1-3. Aha do na mambahen muba pikkiran ni halak Jahudi na di Babel i? (Ida gambar di mula ni parsiajaran.)

SALELENG lima taon, marsitutu do si Hesekiel paboahon barita panguhuman ni Jerusalem tu halak Jahudi na di Babel. Dibahen si Hesekiel do peragaan, dibahen do tudosan, jala langsung do dipaboa ibana hata ni Debata. Alai, dang porsea nasida. Bahkan tikki dibege naung dikepung tentara ni Babel Jerusalem, pos dope roha ni nasida na toktong aman penduduk na disi. Alai dung di pudian ni ari, adong ma na mambahen muba roha ni halak Jahudi na di Babel i.

² Dua taon dung dikepung Jerusalem, adong ma sasahalak na malua sian Jerusalem ro tu Babel. Didok ma, “Nungnga ditaluhon musu be kota i!” Gabe marsak situtu ma halak Jahudi na ditawan i. Ai nungnga hancur be kota i, bagas jorona, dohot luat ni nasida. Dang adong be harapan ni nasida boi mulak tusi.​—Hes. 21:7; 33:21.

³ Alai mandapot parnidaan ma si Hesekiel. Barita na denggan do isi ni parnidaanna i. Aha do barita na denggan na lao dipaboa tu akka tawanan i? Songon dia do barita i berpengaruh tu naposo ni Debata saonari on, jala aha do labana tu hita ganup marsada-sada? Tabahas ma.

4. Aha do dua na masa na diparrohahon si Hesekiel di parnidaan i?

⁴ Jaha Hesekiel 37:1-10. Di parnidaan i, si Hesekiel adong di sada rura na marisi godang holi-holi. Asa takkas diida si Hesekiel aha na adong di parnidaan i, disuru Jahowa ma ibana “makkaliangi rura i”. Godang do holi-holi marserakan disi. Adong dua na mambahen longang roha ni si Hesekiel. Heran do ibana mangida godang ni holi-holi i dohot situasi ni akka holi-holi i. Didok ibana do, “Huida ma massai godang marserakan holi-holi . . . jala nungnga massai koring holi-holi i.”

5. Aha do paretta na dilehon Jahowa tu si Hesekiel, jala aha do na masa dukkon diulahon si Hesekiel paretta i?

⁵ Asa mulak mangolu holi-holi i, dilehon Jahowa ma dua paretta tu si Hesekiel. Na parjolo, didok do, “Paboa ma aha na lao masa taringot tu holi-holi i”, asa “mulak mangolu” holi-holi i. (Hes. 37:4-6) Dung dipaboa si Hesekiel na lao masa i, “tarbege ma soara na mardarak-darak, jala mardomu ma holi-holi na sada dohot holi-holi na asing”. Diida ibana ma muse muncul “akka urat-urat dohot sibuk di akka holi-holi i, jala ditutupi kulit ma nasida”. (Hes. 37:7, 8) Na paduahon didok ma muse tu si Hesekiel, “Paboa ma aha na lao masa taringot tu alogo i.” Dokkon ma asa “mangullus” alogo i tu holi-holi ni akka na mate i. Dung didok si Hesekiel surirang i, “masuk ma hosa i tu nasida, gabe mulak mangolu ma nasida jala jongjong. Gabe songon pasukan tentara na massai balga situtu do godang ni nasida”.​—Hes. 37:9, 10.

6. Songon dia do Jahowa mangurupi si Hesekiel mangattusi parnidaan i?

⁶ Diurupi Jahowa do si Hesekiel mangattusi parnidaan i. Dipaboa Jahowa ma molo akka holi-holi i manggombarhon sude halak Israel. Dung dibege halak Jahudi na ditawan i naung hancur Jerusalem, marsak situtu ma nasida. Dihilala halak Israel dos ma nasida songon halak naung mate. Didok nasida do, “Nungnga koring be holi-holinami jala dang adong be sipaimaonnami. Nungnga hancur situtu be hami.” (Hes. 37:11; Jer. 34:20) Alai dipatudu Jahowa do molo parnidaan na massai ngeri i sasittongna marisi barita na denggan do tu halak Israel.

7. Aha do didok Jahowa di Hesekiel 37:12-14, jala songon dia do dibahen Ibana asa porsea naposona tu janjina?

⁷ Jaha Hesekiel 37:12-14. Marhite parnidaan on, dipapos Jahowa ma roha ni halak Jahudi na ditawan i na mulak do muse nasida tu hutana jala tinggal disi. Hira na mulak mangolu ma nasida dibahen Jahowa. Dijou Jahowa do nasida “bangsokku”. Tottu las do roha ni halak Jahudi mambege hata on. Boasa boi pos roha ni nasida tu janji i? Ai Jahowa sandiri do na mambahen janji i. Ibana do na mandok, “Au do Jahowa, Au sandiri do naung mandok i dohot na mangulahon i.”

8. (a) Boasa dipatudos sude halak Israel i songon halak na mate? (b) Sesuai tu Hesekiel 37:9, aha do na mambahen halak Israel gabe songon halak na mate? (Ida muse surat na di toru.)

 ⁸ Songon dia do parnidaan ni si Hesekiel i saut tu halak Israel? Tikki dihancurhon harajaon na sappulu marga taon 740 SM jala tikki ditawan pendudukna, hampir songon halak naung mate do bangso Israel. Dang marale-ale be nasida tu Debata mulai sian tikki i. Hira-hira 130 taon dukkon i, ditawan ma muse halak Juda. Jadi, gabe sude ma “halak Israel” ditawan. (Hes. 37:11) Gabe songon halak naung mate ma sude halak Israel na ditawan. Dipatudos ma nasida tu holi-holi songon na di parnidaan ni si Hesekiel. * Taingot ma, didok si Hesekiel do, naung “massai koring” holi-holi i. On patuduhon, nungnga massai leleng nasida dang marale-ale tu Debata. Jala tutu do on masa, lobi sian 200 taon ma halak Israel dohot halak Juda songon halak na mate. Ai mulai sian taon 740 sahat tu taon 537 SM, dang marale-ale be nasida tu Debata.​—Jer. 50:33.

9. Aha do persamaan ni halak Israel najolo dohot “Israel ni Debata”?

⁹ Songon hata ni Jahowa marhite si Hesekiel, janjina lao padenggatton saluhutna tu halak Israel i lao saut do muse tu godang halak. (Ul. 3:21) Songon bangso Israel na “hona bunu” jala na dipatudos songon halak naung leleng mate, “Israel ni Debata” pe dipatudos do songon halak na hona bunu jala naung leleng mate. (Gal. 6:16) Ai leleng do sude halak na dimiahi ditawan Babel na Balga manang agama palsu. Di Pasal 9, nungnga tabahas tudosan ni Jesus taringot eme dohot simareme-eme jala halak Kristen mulai ditawan sian abad na paduahon. (Mat. 13:24-30) Jadi, cocok do parale-aleon ni nasida tu Debata dipatudos songon holi-holi na “massai koring” ala marratus taon nasida ditawan agama palsu.​—Hes. 37:2.

10. (a) Aha do surirang na disurat di Hesekiel 37:7-10 taringot naposo ni Debata? (b) Aha do na mambahen porsea muse akka halak na ditawan i tu janji ni Debata?

¹⁰ Nungnga dipaboa Jahowa hian marhite si Hesekiel na lao padengganonna naposona i secara bertahap manang bahenonna “mulak mangolu”. (Hes. 37:7-10) Aha do na mambahen halak Jahudi na setia porsea muse na tutu nasida mulak tu Israel? Tottu pos do roha ni nasida alani akka surirang. Umpamana, disurirakkon si Jesaya do na lao adong dope sian bangso i na mulak tu luat i, didok do nasida “tunas na badia”. (Jes. 6:13; Job 14:7-9) Pasti dipatogu do haporseaon ni nasida mamboto surirang na disurat si Hesekiel. Ai marhite ibana, dipaboa Debata do akka aha na lao dipadenggan tu halak Israel. Adong do muse di Babel i halak na togu haporseaonna, songon Panurirang Daniel. Jala tikki diida nasida hancur Babel taon 539 SM, pasti tamba do pos ni roha ni nasida boi mulak tu hutana.

11, 12. (a) Songon dia do Israel ni Debata dipadenggan muse secara bertahap? (Ida kotak “Ibadat na Sittong Dipadenggan Secara Bertahap”.) (b) Aha do sukkun- sukkun na ro dukkon tajaha Hesekiel 37:10?

¹¹ Songon dia do “Israel ni Debata” manang halak na dimiahi dipadenggan secara bertahap? Marratus taon ma nasida songon halak na mate ala ditawan agama palsu. Dukkon salpu i, tarbege ma “soara na mardarak-darak” tikki halak na setia mulai mambela ibadat na sittong. Umpamana, di abad na pasappulu onomhon, diterjemahon si William Tyndale ma Bibel tu bahasa Inggris. Alai dang lomo roha ni pamimpin gareja Katolik Roma. Muruk do nasida ala gabe boi dijaha akka rakyat biasa Bibel i. Ujungna, dibunu ma si Tyndale. Nang pe songon i, adong do torus halak na barani manerjemahon Bibel tu bahasa na asing. Ujungna, lam godang ma halak na manjaha Bibel.

 ¹² Di pudian ni ari, marsitutu ma si Charles T. Russell dohot akka donganna mangalului hasittongan naung mago i. Dipatudos ma i songon “akka urat-urat dohot sibuk” ni holi-holi na mulai tarida. Marhite majalah “Joujou Paboahon Zion” (Zion’s Watch Tower) dohot publikasi na asing, boi ma dapot ni akka halak na tulus rohana hasittongan i. Hasilna, gabe dohot ma nasida marsada lao mangurupi akka na dimiahi. Di mula ni taon 1900 an, tamba do semangat ni akka halak na dimiahi i dibahen “Drama-Foto Penciptaan” dohot bukku “Rahasia Naung Dipasaut” (The Finished Mystery). Dang leleng dukkon i, juppang ma tikki ni Debata lao mambahen naposona i “jongjong”. (Hes. 37:10) Andigan jala songon dia do i masa? Taboto ma alusna molo dung taparsiajari na masa di Babel najolo.

13. (a) Songon dia do surirang na di Hesekiel 37:10, 14 saut taon 537 SM? (b) Ayat na dia do patuduhon na adong halak sian harajaon na sappulu marga i mulak tu Israel?

¹³ Taon 537 SM mulai ma saut parnidaan i tu halak Jahudi na ditawan di Babel. Songon dia ma i saut? Songon na mulak mangolu ma nasida dibahen Debata jala “jongjong” muse. Dipalua Jahowa ma nasida sian Babel jala mulak tu Israel. Adong 42.360 godang ni halak Israel jala hira-hira 7.000 halak na sian bangso na asing maninggalhon kota Babel. Dipajongjong nasida ma muse Jerusalem dohot bagas jorona, jala tinggal ma nasida disi. (Esra 1:1-4; 2: 64, 65; Hes. 37:14) Hira-hira 70 taon dukkon i, adong sekitar 1.750 halak na dohot mangihutton si Esra mulak tu Jerusalem. (Esra 8:1-20) Jadi adong lobi sian 44.000 godangna halak Jahudi na mulak tu Jerusalem. Alani i ma cocok nasida didok “pasukan tentara na massai balga”. (Hes. 37:10) Dipaboa do muse di Bibel, adong do halak na sian harajaon sappulu marga i na mulak tu Israel jala dohot mambangun bagas joro. Ai taon 740 SM, ditakkup tentara ni Asiria do akka ompu ni nasida.​—1 Kron. 9:3; Esra 6:17; Jer. 33:7; Hes. 36:10.

14. (a) Songon dia do Hesekiel 37:24 patuduhon andigan tikkina surirang i saut tu godang halak? (b) Aha do na masa taon 1919? (Ida kotak “‘Holi-Holi Naung Koring’ dohot ‘Dua Saksi’​—Aha do Kaitanna?”)

¹⁴ Songon dia do surirang ni si Hesekiel i saut tu godang halak? Dos songon surirang na asing taringot padenggatton i, surirang on pe saut do tu godang halak. Saut ma i dang leleng dukkon gabe Raja Jesus Kristus, si Daud na Umbalga i. * (Hes. 37:24) Taon 1919, dilehon Jahowa ma tondi parbadiana tu naposona. Hasilna, songon na “mulak mangolu” ma nasida sude. Ai dipalua Jahowa ma nasida sian agama palsu, Babel na Balga. (Jes. 66:8) Seolah-olah diboan Jahowa ma nasida mulak tu “luat” ni nasida. Boi ma nasida muse marale-ale tu Jahowa dohot tu akka dongan na di liat portibi on. Alai songon dia do naposo ni Jahowa didok songon “pasukan tentara na massai balga”?

15, 16. (a) Songon dia do naposo ni Jahowa saonari on gabe songon pasukan tentara na balga? (b) Songon dia do surirang ni si Hesekiel on patoguhon rohatta tikki mangadopi parsoalan? (Ida kotak “Na Boi Mangurupi Hita Asa Togu Muse”.)

 ¹⁵ Dang leleng dukkon dilantik Kristus i naposo haposan taon 1919, boi ma dihilala naposo ni Debata naung saut surirang ni si Sakaria, panurirang na tinggal rap dohot halak Jahudi na mulak i. Ai didok ibana do, “Marroan ma godang halak dohot akka bangso.” Digombarhon ibana do halak na mangalului Jahowa i songon “sappulu bawa na sian sude bahasa ni akka bangso”. Gomos do ditiop nasida “sahalak Jahudi”, i ma Israel ni Debata i. Huhut do didok nasida, “Dohot ma hami lao rap dohot ho. Ai nungnga hubege hami didongani Debata do bangsom.”​—Sak. 8:20-23.

¹⁶ Saonari nungnga marjuta halak na dohot tu “pasukan tentara na massai balga” i. (Hes. 37:10) Akka na dohot tu pasukan i, i ma Israel ni Debata (halak na dimiahi na adong dope di tano on) dohot “sappulu bawa” (biru-biru na asing). Lam martamba-tamba do torus tentara ni Kristus i. Jadi molo dohot do hita bagian ni pasukan i, marsitutu ma hita mangihutton tudu-tudu sian Jesus Rajanta, asa boi hita sahat tu portibi na imbaru na gok pasu-pasu i.​—Ps. 37:29; Hes. 37:24; Plp. 2:25; 1 Tes. 4:16, 17.

17. Aha do na lao tabahas di pasal na mangihut?

¹⁷ Ala nungngga dipadenggan ibadat na sittong, adong do tugasta na massai penting. Tugas aha ma i? Lao mamboto alusna, porlu do taattusi aha tugas na dijalo si Hesekiel sian Debata sebelum dihancurhon Jerusalem. Tabahas ma i di pasal na mangihut.