1-3. Aha do na lao dipatudu Jahowa tu si Hesekiel di Jerusalem jala boasa? (Ida gambar dohot hatorangan di Bagian 2.)

ALA anak ni malim do Panurirang Hesekiel, pasti diattusi ibana do Patik ni si Musa. Takkas do diboto ibana bagas joro na di Jerusalem, jala songon dia ibadat na sittong diulahon disi. (Hes. 1:3; Mal. 2:7) Alai taon 612 SM, adong ma na masa tu bagas joro ni Jahowa. Tarsonggot do sude halak Jahudi na setia mambege i, termasuk ma i si Hesekiel.

² Lomo do roha ni Jahowa naeng patuduhon tu si Hesekiel naung para situasi di bagas joro, asa boi dicaritahon ibana na masa i tu “akka pangituai ni Juda” na ditawan. Tikki i, marpungu do nasida di jabuna. (Jaha Hesekiel 8:1-4; Hes. 11:24, 25; 20:1-3) Marhite tondi parbadia dibahen Jahowa ma si Hesekiel mandapot parnidaan. Di parnidaanna i, diboan ma si Hesekiel sian jabuna di Tel-abib, na di labbung ni Sunge Hebar na di Babel tu bagas joro na marratus kilometer di sabola barat. Diboan Jahowa ma si Hesekiel tu gerbang ni alaman na di bagasan na menghadap tu sabola utara. Sian i ma parjolo Jahowa patuduhon aha na masa di bagas joro i.

 ³ Adong opat situasi na diida si Hesekiel na patuduhon na so badia be ibadat ni bangso i. Tarsonggot do ibana mangida. Aha do huroha na masa tu ibadat na sittong i? Aha do na boi taparsiajari sian parnidaan i? Rap ma hita dohot si Hesekiel mangida na masa i. Alai na parjolo, porlu do taboto aha na layak jaloon ni Jahowa sian akka sisomba Ibana.

4. Aha do na dipangido Jahowa sian sisomba Ibana?

⁴ Hira-hira 900 taon sebelum tikki ni si Hesekiel, nungnga takkas dipaboa Jahowa aha na ikkon diulahon sisomba Ibana. Di patik na paduahon i, didok Jahowa do tu halak Israel: * “Ai Au do Jahowa Debatamuna. Hupangido do tu hamu asa holan Au Debata na disomba hamu.” (2 Mus. 20:5) Hata “holan Au Debata na disomba”, patuduhon dang lomo roha ni Jahowa molo disomba nasida debata na asing. Songon na tabahas di Pasal 2, syarat na parjolo di ibadat na sittong, i ma ikkon holan Jahowa do tasomba. Ikkon tabahen do Ibana na uppetting di ngolutta. (2 Mus. 20:3) Jadi dipangido Jahowa do asa badia ibadat na diulahon tu Ibana. Dang boi dipamasuk manang dicampur ulaon ni ibadat na sittong tu ibadat na so sittong. Taon 1513 SM, olo do halak Israel mambahen parjanjian patik dohot Jahowa. Marjanji do halak Israel asa holan Jahowa na ikkon disomba nasida. (2 Mus. 24:3-8) Setia do Jahowa tu parjanjianna i, jala diharappon Ibana do setia naposona tu parjanjian i.​—5 Mus. 7:9, 10; 2 Sam. 22:26.

5, 6. Boasa holan Jahowa na layak disomba halak Israel?

⁵ Masuk akkal do molo dituntut Jahowa tu halak Israel asa holan Ibana na disomba nasida. Boasa? Ala Pargogo na So Hatudosan do Jahowa i, Parhuaso Natumimbul jala Silehon ngolu tu toppaanna. (Ps. 36:9; Ul. 17:28) Jahowa do muse Sipalua ni halak Israel. Tikki dilehon Ibana sappulu patik i tu nasida dipaingot do nasida, “Au do Jahowa Debatamuna, na mamboan hamu kaluar sian Mesir ingananmuna gabe hatoban.” (2 Mus. 20:2) Jadi holan Jahowa do na layak disomba halak Israel.

⁶ Dang muba dope Jahowa. (Mal. 3:6) Dipangido Ibana dope tu akka naposona asa holan Ibana na disomba. Jadi boi do dibayakkon hamu songon dia pakkilalaan ni Jahowa, tikki mangida opat situasi on.

7. (a) Aha do na diulahon halak Jahudi na murtad di gerbang ni bagas joro na di sabola utara, jala songon dia do pakkilalaan ni Jahowa? (Ida gambar di mula ni parsiajaran.) (b) Wajar do Jahowa muruk tu nasida? (Ida surat na di toru.)

⁷ Jaha Hesekiel 8:5, 6. Tarsonggot do si Hesekiel mangida na masa i. Di gerbang ni bagas joro na di sabola utara, diida ibana ma halak Jahudi na murtad manomba patung. Patung i mungkin  tiang sisombaon na manggombarhon dewi Asera na disomba halak Kanaan jala na dianggap istri ni Baal. Marhite mangulahon i, nungnga dilanggar halak Israel be parjanjian nasida dohot Jahowa. Nungnga disomba nasida be patung, hape holan Jahowa do na layak disomba nasida. Jadi wajar do molo gabe muruk Jahowa tu nasida. * (5 Mus. 32:16; Hes. 5:13) Bayangkon ma, lobi sian 400 taon, bagas joro i do tandana na maringanan Jahowa di tonga-tonga ni nasida. (1 Raj. 8:10-13) Hape saonari diboan nasida do akka patung tusi. Dibahen nasida do Jahowa gabe ‘mandao sian ingananna na badia i’.

8. Aha do kaitan ni patung na di parnidaan ni si Hesekiel tu tikkinta saonari?

⁸ Muruk do Jahowa alani akka patung na di parnidaan ni si Hesekiel. Jadi adong do kaitan ni parnidaanna i tu tikkinta saonari? Tikki taida halak Juda na murtad, gabe taingot do pangalaho ni akka gareja na mangakku Kristen. Didok do disomba nasida Debata, alai disomba do akka patung. Jadi sia-sia do ibadatna i. Dos songon tu halak Juda na murtad i, pasti muruk do Jahowa mangida nasida. Ai dang muba dope Jahowa. (Jak. 1:17) Pasti mandao do Jahowa sian akka gareja i!

9, 10. Aha do sipasingot na boi tadapot sian parnidaan taringot manomba patung na di bagas joro i?

⁹ Sipasingot aha do na boi taparsiajari sian halak Juda na murtad i? Molo tutu holan Debata Jahowa na tasomba, ikkon ‘tapasiding do ulaon manomba patung’. (1 Kor. 10:14) Olo do ra tadok, ‘Dang hea hupakke patung tikki manomba Jahowa!’ Alai dang holan manomba patung na didok manomba debata na so sittong. Adong dope ulaon na asing. Menurut sada referensi ni Bibel, molo tabahen adong na ummarga jala na uppetting sian manomba Debata, nungnga tasomba be debata na so sittong. Jadi manang aha pe ulaon na uppetting tabahen di ngolutta lao manggattihon ulaon manomba Jahowa, nungnga didok be hita manomba debata na so sittong, termasuk ma i arta, hepeng, seks, manang hiburan. (Mat. 6:19-21, 24; Eps. 5:5; Kol. 3:5) Jadi ikkon tapastihon do sude ulaonta asa unang sappe tasomba debata na so sittong. Ai holan Jahowa do na layak tasomba sian nasa rohatta!​—1 Joh. 5:21.

¹⁰ Ulaon ‘na jorbut jala mambahen magigi’ do situasi na parjolo i. Alai didok Jahowa do muse tu panurirangna i, “Lao idaonmu dope akka ulaon na unjorbut na mambahen Au magigi.” Aha dope ulaon na unjorbut sian situasi i?

11. Aha do na diida si Hesekiel dung diboan ibana tu alaman na di bagas joro?

¹¹ Jaha Hesekiel 8:7-12. Sian gerbang i diboan ma si Hesekiel tu alaman na di bagasan, tu labbung ni langgatan na di bagas joro. Dilubangi ibana ma sada tembok jala diida ma akka gambar  na diukir di tembok i. Diida ma “gambar ni sude binatang na mangissir, akka binatang na massai huhagigihon, dohot sude patung na huhagigihon”. * Sude ukiran i manggombarhon akka dewa. Alai na unjorbut na diida si Hesekiel, adong “70 halak pamimpin ni halak Israel” na jongjong di “inganan na golap”, jala manutung dupa tu akka dewa i. Menurut Patik ni si Musa, uap ni dupa na angur manggombarhon tangiang na palasson roha ni Jahowa. (Ps. 141:2) Alai anggo dupa na dipelehon tu akka dewa i, songon bau busuk do i di Jahowa. Jadi magigi do Ibana tu tangiang ni pamimpin ni halak Israel na 70 halak i. (Poda 15:8) Dioto-otoi akka pamimpin i do diri ni nasida sandiri. Didok do, “Dang diida Jahowa hita.” Hape takkas do diida Jahowa nasida, bahkan dipatudu Debata do tu si Hesekiel ulaon ni nasida na jahat i!

12. Boasa porlu hita toktong setia nang pe di “inganan na golap”, jala ise do gabe sitiruon lao mangulahon on?

¹² Aha do na boi tapasiajari sian 70 pamimpin ni halak Israel na jahat i? Asa ditangihon Debata tangiangta, jala asa badia ibadatta, ikkon torus do hita setia nang pe di “inganan na golap” manang tikki sahalakta. (Poda 15:29) Taingot ma, aha pe na taulahon,  diida Jahowa do i. Molo pos do rohatta na tutu adong Debata, dang bahenotta ulaon na mambahen sogo rohana, nang pe tikki sahalakta. (Heb. 4:13) Tarlumobi akka sintua na di huria, ikkon gabe sitiruon na denggan do nasida tikki mangihutton prinsip na sian Bibel. (1 Ptr. 5:2, 3) Tottu diharappon sude halak na di huria do molo akka sintua i toktong mangihutton prinsip ni Bibel nang pe di “inganan na golap”, manang tikki dang adong na mamparrohahon nasida. Ai akka sintua i do na jongjong lao mangajari huria jala na mamimpin di parpunguan.​—Ps. 101:2, 3.

13. Aha do na diulahon akka borua na murtad di parnidaan ni si Hesekiel?

¹³ Jaha Hesekiel 8:13, 14. Dung dipatudu Jahowa situasi na dua i, didok ma muse, “Idaonmu dope ulahonon ni nasida ulaon na mambahen Au magigi, jala na unjorbut sian on.” Aha do muse na diida si Hesekiel? Di “pintu masuk na di gerbang sabola utara, na di jabu ni Jahowa”, diida ma “akka borua hundul jala diandungi nasida do Dewa Tamus”. Tamus, i ma dewa ni halak Mesopotamia. Dewa on dianggap hallet ni si Istar, dewi kesuburan. * Ulaon ni akka borua ni halak Israel na mangandungi i, adong do kaitanna tu ritual ibadat lao mangingot hamamate ni si Tamus. Di bagas joro do diulahon nasida ibadat na tu si Tamus i. Alai dang na gabe badia ibadat na so sittong i, nang pe diulahon di bagas joro. Magigi do Jahowa mangida ulaon ni akka borua na murtad i!

14. Aha do na boi taparsiajari sian cara ni Jahowa mangida ulaon ni akka borua i?

¹⁴ Aha do na boi taparsiajari sian cara ni Jahowa mangida ulaon ni akka borua i? Asa badia ibadatta, dang boi tacampur ulaon ni ibadat na so sittong tu ulaonta manomba Jahowa. Dang boi hita parsidohot nanggo saotik pe tu perayaan na sian agama palsu. Attong porlu do taboto sian dia ro perayaan i? Porlu! Mungkin molo taida, dang pola adong na sala sian kebiasaan na diulahon di akka perayaan songon Natal, Paska, dohot ulang tahun. Alai taingot ma, nungnga diida Jahowa sude kebiasaan na so sittong na gabe asal-usul ni akka perayaan i. Toktong do magigi Jahowa mangida sude kebiasaan na so sittong i, nang pe nungnga leleng akka jolma mangulahon i, manang marsitutu nasida mancampur i tu ulaon ibadat na sittong.​—2 Kor. 6:17; Pgk. 18:2, 4.

15, 16. Aha do na diulahon bawa na 25 halak i, jala boasa ulaonna i mambahen haccit roha ni Jahowa?

¹⁵ Jaha Hesekiel 8:15-18. Sebelum dipaboa situasi na parpudi i tu si Hesekiel, didok Jahowa ma, “Idaonmu dope ulahonon ni nasida ulaon na unjorbut jala na mambahen Au magigi.” Olo do ra ro tu pikkiran ni si Hesekiel, ‘Ai ulaon aha dope na ujorbut sian on?’ Sian alaman na di bagasan i, diida ibana ma adong  25 bawa di pintu masuk ni bagas joro. Marsomba do nasida tu “mataniari na di sabola timur”. Keterlaluan do na binahen ni nasida i. Dang diargai nasida be Jahowa. Boasa boi tadok songon i?

¹⁶ Bayakkon ma situasina: Mangadop tu sabola timur do dibahen pintu masuk ni bagas joro i. Jadi tikki masuk sasahalak tu bagas joro, tottu mangadop tu sabola barat do ibana, jala dipudihon ma tu sabola timur. Alai “manundali joro ni Jahowa” do anggo bawa na 25 halak i. Jala mangadop tu sabola timur do nasida manomba mataniari. Jadi nungnga dipudihon nasida be Jahowa, ai bagas joro i do “jabu ni Jahowa”. (1 Raj. 8:10-13) Halak na murtad do bawa na 25 halak i. Dang diargai nasida be Jahowa. Nungnga dilanggar be paretta na di 5 Musa 4:15-19. Nungnga dibahen nasida haccit roha ni Jahowa. Ai sasittongna ikkon holan Ibana do Debata na disomba nasida!

17, 18. (a) Aha do na boi taida sian akka halak na manomba mataniari i? (b) Aha do akibat ni pangalaho ni halak Juda na murtad?

¹⁷ Aha do na boi taida sian akka halak na manomba mataniari i? Asa toktong badia ibadatta, porlu do tajalo tu Jahowa bisuk dohot pangattusion. Porlu do taingot, ‘dos songon mataniari do Debata Jahowa’, jala hatana dos songon cahaya na mambahen “tiur” dalanta. (Ps. 84:11; 119:105) Dibahen Jahowa do hita marbisuk marhite hatana dohot akka publikasi na diparade organisasina. On ma na mangurupi hita mambahen keputusan na denggan, na mambahen ngolutta marlas ni roha, jala boi mandapot hangoluan salelengna di ari na naeng ro. Molo talului bisuk na sian portibi on, dos ma hita songon na mamudihon Jahowa. Molo taulahon i, haccit do roha ni Jahowa. Pasti dang lomo rohatta mangulahon i! Parnidaan ni si Hesekiel i pe gabe sipasingot do tu hita, asa unang mardongan tu halak na murtad, i ma akka halak naung manadikkon hasittongan.​—Poda 11:9.

¹⁸ Nungnga diida si Hesekiel be opat situasi na massai jorbut. Sian ulaon manomba patung dohot ibadat na so sittong na diidana i, tarida do naung massai para ibadat ni halak Juda, jala nungnga murtad nasida. Ala dang badia be ibadat ni nasida, sega ma parale-aleon ni nasida tu Jahowa. Alai dang holan i, ibadat na so sittong i mambahen pangalaho ni nasida lam jahat. Jadi dang heran be hita molo diulahon halak Israel godang hajahaton. Akibatna, dang holan parale-aleon ni nasida tu Jahowa na sega, alai dohot do tong parale-aleon ni nasida tu dongan jolma. Saonari tabahas ma pangalaho ni halak Juda naung murtad i.

19. Aha do na disurat si Hesekiel taringot pangalaho ni naposo ni Jahowa di tikki i?

¹⁹ Jaha Hesekiel 22:3-12. Nungnga sega be pangalaho ni sude halak na di bangso i, mulai sian akka pamimpinna sahat tu rakyatna. Dipakke akka pamimpin ni Israel do huaso ni nasida lao  mangusehon mudar ni halak na so marsala. Jala akka rakyatna pe dohot do dang mangihutton Patik ni Debata. Akka ianakkon ni bangso i ‘mangaleai omak dohot bapak ni nasida’. Mangulahon seks do nasida tu anggota keluargana. Dioto-otoi halak Israel i do tong halak na sian bangso na asing. Kejam do nasida tu na so marama, dohot tu janda. Akka bawa ni halak Israel mangulahon seks dohot istri ni donganna. Holan hepeng do na dipikkiri nasida. Manjalo suap do nasida, jala tikki dilehon hepeng lao dipinjam, dibahen nasida do timbo bungana. Boi ma tabayakkon songon dia haccit ni roha ni Jahowa mangida pangalahona i. Ai gabe naposona sandiri do na mandege-dege Patikna i. Laos so boi do diattusi nasida na holong rohana umbahen na dilehon Patikna i tu nasida. Marhite si Hesekiel didok Jahowa ma tu bangso na jahat i, “Tutu, nungnga lupa hamu tu Au.”

20. Aha do kaitan ni hata ni si Hesekiel taringot pangalaho ni halak Juda na murtad tu hita saonari?

²⁰ Aha do kaitan ni halak Juda na murtad i tu hita saonari? Pangalaho ni halak Juda na murtad i paingotton hita tu pangalaho ni halak na lam sega saonari on. Lomo-lomo ni akka pamimpin politik do mamakke huasona. Kejam do nasida tu rakyat. Akka pamimpin agama, tarlumobi pamimpin gareja, martangiang do nasida tu Debata asa dipasu-pasu porang na pamatehon marjuta  halak. Dang diihutton nasida aturan ni Bibel na takkas taringot seks. Akibatna, lam sega ma pangalaho ni halak na di portibi on. Pasti sarupa do hata ni Jahowa tu nasida songon na tu halak Juda i, “Tutu, nungnga lupa hamu tu Au.”

21. Aha do na boi taparsiajari sian pangalaho ni halak Juda na so umboto ila?

²¹ Aha do parsiajaran na boi tadapot sian pangalaho ni halak Juda na so umboto ila i? Asa dijalo Jahowa ibadatta, ikkon badia do hita di saluhut ulaonta. Alai dang mura mangulahon on di tonga-tonga ni portibi na jahat on. (2 Tim. 3:1-5) Takkas ma taboto, sogo do roha ni Jahowa tu sude pangalaho na jahat. (1 Kor. 6:9, 10) Jadi taihutton ma aturan na dibahen Jahowa, ala tahaholongi do Ibana dohot patikna. (Ps. 119:97; 1 Joh. 5:3) Ai molo taulahon do pangalaho ni halak na so umboto ila, na so tahaholongi do Debata disi, Debata na ias jala na badia i. Tottu dang lomo rohatta gabe didok Jahowa tu hita, “Tutu, nungnga lupa hamu tu Au.”

22. (a) Aha do na lao taulahon dung taida cara ni Jahowa patuduhon pangalaho ni halak Juda i? (b) Aha do na lao tabahas di pasal na mangihut?

²² Nungnga dipatudu Jahowa be naung murtad halak Juda jala naung jahat pangalaho ni nasida. Adong do piga-piga na boi taparsiajari sian i. Pasti lam pos ma rohatta, jala lam marsitutu ma hita manomba Jahowa. Ai holan Ibana do na layak lao disomba. Alani i, ikkon tapastihon do sude ulaonta, asa unang gabe tasomba debata na so sittong. Ikkon toktong do sesuai pangalahotta tu aturan ni Jahowa. Attong aha do na diulahon Jahowa tu bangsona na so setia i? Dung diboan si Hesekiel tu akka inganan na di bagas joro, didok Jahowa ma, “Muruk situtu ma Au tu nasida.” (Hes. 8:17, 18) Porlu do taboto hukuman aha na dibahen Jahowa tu halak Juda. Ai hukuman na sarupa do lao bahenonna tu portibi na jahat on. Di pasal na mangihut, tabahas ma hukuman aha na dibahen Jahowa tu halak Juda.