1, 2. (a) Boasa didok halak asing pangalaho ni si Hesekiel sian na biasana? (Ida gambar di mula ni parsiajaran.) (b) Aha do na lao dipatudu si Hesekiel?

NUNGNGA sahat be barita taringot Panurirang Hesekiel tu tonga-tonga ni halak Jahudi na diboan tu Babel. Muba do pangalaho ni si Hesekiel sian na biasana. Saleleng saminggu sai hundul ma ibana di tonga-tonga ni nasida, alai dang adong manang aha didok ibana. Toppu ma ibana jongjong, masuk tu jabu, jala makkurungi. Gabe bingung ma jolma mangida ibana. Dung i kaluar ma panurirang i sian jabuna. Dibuat ma sada batu bata, dipeakkon ma i di jolona, jala diukir ibana ma batu i. Dung i dibuat ma hau-hau, dipajongjong ma di sakaliling ni batu bata i. Alai dang adong didokkon ibana agia aha.​—Hes. 3:10, 11, 15, 24-26; 4:1, 2.

² Lam godang do halak na bingung mangida ibana. Adong ma na mandok, ‘Ai aha do lapatan ni ulaonna i?’ Di pudian ni ari, diboto nasida ma molo pangalaho ni si Hesekiel i sasittongna paboahon na lao masa do situasi na massai ngeri tu nasida. Ai muruk nama Jahowa tu nasida. Aha do huroa na lao masa? Aha do pengaruhna tu halak Israel najolo? Jala aha do pengaruhna tu halak na mangulahon ibadat na sittong saonari on?

3, 4. (a) Aha do tolu peragaan na dibahen si Hesekiel? (b) Songon dia do si Hesekiel patuduhon na lao dikepung Jerusalem?

³ Hira-hira taon 613 SM, disuru Jahowa ma si Hesekiel mambahen peragaan. Adong tolu na porlu diperagahon ibana lao patuduhon panguhuman ni Jahowa tu Jerusalem. Na parjolo, dikepung ma kota i. Na paduahon, susa ma pendudukna. Jala na patoluhon, dihancurhon ma kota i dohot pendudukna. * Tabahas ma na tolu on.

⁴ Dikepung ma Jerusalem. Didok Jahowa ma tu si Hesekiel, “Buat ma sada batu bata, peakkon ma i di jolom. . . . Songon na hona kepung ma bahen kota i.” (Jaha Hesekiel 4:1-3.) Batu bata i manggombarhon kota Jerusalem. Si Hesekiel manggombarhon tentara ni Babel na dipakke Jahowa. Disuru do muse si Hesekiel mambahen di sakaliling ni batu bata i pagar na sian hau, benteng, dohot miniatur ni akka masin lao manghancurhon tembok. Sudena on manggombarhon cara ni musu lao mangepung jala menyerang kota Jerusalem. Dibahen si Hesekiel do “tuangan na datar” sian bosi di holang-kolangna dohot kota i. On patuduhon songon bosi do gogo ni musu ni nasida. “Doppak kota i” do dibahen si Hesekiel bohina, on patuduhon na dialo ibana do kota i. Sudena on “gabe sada tanda di halak Israel”. Di tikki na so panagaman na lao adong ma masa tu nasida. Na lao dipakke Jahowa ma tentara ni musu mengepung Jerusalem, kota ni naposo ni Debata, inganan ni bagas joro i!

5. Songon dia do si Hesekiel memperagahon na lao masa tu penduduk ni Jerusalem?

⁵ Susa ma penduduk ni Jerusalem. Didok Jahowa ma tu si Hesekiel, “Buat ma gandum, barli, dua macam kacang, sekoi, dohot gandum na asing . . . bahen ma i gabe roti.” Dung i, “Timbang ma i jala allang ma 20 sekel [hira-hira 230 gram] ganup ari.” Didok Jahowa do muse, “Bahenokku ma habis sipanganon na disippan.” (Hes. 4:9-16) Di peragaan on si Hesekiel dang be manggombarhon tentara ni Babel, alai penduduk ni Jerusalem nama. Peragaanna i patuduhon na lao habis ma sipanganon di Jerusalem tikki dikepung kota i. Bahenon ni akka jolma ma roti sian akka bahan makanan na so biasa diallang. Alani susana tarpaksa do ikkon diallang nasida manang aha pe na juppang ni nasida. Sadia para do haraparon i? Si Hesekiel mandok, “Allangon ni akka natua-tua ma ianakkon ni nasida. Jala ianakkon ni nasida mangallang natua-tua ni nasida.” Godang ma halak susa, ai songon “anak panah” do haraparon na masa i, jala mate do nasida sude.​—Hes. 4:17; 5:10, 16.

6. (a) Aha do na dipatudu si Hesekiel sian peragaan na patoluhon i? (b) Aha do maksud ni paretta ni Debata na mandok ‘timbang jala bagi ma obukmi’?

⁶ Dihancurhon Jerusalem dohot pendudukna. Adong dua na dipatudu si Hesekiel di peragaan na patoluhon on. Na parjolo, diperagahon ibana do aha na lao diulahon Jahowa. Jahowa mandok tu ibana, “Buat ma podang na tajom. Jala bahen ma i gabe piso cukkur.” (Jaha Hesekiel 5:1, 2.) Tangan ni si Hesekiel na maniop podang i manggombarhon tangan ni Jahowa na lao manghukum  Jerusalem marhite tentara ni Babel. Na paduahon, diperagahon si Hesekiel ma aha na lao masa tu halak Jahudi. Songon on ma didok Jahowa, “Cukkur ma obukmi dohot janggutmi.” On patuduhon na lao diserang jala dihancurhon do halak Jahudi. Ai manggombarhon penduduk ni Jerusalem do obuk ni si Hesekiel i. Didok do muse tu si Hesekiel, “Timbang ma jala bagi ma [obukmi] gabe piga-piga bagian.” On patuduhon dang asal-asalan panguhuman na dibahen Jahowa tu Jerusalem. Nungnga direncanahon Ibana i, jala pasti hona tu sude pendudukna.

7. Boasa disuru Jahowa si Hesekiel mambagi obukna gabe tolu bagian, jala boasa marasing-asing diulahon ibana tu setiap bagian?

 ⁷ Boasa disuru Jahowa si Hesekiel mambagi obukna gabe tolu bagian? Jala boasa marasing-asing diulahon ibana tu setiap bagian? (Jaha Hesekiel 5:7-12.) On patuduhon, na lao marasing-asing do na masa tu penduduk ni Jerusalem i. Ditutung si Hesekiel do sapartolu sian obukna i. Ai on patuduhon na lao mate do di kota i sapartolu sian penduduk ni Jerusalem. Dung i, dijaljali ibana ma bagian na paduahon. On patuduhon, sapartolu sian penduduk ni Jerusalem lao dibunu do di luar ni kota. Jala bagian na patoluhon, dihabangkon ibana do tu alogo. On patuduhon, na lao malua do sapartolu sian penduduk ni Jerusalem, jala marserak tu akka bangso. Alai adong do “podang lao mangelele nasida”. On patuduhon, manang didia pe nasida tinggal dang na lao tenang ngolu ni nasida.

8. (a) Aha do barita na denggan na dipatudu sian peragaan ni si Hesekiel i? (b) Songon dia do barita na denggan i tutu saut?

⁸ Nang pe barita panguhuman na dipatudu si Hesekiel di peragaanna i, alai adong do barita na denggan na dipaboa ibana. Didok Jahowa do tu si Hesekiel, “Buat ma muse piga-piga obuk i jala bukkus ma i tu bagasan bajum.” (Hes. 5:3) Paretta on patuduhon, adong dope annon na mangolu halak Jahudi na marserak tu akka bangso i. Deba sian nasida na lao mulak do tu Jerusalem, dukkon sae masa penawanan na di Babel saleleng 70 taon. (Hes. 6:8, 9; 11:17) Tutu do saut surirang ni si Hesekiel i? Tutu. Dukkon martaon-taon malua akka halak na ditawan di Babel i, Panurirang Haggai mandok deba sian halak Jahudi na marserak i nungnga mulak tu Jerusalem. “Nungnga matua nasida” jala nasida do najolo na “hea mangida jabu i”, i ma bagas joro ni si Salomo. (Esra 3:12; Hag. 2:1-3) Dipastihon Jahowa do asa unang sappe mago ibadat na sittong i, songon na dijanjihonna i. Na lao dipaboa ma di Pasal 9 songon dia cara ni Jahowa paulakkon ibadat na sittong.​—Hes. 11:17-20.

9, 10. Aha do kaitan ni peragaan ni si Hesekiel i tu na masa di ari na naeng ro?

⁹ Akka na masa na diperagahon si Hesekiel paingotton hita tu akka na lao masa di ari na naeng ro na disurat di Bibel. Akka aha ma i? Songon na dibahen Jahowa tu Jerusalem, pakkeonna do  akka pamimpin politik na di portibi on lao menyerang sude agama palsu na di tano on. Di na so panagaman ni nasida do i bahenonna masa. (Pgk. 17:16-18) Tikki dihancurhon Jerusalem, didok do i “hasusaan na so hea dope masa”. Dos songon i ma “hasusaan bolon” dohot porang Armagedon, didok do i “hasusaan na so hea dope masa”.​—Hes. 5:9; 7:5; Mat. 24:21.

¹⁰ Dipaboa do di Bibel, malua do akka halak na mangihutton agama palsu i tikki dihancurhon organisasi ni nasida. Mabiar do nasida jala martabuni rap dohot halak na asing. (Sak. 13:4-6; Pgk. 6:15-17) Situasi ni nasida paingotton hita tu penduduk ni Jerusalem na marserak tu akka bangso songon obuk na ‘dihabangkon tu alogo’. Songon na tabahas di  paragraf 7, nang pe adong halak na selamat tikki dihancurhon Jerusalem, holan parsatokkinan do i. Dipakaluar Jahowa do “podang lao mangalele” nasida. (Hes. 5:2) Dos songon i ma, nang pe malua akka halak tikki dihancurhon agama palsu, alai dang adong sian nasida na boi selamat jala na boi martabuni sian podang ni Jahowa. Na lao mate do nasida sude di Armagedon, rap dohot halak na asing na dipatudos songon hambing.​—Hes. 7:4; Mat. 25:33, 41, 46; Pgk. 19:15, 18.

11, 12. (a) Songon dia do surirang ni si Hesekiel berpengaruh tu caratta mangida ulaon marbarita? (b) Aha do na muba sian barita na lao tapaboa haduan?

¹¹ Songon dia do surirang ni si Hesekiel berpengaruh tu caratta mangida ulaon marbarita saonari? Marsitutu ma hita saonari mangurupi akka halak asa boi gabe naposo ni Jahowa. Boasa? Ai otik nama tikkina boi tabahen ‘saluhut halak sian nasa bangso gabe sisean’ ni Jesus. (Mat. 28:19, 20; Hes. 33:14-16) Molo dung juppang tikkina dipakke Jahowa “tukkot” (pamimpin ni politik) mangalo akka agama, dang na lao tapaboa be barita na uli na parohon haluaon i. (Hes. 7:10) Dos songon halak na “bisu” ma hita di ulaon marbarita na uli, sarupa songon si Hesekiel na hea disuru asa unang makkatai manang na tu ise pe, jala dang paboahon barita na uli. (Hes. 3:26, 27; 33:21, 22) Dung dihancurhon agama palsu, “dilului akka halak ma parnidaan sian panurirang”, alai dang adong tudu-tudu na dilehon tu nasida asa boi selamat. (Hes. 7:26) Nungnga tarlambat be nasida. Dang i be tikkina lao mandapot tudu-tudu sisongon i, jala dang i be tikkina lao gabe sisean ni Kristus.

¹² Alai dang sae dope tugasta lao marbarita di tikki i. Boasa? Saleleng hasusaan bolon, mungkin mulai nama hita paboahon barita panguhuman tu akka halak. Dos do barita i songon udan es na balga. Barita on ma na gabe tanda na takkas di akka jolma na patuduhon lao ro nama ujung ni portibi na jahat on.​—Pgk. 16:21.

13. Boasa disuru Jahowa si Hesekiel manapping tu sabola kiri dohot tu sabola kanan?

¹³ Nungnga disurirangkon si Hesekiel songon dia Jerusalem lao dihancurhon. Alai dang holan i, dipaboa ibana do marhite  peragaanna andigan i masa. Disuru Jahowa do si Hesekiel manapping tu sabola kiri saleleng 390 ari, dung i manapping tu sabola kanan saleleng 40 ari. Sadari lapatanna sataon. (Jaha Hesekiel 4:4-6; 4 Mus. 14:34) Ganup ari do diulahon si Hesekiel peragaanna i lao patuduhon taon piga Jerusalem dihancurhon. Alai holan piga-piga jom do diulahon ibana i ganup ari. Mangulahon dosa do halak Israel saleleng 390 taon. Mungkin dimulai sian taon 997 SM, tikki tarbagi dua harajaon na 12 marga i. (1 Raj. 12:12-20) Mardosa do halak Juda saleleng 40 taon. Mungkin dimulai ma i sian taon 647 SM. Di taon i, ditugasson do si Jeremia gabe panurirang lao paingotton halak na di harajaon ni Juda. Dipaboa do tu nasida na lao dihancurhon nama harajaonna. (Jer. 1:1, 2, 17-19; 19:3, 4) Jadi molo dietong na 390 taon dohot na 40 taon i, marujung ma i di taon 607 SM. Di taon i do dihancurhon Jerusalem dos songon na disurirangkon Jahowa. *

14. (a) Songon dia do si Hesekiel patuduhon na pos rohana pasauton ni Jahowa hatana di tikkina? (b) Aha do na masa sebelum hancur Jerusalem?

 ¹⁴ Tikki dijalo si Hesekiel surirang taringot 390 ari dohot 40 ari i, mungkin dang diboto ibana dope taon piga Jerusalem lao dihancurhon. Alai piga-piga taon sebelum dihancurhon Jerusalem, mulak-ulak do dipaingot ibana halak Jahudi taringot panguhuman ni Jahowa na lao ro. Didok ibana do, “Nungnga juppang be tikkina.” (Jaha Hesekiel 7:3, 5-10.) On patuduhon pos do roha ni si Hesekiel, pasti pasauton ni Jahowa do i di tikkina. (Jes. 46:10) Dipaboa panurirang i do muse aha na lao masa sebelum dihancurhon Jerusalem. Ibana mandok, “Dang sae dope hasusaan na sada, nungnga ro hasusaan na asing.” Ala gok hasusaan na masa, gabe lam borat ma sitaonon ni akka halak, hancur ma agama dohot pamarettaon ni jolma na disi.​—Hes. 7:11-13, 25-27.

15. Dia do sian surirang ni si Hesekiel i naung saut mulai sian taon 609 SM?

¹⁵ Piga-piga taon dung dipaboa si Hesekiel na lao dihancurhon Jerusalem, mulai ma saut surirangna i. Taon 609 SM, dibege ibana ma naung diserang Jerusalem. Dipangolu do di tikki i tarompet lao paboahon asa marpungu sude penduduk ni Jerusalem mambela kota ni nasida. Alai songon na disurirangkon si Hesekiel i, “dang adong na lao marporang”. (Hes. 7:14) Dang adong dibahen nasida agia aha lao mampertahatton kotana i sian serangan ni tentara ni Babel. Adong do halak Jahudi na mandok na lao ro do Jahowa paluahon nasida. Ai najolo tikki ro tentara ni Asiria mangancam Jerusalem, dipakke Jahowa do suru-suruanna lao pamatehon hampir sude tentarana i. (2 Raj. 19:32) Alai anggo di tikki i, dang adong suru-suruan na ro mangurupi nasida. Dang sadia leleng dung dikepung, gabe songon ‘hudon na di ginjang ni api’ ma kota i. Jala akka pendudukna songon “jagal naung diseati” ma di bagasan ni kota i. (Hes. 24:1-10) Saleleng dikepung, massai susa do pendudukna. Jala dung salpu 18 bulan, dihancurhon ma kota i.

16. Songon dia do hita patuduhon na pos rohatta pasauton ni Jahowa hatana i pas di tikkina?

¹⁶ Aha do na boi taparsiajari sian surirang ni si Hesekiel on? Aha do kaitanna tu barita na tapasahat dohot tu cara ni halak manjalo barita i? Nungnga ditottuhon Jahowa andigan agama palsu dihancurhon, jala pasautonna do i pas di tikkina. (2 Ptr. 3:9, 10; Pgk. 7:1-3) Memang dang taboto tanggal piga i masa. Alai songon si Hesekiel, toktong ma taoloi Jahowa. Mulak-hulak ma tapaingot akka halak naung jonok ujung ni portibi on. Boasa porlu torus tapaingot nasida? Sarupa do alasanta songon si Hesekiel. * Tikki dipaboa ibana na lao dihancurhon Jerusalem, godang do halak na so porsea. (Hes. 12:27, 28) Alai di pudian ni ari, adong do piga-piga sian halak Jahudi na ditawan di Babel i na gabe mangulahon na sittong, jala gabe mulak tu huta ni nasida. (Jes. 49:8) Dos songon i ma, godang do halak di tikkinta on na so porsea lao  marujung portibi on. (2 Ptr. 3:3, 4) Nang pe songon i, saleleng adong dope tikki di jolma lao manangihon barita na sian Debata, toktong ma hita mangurupi akka halak na tulus rohana asa boi dapot ni nasida dalan tu hangoluan na salelengna.​—Mat. 7:13, 14; 2 Kor. 6:2.

17. Situasi na songon dia do na lao idaotta saleleng hasusaan bolon?

¹⁷ Surirang ni si Hesekiel on paingotton hita tu aha na lao masa annon tikki diserang organisasi ni agama. Tikki masa i, dang adong sian anggota ni agama i “na lao marporang”. “Gale ma tangan ni nasida sude . . . jala makkahitir.” Ai minta tolong do nasida, “Tuan, Tuan,” alai dang dialusi. (Hes. 7:3, 14, 17, 18; Mat. 7:21-23) Aha do muse na lao masa? (Jaha Hesekiel 7:19-21.) Jahowa mandok, “Dibolokkon nasida ma perak ni nasida tu akka dalan.” Dos songon na diulahon penduduk ni Jerusalem najolo, songon i ma bahenon ni halak di hasusaan bolon. Di tikki i botoon ni nasida ma, dang boi hepeng lao mambahen nasida selamat.

18. Songon dia do surirang ni si Hesekiel on mangurupi hita mamboto ulaon na uppetting?

 ¹⁸ Adong do parsiajaran na boi dapotmuna sian surirang ni si Hesekiel on? Ikkon taulahon do parjolo ulaon na uppetting. Pikkirhon ma on: Dung diida penduduk ni Jerusalem na lao hancur kota i, dung diida tarancam ngolu ni nasida, jala dung diboto dang boi arta mambahen nasida selamat, baru pe diboto nasida aha ulaon na uppetting na ikkon diulahon nasida. Dibolokkon nasida ma arta ni nasida, jala mulai ma ‘dilului parnidaan sian panurirang’, alai nungnga tarlambat be tikkina. (Hes. 7:26) Anggo hita asing do sian nasida. Sebelum dihancurhon portibi na jahat on, nungnga taboto na lao marujung satokkin nai portibi on. Ala porsea hita tu akka janji ni Debata, taulahon do akka ulaon na uppetting. Sibuk do hita papunguhon arta na di surgo. Ai i do na lao martahan saleleng ni lelengna jala dang na lao hea i dibolokkon “tu akka dalan”.​—Jaha Mateus 6:19-21, 24.

19. Aha do pengaruh ni surirang ni si Hesekiel tu hita saonari?

¹⁹ Aha do na boi taparsiajari sian surirang ni si Hesekiel taringot kehancuran ni Jerusalem? Surirang i paingotton hita, adong do batasna sadia leleng hita ikkon mangurupi halak gabe naposo ni Jahowa. Alani i saleleng adong dope tikki, ikkon tabahen do sian nasa tolapta lao mangurupi akka halak gabe sisean ni Jesus. Pasti las do rohatta tikki mangida halak na tulus rohana olo manomba Jahowa, Bapakta i. Alai nang pe dang adong halak na manangihon barita i, tatiru ma si Hesekiel. Torus ma tadok tu nasida, “Nungnga juppang be tikkina.” (Hes. 3:19, 21; 7:3) Hita pe ikkon toktong do taandalhon Jahowa. Toktong ma tabahen ibadat na sittong i na uppetting di ngolunta.​—Ps. 52:7, 8; Poda 11:28; Mat. 6:33.