Dung tolu ari si Natanael gabe sisean ni Jesus, borhat ma Jesus dohot angka siseanna na parjolo i tu huta ni nasida di Galilea. Laho ma nasida marpesta tu Kana, huta ni si Natanael. Huta Kana i adong di sabola utara ni Nasaret, inganan na mardolok-dolok jala inganan ni Jesus magodang. Digokkon do Jesus dohot angka siseanna tu pesta parbogason na di Kana.

Ro do si Maria ina ni Jesus tu pesta i. Ra, dohot do ibana marhobas disi. Ai martondong dope nasida dohot na marpesta i. Alani i, tingki habis anggur hatop do diboto si Maria. Didok ibana ma tu Jesus, “Ndang adong be anggur ni nasida.”​—Johannes 2:3.

Sasintongna, disuru si Maria do asa diurupi Jesus nasida. Alai, dialusi Jesus ma, “Ndang hita na mamingkirhon i, inang.” (Johannes 2:4) Ala Raja na pinillit ni Debata do ibana, ingkon hata ni Amana na di surgo i do oloan ni Jesus. Ndang hata ni donganna manang hata ni keluargana. Gabe dipasombu si Maria ma Jesus mangulahon lomo ni rohana. Jala didok ma tu parhobas na di pesta i, “Bahen hamu ma manang aha na nidokna tu hamu.”​—Johannes 2:5.

Adong do disi onom gunsi inganan ni aek. Sada gunsi boi marisi 40 liter. Didok Jesus ma tu parhobas i, “Isi hamu ma aek tu angka gunsi i.” Didok Jesus ma muse, “Buat ma otik sian gunsi i, jala lehon ma tu ketua ni parhobas.”​—Johannes 2:7, 8.

Longang ma roha ni ketua ni parhobas i, ai denggan situtu do anggur i. Alai ndang diboto ibana marhite tanda halongangan manang mukjizat do anggur i dibahen. Dijou ibana ma pangoli i, jala ninna ma, “Sude do halak mangalehon anggur na dumenggan parjolo. Alai dung mabuk angka tamu i, dilehon ma anggur na hurang tabo daina. Hape ia ho, disimpan ho dope anggur na dumenggan sahat tu saonari.”​—Johannes 2:10.

I ma tanda halongangan na parjolo sahali na binahen ni Jesus. Lam togu ma haporseaon ni angka sisean ni Jesus dung diida nasida tanda i. Dung i, laho ma Jesus dohot inana dohot angka anggina tu kota Kapernaum na di sabola utara ni topi Laut Galilea.