang adong halak Babel ro mangganggu hamu, songon na jotjot diulahon nasida. Ai boasa huroa diulahon nasida songon i?

³ Godang do luat ditaluhon halak Babel jala akka dewana i do didok mambahen nasida monang. Tikki hancur Jerusalem didok nasida do molo on bukti patuduhon na unggogo dewa Marduk sian Jahowa. Direhei nasida do Debata dohot hamu sude. Sipata didok  nasida do, “Endehon hamu jo sada ende taringot Sion!” (Ps. 137:3) Ai godang do ende pujian di Psalmen taringot hamonangan ni Sion manang Jerusalem tikki mangalo musu ni Jahowa. Jotjot do dipakke halak Babel akka ende i lao mangalesengi naposo ni Debata. Jotjot do muse dipakke ende na di Psalmen na paboahon hamonangan ni halak Babel, na mandok, “Diruppakkon nasida do kota Jerusalem. . . . Sude ma halak di sakalilingnami mangalesengi jala mamarekkeli hami.”​—Ps. 79:1, 3, 4.

4, 5. (a) Aha do janji na dipaboa di surirang ni si Hesekiel? (Ida gambar di mula ni parsiajaran.) (b) Aha do na lao tabahas di pasal on?

⁴ Akka halak Jahudi na murtad pe dohot do mangarehei hamu, ala toktong hamu porsea tu Jahowa dohot tu akka panurirangna. Alai nang pe songon i, boi dope hamu marlas ni roha rap dohot keluargamuna. Boi dope hamu manomba Jahowa marhite cara na sittong, martangiang, marende jala manjaha Hata ni Debata. (Ps. 94:19; Rom 15:4) Bayakkon ma di sada tikki adong sahalak sian dongan sahaporseaon mamboan gulungan na massai istimewa tu parpunguan. Gulungan i marisi surirang ni si Hesekiel taringot janji ni Jahowa paulakkon naposona tu huta ni nasida. Pasti las situtu rohamuna mambege i. Mungkin dibayakkon hamu ma songon dia molo dung mulak hamu dohot keluarga tu hutamuna, jala dohot paulakkon ibadat na sittong i!

⁵ Godang do janji ni Debata dipaboa di surirang ni si Hesekiel i. Sian i taboto ma akka aha na lao dipadenggan Debata tu nasida. Saonari, songon dia do sude janji i saut tu akka tawanan i? Aha do kaitanna tu tikkinta saonari? Jala janji na dia do na lao saut muse di ari na naeng ro? Tabahas ma i di pasal on.

6. Songon dia do Jahowa paingotton akka naposona na mangalo i?

⁶ Takkas do dipaboa Jahowa marhite si Hesekiel, na lao dihukum Ibana akka naposona, ai nungnga mangalo nasida tu Ibana. Jahowa mandok, “Ai diboan nama nasida tu luat ni musu.” (Hes. 12:11) Songon na di Pasal 6, diperagahon si Hesekiel do aha na lao masa tu nasida. Alai dang sipasingot na parjolo be na dibege nasida i sian si Hesekiel. Hampir 1.000 taon naung salpu di tikki ni si Musa nungnga dipasingot Jahowa hian, na lao diboan do nasida tu luat ni musu molo torus nasida mangalo. (5 Mus. 28:36, 37) Panurirang songon si Jesaya dohot si Jeremia pe hea do pasahatton sipasingot na sarupa.​—Jes. 39:5-7; Jer. 20:3-6.

7. Songon dia do Jahowa manghukum naposona?

⁷ Alai, dang diparrohahon nasida nanggo saotik sipasingot i. Haccit do roha ni Jahowa dibahen. Alani akka pamimpin na jahat, mangalo do akka naposona, dang setia be nasida. Disomba do patung jala diulahon na jahat. Dipasombu Jahowa ma masa haraparon tu nasida. Maila ma bangso ni Debata alani haraparon i. Ai sasittongna, “godang do susu dohot madu di luat i”. (Hes. 20:6, 7)  Ujungna songon naung leleng disurirangkon, dihukum Jahowa ma naposona na murtad i. Dipasombu ma nasida diboan musu. Taon 607 SM, ro ma si Nebukadnesar raja ni Babel mangalo nasida. Dihancurhon ma Jerusalem dohot bagas joro. Marribu halak Jahudi na selamat diboan tu Babel. Direhei jala dileai ma nasida disi, songon na tabahas di mula ni pasal on.

8, 9. Songon dia do Debata mangalehon sipasingot tu huria Kristen taringot halak na murtad?

⁸ Tutu do hea situasi ni huria Kristen dos songon situasi ni halak na ditawan tu Babel? Tutu! Dos songon halak Jahudi najolo, akka halak na mangihutton Jesus pe nungnga dipaingot hian sebelumna. Sian mulana nungnga didok Jesus, “Manat ma hamu tu akka panurirang na mangajarhon na so tutu. Ai songon biru-biru do nasida ro tu hamu, alai sasittongna serigala do nasida na naeng mangaribak-ribak hamu.” (Mat. 7:15) Di pudian ni ari, dipaingot Apostel Paulus do muse nasida, didok do, “Huboto do, dung lao au ro ma akka serigala na jahat tu tonga-tongamuna. Jala kejam do nasida tu punguan i. Jala sian tonga-tongamuna adong ma na mangajarhon ajaran na so sittong, asa gabe mandao akka sisean sian punguan i jala mangihutton nasida.”​—Ul. 20:29, 30.

⁹ Nungnga diajari akka halak Kristen na di abad na parjolo, songon dia carana mananda jala pasidikkon halak na murtad. Dilehon do muse tudu-tudu tu akka sintua asa dipakaluar halak na murtad sian huria. (1 Tim. 1:19; 2 Tim. 2:16-19; 2 Ptr. 2:1-3; 2 Joh. 10) Alai dos songon halak Israel dohot halak Juda najolo, godang sian halak Kristen dang manangihon sipasingot ni Jahowa. Di ujung ni abad na parjolo, nungnga rarat be ajaran ni halak na murtad tu akka huria. Mangolu dope si Johannes di tikki i, jala holan ibana nama apostel na boi mangabbati asa unang lam rarat ajaran na sala i. (2 Tes. 2:6-8; 1 Joh. 2:18) Songon dia do situasina dung mate si Johannes?

10, 11. Songon dia do tudosan ni Jesus taringot eme dohot simareme-eme mulai saut sian abad na paduahon?

¹⁰ Dung mate si Johannes, mulai ma saut tudosan ni Jesus taringot eme dohot simareme-eme. (Jaha Mateus 13:24-30.) Dos songon naung diboto Jesus hian, nungnga disabur Sibolis be boni ni “simareme-eme” i, i ma akka halak Kristen na so sittong di huria. Ujungna, lam rarat ma halak na murtad di huria Kristen. Boi ma tabayakkon songon dia haccit ni roha ni Jahowa tikki diida naung sega huria na dibentuk Anakna i. Nungnga manomba patung be akka halak di huria, mangulahon ari raya dohot hasomalan ni halak kafir, mangihutton ajaran ni ahli filsafat na so porsea tu Debata, dohot ajaran ni agama palsu! Aha ma na diulahon Jahowa? Dos songon na diulahon Jahowa najolo tu halak Israel na so setia, dipasombu Ibana do naposona ditakkup musu. Hira-hira di abad na paduahon, hira na so adong be tarida halak Kristen na sittong (eme) di tonga-tonga ni halak Kristen na so sittong i. Mulai sian i,  halak Kristen na sittong seolah-olah ditawan sude agama palsu na digoari Babel na Balga. Sude halak Kristen na so sittong dohot do gabe bagian ni Babel na Balga na jahat i. Mulai sian i, dibentuk ma akka Gareja na mangakku Kristen.

¹¹ Saleleng marratus taon, akka Gareja na mangakku Kristen i do na mangarajai. Alai nang pe songon i, torus do adong halak Kristen na sittong na dipatudos songon “eme” i. Songon halak Jahudi na ditawan, na dipaboa di Hesekiel 6:9, toktong do diingot nasida Debata na sittong. Adong do sian nasida barani mangalo ajaran ni Gareja. Gabe direhei jala disiksa ma nasida. Na dipasombu Jahowa do naposona ditawan salelengna? Daong. Dos songon halak Israel najolo, dibahen Jahowa do hukuman na patut dijalo nasida, jala ditottuhon do sadia leleng nasida hona hukum. (Jer. 46:28) Dukkon sae hukuman i, dipalua do nasida. Taida ma jo songon dia Jahowa marjanji paluahon halak Jahudi na ditawan di Babel.

12, 13. Aha do na mambahen dang muruk be Jahowa tu naposona na ditawan i?

¹² Terus terang do Jahowa paboahon na muruk Ibana tu naposona. Alai dang na lao torus Ibana muruk tu nasida. Didok do,  “Dung masa i dang muruk be Au. Sombu ma murukki jala puas ma rohakku. Dung huusehon sude murukki tu nasida, botoon ni nasida ma na Au do Jahowa naung makkatai tu nasida. Ai husuru do asa holan Au na ikkon disomba nasida.” (Hes. 5:13) Aha do na mambahen Jahowa dang muruk be tu nasida?

¹³ Adong do sian halak Jahudi na ditawan i na setia tu Debata. Dipaboa Jahowa hian do tu si Hesekiel, na lao mambahen hamubaon deba sian akka naposona tikki ditawan. Na lao manolsoli ma nasida ala nungnga mangulahon ulaon ni halak na so umboto ila, jala ala nungnga mangalo tu Jahowa. Dipangido nasida ma asa asi roha ni Jahowa mangida nasida, jala asa disesa dosa ni nasida. (Hes. 6:8-10; 12:16) Termasuk do si Hesekiel halak na setia i, Panurirang Daniel, dohot tolu donganna. Ganjang do umur ni si Daniel, jadi diida do songon dia mulana halak Jahudi ditawan jala diboan mulak sian i. Hea do ibana marsitutu martangiang mangido tu Debata asa disesa dosa ni halak Israel. Disurat do tangiangna i di Daniel bindu 9. Tangiangna i ma na patuduhon pakkilalaan ni marribu halak na ditawan i. Lomo do roha ni nasida asa disesa Jahowa dosa ni nasida, jala dipasu-pasu muse. Alani i, pasti las  situtu do roha ni nasida, tikki dipaboa si Hesekiel janji ni Jahowa taringot na lao dipalua jala na lao dipadenggan ibadat na sittong!

14. Boasa olo Jahowa paulakkon naposona tu huta ni nasida?

¹⁴ Nungnga taboto be songon dia halak Jahudi i dipalua, jala songon dia ibadat na sittong dipadenggan. Alai adong dope na uppetting taboto. Alasan ni Jahowa paluahon naposona i, dang alana layak nasida dipalua, alai nungnga tikkina be dipabadia Jahowa goarna di jolo ni sude bangso. (Hes. 36:22) Porlu do botoon ni sude halak Babel, na jahat debata ni nasida termasuk ma i si Marduk, jala dang adong na boi dipatudos tu Jahowa, Tuan Natumimbul i. Saonari tabahas ma lima janji ni Jahowa tu halak na ditawan na dipaboa marhite si Hesekiel. Na parjolo, taida ma aha do pengaruh ni janji i tu halak na ditawan na setia. Tabahas ma songon dia akka janji i masa tu godang halak.

15. Songon dia do ibadat ni akka halak na ditawan i molo dung mulak nasida?

¹⁵ JANJI 1. Dang na lao adong be na manomba patung, manang na mangulahon ulaon na dihagigihon Debata na berkaitan tu agama palsu. (Jaha Hesekiel 11:18; 12:24.) Songon na di Pasal 5, dang badia be Jerusalem dohot bagas jorona alani akka ulaon ni agama palsu, songon manomba patung. Alani i ma lam jahat penduduk ni Jerusalem, jala gabe dao sian Jahowa. Marhite si Hesekiel marjanji ma Jahowa tu halak na ditawan i, na lao mulak muse nasida mangulahon ibadat na sittong sesuai tu lomo ni rohana. Jadi massai penting do dipadenggan ibadat na sittong i, alana jolo dipadenggan pe i baru boi dijalo akka tawanan i sude pasu-pasu na asing.

16. Aha do janji ni Jahowa taringot huta ni akka tawanan i?

¹⁶ JANJI 2. Na lao mulak ma akka tawanan i tu huta ni nasida. Ai songon on do hata ni Jahowa, “Lehonokku ma tu hamu luat ni Israel.” (Hes. 11:17) Pasti luar biasa do janji on, alana dang hea dilehon halak Babel kesempatan tu halak Jahudi asa mulak tu hutana. Ditindas do torus naposo ni Debata. (Jes. 14:4, 17) Molo toktong nasida setia, dang na lao hea be masa haraparon songon  na hea mambahen nasida maila. Molo dung mulak nasida, subur ma tano na di luat i. Boi ma nasida mangula jala mangan, jala puas do nasida tu hasil na niulana.​—Jaha Hesekiel 36:30.

17. Songon dia do janji ni Jahowa taringot pelean ni akka halak na mulak i?

¹⁷ JANJI 3. Na lao dilehon ma muse pelean di langgatan ni Jahowa. Songon na di Pasal 2, menurut Patik ni si Musa, bagian na massai penting do pelean dohot silehon-lehon i di ibadat na sittong. Molo toktong setia tawanan na mulak i, jala holan Jahowa disomba nasida, na lao dijalo Debata do pelean ni nasida. Disesa ma dosa ni nasida jala toktong ma marale-ale dohot Debata. Ai marjanji do Jahowa, “Sombaon ni sude halak Israel i ma Au di luat i. Sombaon ni nasida ma Au di dolokku na badia i, di dolok na timbo na adong di Israel. Disi, las ma rohakku mangida nasida, jala pangidookku ma tu hamu asa lehononmuna sumbangan dohot peleanmuna na dumenggan, i ma akka appunamuna na badia i.” (Hes. 20:40) Jadi na lao dipadenggan ma ibadat na sittong, jala parohon pasu-pasu do i tu naposo ni Debata.

18. Aha do na lao bahenon ni Debata lao mangurus akka biru-biruna?

¹⁸ JANJI 4. Na lao dipamate ma sude akka parmahan na jahat. Alani pengaruh ni akka pamimpin na jahat i do umbahen na dohot naposo ni Debata mangulahon dosa. Marjanji do Jahowa lao paubahon na masa i. Taringot parmahan na jahat didok Jahowa do, “Dang loasokku be nasida mangalehon mangan akka biru-birukki. . . . Paluaokku ma akka biru-birukki sian pamangan ni nasida.” Dipapos Jahowa do muse roha ni nasida, didok do, “Jagaokku ma biru-birukki.” (Hes. 34:10, 12) Songon dia do cara ni Debata mangulahon i? Dipillit Ibana ma akka bawa na porsea gabe parmahan na setia.

19. Aha do muse janji ni Jahowa na lao masa tu akka naposona?

¹⁹ JANJI 5. Na lao marsada ma sisomba Jahowa. Bayakkon ma pakkilalaan ni halak Jahudi na setia andorang so diboan nasida tu Babel. Pasti marsak do nasida mangida bangsona i tarbagi. Godang  do nasida terpengaruh tu akka panurirang na palsu dohot parmahan na jahat. Gabe dialo nasida do akka panurirang na setia na gabe wakil ni Jahowa. Jadi pasti las situtu do roha ni nasida mambege janji ni Jahowa marhite si Hesekiel on, “Bahenokku ma nasida sude marsada.” (Hes. 11:19) Molo torus marsada halak Jahudi na mulak i dohot Jahowa, songon i nang tu akka dongan na asing, dang adong be musu na boi manaluhon nasida. Molo marsada nasida gabe sada bangso, boi ma nasida parohon hamuliaon tu Jahowa. Dang na lao dileai manang direhei be Debata.

20, 21. Songon dia do janji ni Debata saut tu akka tawanan na mulak i?

²⁰ Tutu do saut janji na lima i tu halak Jahudi dung mulak nasida? Ingot ma hata ni si Josua on, “Dang adong nanggo sada pe sian janji ni Jahowa Debatamuna i na so saut. Saut do sude janjina i. Jala dang adong nanggo sada pe hatana i na so saut.” (Jos. 23:14) Dos songon di tikki ni si Josua, pasti dipasaut Jahowa do janjina dung mulak halak Jahudi na ditawan i.

²¹ Dang manomba patung be halak Jahudi, jala dang diihutton be ulaon ni agama palsu. Ai on do najolo mambahen nasida mandao sian Jahowa. Ujungna saut ma na diharappon nasida saleleng on.  Tinggal ma nasida muse di huta ni nasida, diula ma tano na disi, jala dang sia-sia be ngolu ni nasida. Pittor dipajongjong do muse langgatan ni Jahowa di Jerusalem dung mulak nasida tu huta i. Dilehon nasida ma pelean na palasson roha ni Debata. (Esra 3:2-6) Dipasu-pasu Jahowa do nasida. Dilehon do parmahan na burju, na setia, jala na porsea. Umpamana, songon Malim Esra panalin i, Gubernur Nehemia, Gubernur Serubabel, si Josua Sintua ni Malim i, dohot panurirang na barani songon si Haggai, si Sakaria, dohot si Maleaki. Molo torus nasida mangihutton petunjuk na dilehon, toktong do nasida boi marsada dohot na asing, songon na diharappon nasida saleleng on.​—Jes. 61:1-4; jaha Jeremia 3:15.

22. Sian dia do boi taboto na lao saut janji i tu godang halak?

²² Tottu lam togu do haporseaon ni halak Jahudi tikki diida nasida saut janji ni Jahowa taringot padenggatton ibadat na sittong. Alai dang sude dope saut janjina, holan saotik dope. Sian dia taboto? Sian pangalaho ni bangso i. Jahowa mandok ikkon torus do nasida setia asa dipasaut sude janjina i. Hape di pudian ni ari, mangalo do muse halak Jahudi. Alani i, dang sude dope janji i saut tu nasida. Hape songon hata ni si Josua, pasti saut do sude janji  ni Debata. Jadi boi taida, na lao saut do akka janji i di ari na naeng ro tu godang halak jala martahan ma i salelengna. Taida ma songon dia Debata pasautton i.

23, 24. Andigan do dimulai tikki lao “padenggatton saluhutna”?

²³ Sian Bibel, taboto ma nungnga masa ari parpudi mulai taon 1914, manang nungnga jonok be ujung ni portibi on. Alai dang gabe marsak naposo ni Jahowa alani i. Sasittongna, luar biasa do na masa taon 1914. Ai nungnga ‘juppang be tikkina lao padenggatton saluhutna’. (Ul. 3:21) Sian dia boi taboto? Taida ma aha na masa di surgo taon 1914. Di tikki i dilantik ma Jesus Kristus gabe Raja Messias. Saonari, boasa pelantikanna i gabe tanda naung mulai tikki lao padenggatton saluhutna? Taingot ma janji ni Jahowa tu si Daud. Marjanji do Debata lao mambahen pinopparna gabe raja salelengna. (1 Kron. 17:11-14) Alai mulai sian na hancur Jerusalem dibahen Babel taon 607 SM, dang adong be pinoppar ni si Daud mamaretta gabe raja.

²⁴ Digoari do Jesus i “Anak ni jolma”, ai sian pinoppar ni si Daud do ibana. Jadi marhak do Jesus gabe Raja penerus ni Raja Daud. (Mat. 1:1; 16:13-16; Luk. 1:32, 33) Alani i, tikki dilantik Jahowa Jesus gabe Raja taon 1914 di surgo, on ma tanda naung mulai ‘tikki lao padenggatton saluhutna’. Mulai sian i, dipakke Jahowa ma Raja na sempurna i lao manorusson akka janjina taringot padenggatton ibadat na sittong.

25, 26. (a) Andigan do marujung naposo ni Debata ditawan Babel na Balga? (Ida kotak “Boasa Taon 1919?”) (b) Aha do surirang na saut mulai sian taon 1919?

²⁵ Na parjolo diulahon Kristus rap dohot Bapakna dung gabe raja ibana, i ma mamareso cara ni ibadat na sittong diulahon di tano on. (Mal. 3:1-5) Songon tudosan ni Jesus taringot eme dohot simareme-eme na maol dibedahon, leleng do halak na dimiahi dang boi dibedahon sian halak Kristen na so sittong. * Alai dung  masa musim panen taon 1914, takkas ma tarida aha beda ni nasida. Saleleng marpulu taon sebelum taon 1914, torus do setia akka Parsiajar Bibel paboahon na so sittong akka ajaran ni Gareja. Mulai ma ditinggalhon nasida akka organisasi ni Gareja i. Nungnga juppang be tikkina di Jahowa lao padenggatton saluhutna. Di mula ni taon 1919, piga-piga taon dukkon dimulai “tikki panen” malua ma naposo ni Debata sian agama palsu, Babel na Balga!​—Mat. 13:30.

²⁶ Mulai sian i, saut ma surirang ni si Hesekiel taringot padenggatton saluhutna. Saut ma janji i tu godang halak, unggodang sian halak Jahudi najolo i. Saonari tabahas ma songon dia lima janji i boi saut tu godang halak.

27. Songon dia do Debata mambahen ias naposona sian agama palsu?

²⁷ JANJI 1. Dang adong be na manomba debata na so sittong, manang na mangihutton ulaon ni agama na dihagigihon Debata. Di ujung ni taon 1800-an jala di mula ni taon 1900-an, nungnga marpungu be akka halak Kristen na sittong. Mulai ma ditinggalhon nasida ulaon na somal diulahon agama palsu. Nungnga diboto be na so sesuai tu Bibel ajaran Tritunggal, tondi na so ra mate, dohot api naroko. Diboto ma molo mamakke patung tikki manomba Debata, sarupa tu manomba debata na so sittong. Di pudian ni ari, diattusi naposo ni Debata ma muse molo mamakke salib termasuk ulaon manomba debata na so sittong.​—Hes. 14:6.

28. Songon dia do situasi ni naposo ni Debata dung ditinggalhon nasida Babel na Balga i?

²⁸ JANJI 2. Na lao mulak ma muse naposo ni Debata mangulahon ibadat na sittong. Dung ditinggalhon halak Kristen na setia Babel na Balga, boi ma nasida mulak muse mangulahon ibadat na sittong songon naung ditottuhon Debata hian. Dipasu-pasu Debata ma nasida, dapot ni nasida ma sipanganon na boi patoguhon parale-aleon ni nasida tu Debata, dang hahurangan be nasida. (Jaha Hesekiel 34:13, 14.) Songon na lao tabahas di Pasal 19 massai godang  do sipanganon na dilehon Debata tu akka naposona asa boi lam togu parale-aleon ni nasida. Jala toktong do i martamba-tamba dilehon.​—Hes. 11:17.

29. Boasa gabe lam godang halak na marbarita na uli mulai sian taon 1919?

²⁹ JANJI 3. Dipelehon ma muse akka pelean di langgatan ni Jahowa. Di abad na parjolo, diajari do halak Kristen mangalehon pujian tu Debata lao gabe pelean ni nasida. Ai dao do i ummarga sian pelean binatang. Dipuji nasida do Debata jala dibaritahon do taringot Ibana. (Heb. 13:15) Alai nang pe songon i, saleleng marratus taon naposo ni Debata ditawan Babel na Balga, dang adong be pengaturan na dibahen lao manomba Debata dohot marbarita na uli. Alai tikki naeng dipalua naposo ni Debata sian Babel na Balga, nungnga mulai be dilehon nasida pelean tu Debata marhite pujian. Sibuk do nasida marbarita na uli, jala dipuji nasida do  Debata di parpunguan. Sian taon 1919, dipaboa “naposo haposan jala na marbisuk” ma molo marbarita na uli ulaon na massai penting. Dibahen nasida ma pengaturan asa denggan i diulahon. (Mat. 24:45-47) Lam martamba ma godang ni halak na mamuji goarna na badia i, tudos ma i songon langgatan ni Jahowa na manutung godang pelean!

30. Aha do na dibahen Jesus asa adong akka parmahan na burju mangurus biru-biruna i?

³⁰ JANJI 4. Na lao dipamate ma akka parmahan na jahat. Nungnga dipalua Kristus akka naposona sian akka parmahan na di Gareja. Ai jahat jala egois do akka parmahan i. Jadi molo adong parmahan sisongon i di huria, dipalao do nasida. (Hes. 20:38) Dipastihon Jesus Parmahan na Burju i do asa denggan diurus biru-biruna. Taon 1919, dilantik ibana ma naposo haposan jala na marbisuk. Massai penting do tugas ni akka halak na dimiahi on, ai nasida do na paradehon sipanganon na patoguhon parale-aleon ni naposo ni Debata. Di pudian ni ari, dilatik ma akka sintua lao ‘marmahani akka biru-biru ni Debata’. (1 Ptr. 5:1, 2) Jotjot do dipakke hata na di Hesekiel 34:15, 16 lao paingotton parmahan na di huria taringot aturan na ditottuhon Jahowa dohot Jesus tu nasida.

31. Songon dia do Jahowa menepati janji na disurat di Hesekiel 11:19?

³¹ JANJI 5. Na lao marsada ma sude na manomba Jahowa. Saleleng marratus taon, nungnga tarbagi-bagi be Gareja gabe marpulu ribu aliran manang sekte. Torus do nasida marbada, alai anggo naposo ni Jahowa na malua sian Babel na Balga i, boi do dihilala nasida mukjizat ni Jahowa. Ditepati Jahowa do janjina. Didok Ibana do tu si Hesekiel, “Bahenokku ma nasida sude marsada.” (Hes. 11:19) Di liat portibi on, marjuta na olo gabe siihutton Kristus. Nasida ro sian latar belakang na marasing-asing, sian agama, status sosial dohot ekonomi na marasing-asing. Alai diajarhon do hasittongan na sarupa tu nasida sude, jala marsiurupan do nasida mangulahon tugas na sarupa. Di borngin na parpudi tikki Jesus di tano on, martangiang do ibana tu Jahowa asa torus marsada akka siseanna. (Jaha Johannes 17:11, 20-23.) Jala boi do taida di tikkinta on na dialusi Jahowa tangiangna i.

32. Songon dia do pakkilalaanmuna boi mangida saut akka surirang taringot ulaon padenggatton saluhutna i? (Ida kotak “Surirang taringot Ditawan dohot Dipadenggan”.)

³² Pasti las do rohamuna ala boi diida hamu songon dia cara ni Debata pasautton surirang taringot padenggatton saluhutna! Nungnga taida songon dia surirang ni si Hesekiel saut di organisasi ni Jahowa saonari on. Pasti las situtu do roha ni Jahowa mangida naposona, songon na dipaboa di surirang ni si Hesekiel na mandok, “Las ma rohakku tu hamu.” (Hes. 20:41) Dung ditawan Babel na Balga naposo ni Debata saleleng marratus taon, dipalua ma nasida jala marsada. Dapot ni nasida ma gok sipanganon na boi patoguhon parale-aleon ni nasida tu Jahowa. Dang las rohamuna dohot gabe bagian sian naposo ni Debata i? Pasti bangga do hamu boi mamuji Jahowa rap dohot dongan na di liat portibi on.  Sasittongna, piga-piga sian surirang ni si Hesekiel taringot padenggatton saluhutna lao masa dope di ari na naeng ro, jala gumodang dope halak na lao mangida i.

33-35. (a) Aha do na dibayakkon halak Jahudi na ditawan i tikki diida nasida janji na di Hesekiel 36:35? (b) Songon dia do surirang na di Hesekiel i saut tu naposo ni Jahowa di tikkinta on? (Ida kotak “Juppang Tikkina Lao Padenggatton Saluhutna”.)

³³ Taingot ma, ‘tikki lao padenggatton saluhutna’ i dimulai tikki adong muse sian pinoppar ni si Daud mandapot huaso gabe raja. Dimulai ma i tikki Jesus hundul di tahtana taon 1914. (Hes. 37:24) Dukkon i, dilehon Jahowa ma huaso tu Kristus lao padenggatton ibadat na sittong tu akka naposona. Ai nungnga marratus taon naposona ditawan Babel na Balga, agama palsu i. Alai, nungnga sae be tugas ni Kristus lao padenggatton i? Dang dope! Torus dope adong tugasna sahat tu ari na naeng ro. Dipaboa do i di akka surirang ni si Hesekiel.

³⁴ Sada sian surirangna mandok, “Dohonon ni akka halak ma, ‘Nungnga gabe songon Taman Eden be luat na tarulang i.’” (Hes. 36:35) Aha do na dibayakkon si Hesekiel dohot halak Jahudi na ditawan i tikki mambege janji i? Dang mungkin dibayakkon nasida luat ni nasida gabe songon Taman Eden na hea dibahen Jahowa. (1 Mus. 2:8) Alai diattusi nasida do molo Jahowa naeng mambahen luat i gabe subur jala uli.

³⁵ Masa do janji i di tikkinta saonari? Dang mungkin boi sude liat portibi on songon Taman Eden saleleng Sibolis na mangarajai portibi on. Alai boi do taida saut janji i saonari, ala boi do hita marale-ale tu Jahowa dohot tu akka dongan. Gabe dame ma tahilala, adong ma tujuan ni ngolutta, jala tabahen do ulaon manomba Debata ulaon na uppetting di ngolutta. Lam leleng lam jonok ma tahilala tu Jahowa songon i nang tu akka dongan. Attong nungnga marujung be tikki lao padenggatton i?

36, 37. Aha do janji na lao saut di Paradeiso?

³⁶ Dung masa Armagedon, torus dope adong tugas ni Jesus. Lao padengganonna ma sude liat portibi on. Saleleng Pamarettaon Saribu Taon, diurupi ma sude jolma paubahon sude tano on gabe Taman Eden dos songon na dihalomohon Jahowa sian mulana. (Luk. 23:43) Di tikki i, dame do sude ngolu ni halak na mangolu di portibi on, jala diurus nasida do tano on. Tudia pe nasida lao dang adong bahaya, jala aman do dihilala nasida. Bayakkon ma songon dia pakkilalaanmuna tikki saut janji on, “Bahenokku ma parjanjian dame tu nasida. Usirokku ma akka binatang buas na ganas sian luat i, asa aman nasida tinggal di gurun jala modom di akka tombak.”​—Hes. 34:25.

³⁷ Boi do dibayakkon hamu na masa i? Hamu boi mardalani manang tudia pe, dang porlu mabiar. Dang adong binatang na makkarat hamu manang na mangganggu hamu. Holan sahalakmuna pe  boi mardalani di tombak. Boi ma diida hamu pemandangan na massai uli, jala modom renges disi. Tikki dungo hamu, segar ma pakkilalaanmuna. Dang adong nanggo saotik pe lukka sian dagingmuna.

38. Songon dia do perasaanmuna tikki dibayakkon hamu saut janji na di Hesekiel 28:26?

³⁸ Na lao taida ma muse saut janji on, “Aman ma nasida tinggal di luat i. Pajongjongon ni nasida ma disi jabu jala bahenon ni nasida ma akka ladang anggur. Ai molo dung huhukum akka halak na mangaleai na di sakaliling ni nasida, gabe aman ma nasida tinggal disi. Sian i botoon ni nasida ma na Au do Jahowa Debata ni nasida.” (Hes. 28:26) Dung mate sude musu ni Jahowa, dame jala aman ma portibi on. Huhut taurus tano on, karejo ma hita manggohi na porlu di keluargatta. Tabangun ma jabu na denggan jala tasuan ma anggur.

39. Boasa boi pos rohamuna na lao saut sude surirang taringot Paradeiso na di bukku Hesekiel?

³⁹ Holan angan-angan do i? Molo songon i do pakkilalaanmuna, ingot ma muse akka naung diida hamu masa saleleng ‘tikki padenggatton saluhutna’ i. Marhite huaso ni Jahowa, marhasil do Jesus padenggatton ibadat na sittong di tikki na massai jorbut on. Hape marsitutu do Sibolis manggagalhon i. On patuduhon pasti saut do sude janji na dipaboa Jahowa marhite si Hesekiel di ari na naeng ro.