Ringkasan ni Akka Pangattusion na Disesuaihon
Piga-piga taon na parpudi on, adong do parbinotoatta na disesuaihon taringot surirang ni si Hesekiel. Dipaboa do i di Menara Pengawal. Dipaboa do muse di bukku Ibadat na Sittong on hatorangan na asing na disesuaihon. Boi do dialusi hamu sukkun-sukkun on?
Aha do na digombarhon bohi ni opat kerubim i?
Pangattusion na sebelumna: Setiap bohi ni kerubim na opat i manggombarhon opat sifat ni Jahowa.
Pangattusion na terbaru: Setiap bohi ni kerubim dang holan manggombarhon opat sifat ni Jahowa. Molo sahali sude taida bohi ni kerubim na opat i, on manggombarhon sude sifat ni Jahowa. Jala bohi na opat i patuduhon huaso dohot hasangapon ni Jahowa na luar biasa.
Alasan disesuaihon: Jotjot do angka opat dipakke di Bibel lao paboahon na lengkap sude na dipaboa i. Jadi molo sahali sude taida bohi ni kerubim na opat i, dang holan opat parange ni Jahowa na marasing-asing na dipatudu. Opat parange i gabe songon fondasi lao pataridahon parange ni Jahowa na asing. Setiap bohi ni kerubim manggombarhon sifat na jago, na gogo, jala na hebat. Alai nang pe massai hebat, di parnidaan i dipatudu do molo kerubim i adong di toru ni tahta ni Jahowa. On patuduhon Jahowa do Parhuaso na untimbo sian sude di alam semesta on.
Ise do na digombarhon bawa na mamboan inganan ni alat tulis sekretaris i?
Pangattusion na sebelumna: Bawa na mamboan inganan ni alat tulis sekretaris i manggombarhon akka halak na dimiahi na adong dope di tano on. Marhite ulaon marbarita dohot mambahen sisean, halak na dimiahi seolah-olah mangalehon tanda tu akka halak na gabe bagian sian “punguan bolon”.—Pgk. 7:9.
Pangattusion na terbaru: Bawa na mamboan inganan ni alat tulis sekretaris i manggombarhon Jesus Kristus. Di “hasusaan bolon”, diuhumi Jesus ma sude jolma. Dilehon ma tanda tu punguan bolon i lao patuduhon molo nasida biru-biruna.—Mat. 24:21.
Alasan disesuaihon: Nungnga dipasahat Jahowa tugas lao manguhumi i tu Anakna. (Joh. 5:22, 23) Sesuai tu Mateus 25:31-33, Jesus do na lao manguhumi ise na gabe “biru-biru” manang ise na gabe “hambing”.
Tutu do si Ohola dohot si Oholiba manggombarhon Gareja naung tarbagi gabe Katolik dohot Protestan?
Pangattusion na sebelumna: Kakakna si Ohola (Samaria ibu kota ni Israel) manggombarhon Gareja Katolik. Adekna si Oholiba (Jerusalem ibu kota ni Juda) manggombarhon Gareja Protestan.
Pangattusion na terbaru: Kakak adek na gabe pelacur on dang manggombarhon bagian ni Gareja na dia pe. Alai kisah on patuduhon perasaan ni Jahowa tu naposona na so setia. Jala sian on taboto ma perasaanna tu sude agama palsu.
Alasan disesuaihon: Dang adong dipaboa di Bibel molo si Ohola dohot si Oholiba manggombarhon Gareja. Israel dohot Juda hea do dipatudos songon istri ni Jahowa, alai anggo Gareja dang hea dipatudos songon i. Asing ni i, Hesekiel bindu 16 dohot 23 patuduhon molo pelacur i manggombarhon naposo ni Debata na so setia. Marjanji do Debata lao manjalo nasida muse molo olo muba. Alai anggo Gareja, dang na lao hea jaloon ni Jahowa.
Tutu do Jerusalem na murtad manggombarhon Gareja?
Pangattusion na sebelumna: Penduduk ni Jerusalem na so setia manggombarhon Gareja. Jadi songon dia Jerusalem najolo dihancurhon, songon i ma haduan Gareja dihancurhon.
Pangattusion na terbaru: Dung murtad Jerusalem, godang ma halak manomba patung dohot mangulahon na jahat. On paingotton hita tu situasi ni Gareja. Alai, Jerusalem na murtad i dang manggombarhon Gareja.
Alasan disesuaihon: Dang adong ayat ni Bibel na patuduhon molo Jerusalem na murtad i manggombarhon Gareja. Anggo Jerusalem najolo hea do mangulahon ibadat na sittong jala diampuni Jahowa do dosa ni nasida. Alai anggo Gareja dang hea mangulahon ibadat na sittong jala dang na lao diampuni Jahowa nasida.
Songon dia do surirang taringot holi-holi naung koring i saut?
Pangattusion na sebelumna: Taon 1918 dianiaya ma halak na dimiahi jala ditawan Babel na Balga. Dipatudos do nasida songon halak na mate ala dang bebas manomba Debata. Alai taon 1919, dipalua ma nasida sian Babel na Balga. Boi ma muse marbarita, seolah-olah mulak mangolu ma nasida dibahen Jahowa.
Pangattusion na terbaru: Naposo ni Debata nungnga ditawan Babel na Balga sebelum taon 1918. Jadi nungnga leleng situasi ni nasida songon halak na mate. Mulai ma i sian abad na paduahon sahat tu taon 1919. Leleng ni nasida ditawan sarupa ma tu leleng ni eme dohot simareme-eme na dipasombu rap tubu di tudosan ni Jesus.
Alasan disesuaihon: Leleng do halak Israel najolo ditawan, mulai sian taon 740 SM sahat tu 537 SM. Didok di surirang ni si Hesekiel, holi-holi i nungnga “koring” manang “massai koring”. On patuduhon nungnga leleng mate akka halak na digombarhon tu holi-holi i. Jala dipaboa disi, secara bertahap do dibahen mulak mangolu holi-holi i.
Aha do lapatan ni dua tukkot na dipasada?
Pangattusion na sebelumna: Andorang so masa Porang Dunia I, tarbagi do halak na dimiahi. Alai marsada ma nasida dung taon 1919.
Pangattusion na terbaru: Surirang on patuduhon, na lao marsada do bahenon ni Jahowa sude naposona. Dung salpu taon 1919, secara bertahap, lam godang ma halak na lao mangolu di tano on jala marsada dohot halak na dimiahi. Marsada ma dua kelompok on manomba Jahowa gabe songon sada bangso.
Alasan disesuaihon: Surirang on dang paboahon sada tukkot na diponggol dua jala dibahen gabe sada. Jadi na dipaboa dang na taringot sada kelompok na tarbagi, dung i dibahen gabe marsada. Alai, taringot dua kelompok na dibahen marsada do.
Ise do Gog na sian Magog?
Pangattusion na sebelumna: Gog na sian Magog i ma goar na dilehon tu Sibolis dung diusir ibana sian surgo.
Pangattusion na terbaru: Gog na sian Magog i manggombarhon gabungan ni akka bangso na lao menyerang naposo ni Debata di hasusaan bolon.
Alasan disesuaihon: Surirang taringot Gog paboahon na lao dilehon do Gog i gabe siallangon ni pidong siallang bakke jala na lao dikuburhon di tano on. On patuduhon dang suru-suruan Gog i. Asing ni i, serangan ni Gog on sarupa do tu serangan na lao dibahen akka bangso tu naposo ni Debata na disurat di bukku Daniel dohot Pangungkapon.—Dan. 11:40, 44, 45; Pgk. 17:14; 19:19.
Sarupa do bagas joro na di parnidaan ni si Hesekiel tu bagas joro na mulia na dibahas Apostel Paulus?
Pangattusion na sebelumna: Bagas joro na di parnidaan ni si Hesekiel sarupa do tu bagas joro na mulia na dibahas Apostel Paulus.
Pangattusion na terbaru: Bagas joro na diida si Hesekiel dang bagas joro na dibahas si Paulus na adong mulai sian taon 29 M. Alai parnidaan ni si Hesekiel i paboahon songon dia halak Jahudi ikkon mangulahon ibadat na sittong sesuai tu Patik ni si Musa. Anggo bagas joro na dibahas si Paulus, paboahon ulaon ni Jesus Sintua ni Malim i mulai sian taon 29 M sahat tu 33 M. Di parnidaan ni si Hesekiel dang adong dipaboa sintua ni malim. Na dipaboa disi, i ma songon dia ibadat na sittong dipadenggan mulai taon 1919. Jadi dang porlu talului aha na digombarhon sude hatorangan ni bagas joro na diida si Hesekiel i. Alai taparsiajari ma sian i standar ni Jahowa tu ibadat na sittong.
Alasan disesuaihon: Godang do beda ni bagas joro na diida si Hesekiel i tu bagas joro na dibahas si Paulus. Misalna, godang do binatang na dipelehon di bagas joro na diida si Hesekiel. Alai di bagas joro na dibahas si Paulus i, holan sada do pelean na dipelehon, jala holan ‘sahali do i ro di saleleng ni lelengna’. (Heb. 9:11, 12) Nungnga dilehon tu si Hesekiel parnidaan i marratus taon andorang so ro Jesus. Jala dang tikkina dope di tikki i Jahowa paboahon hasittongan taringot bagas joro na mulia na manggombarhon pengaturan ibadat na sittong.
