Ndang porsea halak Jahudi na dipamalum Jesus baoa na mapitung i. Alani i, dijou nasida ma natua-tuana. Diboto natua-tuana do, olo do gabe dipakaluar nasida “sian sinagoga” alani on. (Johannes 9:22) Gabe susa ma nasida di parhepengon jala ndang adong be na mandongani nasida.

Dung i disungkun halak Parise ma, “Anakmuna do on? Tutu do ibana mapitung sian mulai tubu? Songon dia do boi ibana marnida saonari?” Dialusi natua-tuana ma, “Anaknami do ibana jala mapitung do ibana sian mulai tubu. Alai ndang huboto hami songon dia ibana boi marnida saonari, jala ndang huboto hami ise na mambahen ibana boi marnida.” Nang pe nunga dipaboa baoa i aha na masa tu natua-tuana, manat do natua-tuana mangalusi nasida, ninna ma, “Sungkun hamu ma ibana, ai nunga balga ibana jala ibana sandiri ma na mangalusi.”​—Johannes 9:19-21.

Disungkuni halak Parise ma muse baoa i laho mangalului hatorangan mangalo Jesus. Didok ma, “Pasangap ma Debata, dok ma na sintong. Na huboto hami, pardosa do halak na pamalumhon ho i.” Alai didok baoa i ma, “Ndang huboto manang na pardosa ibana manang na ndang. Holan on do na huboto, mapitung hian do ahu, alai saonari nunga boi marnida.”​—Johannes 9:24, 25.

Dung i didok halak Parise ma, “Aha do dibahen ibana tu ho? Songon dia do dibahen pamalumhon matami?” Tangkas ma didok baoa i, “Nunga hupaboa tu hamu, alai ndang olo hamu manangihon. Boasa ma naeng begeonmuna i muse? Na naeng dohot do hamu gabe siseanna?” Muruk ma halak Parise mandok, “Ho do siseanna, molo hami sisean ni si Musa do. Huboto hami, mangkatai do Debata tu si Musa. Alai ndang huboto hami manang sian dia ibana ro.”​—Johannes 9:26-29.

Gabe didok baoa i ma, “Bingung do ahu mamereng hamu, ndang diboto hamu manang na sian dia ibana ro, hape nunga dibahen ibana marnida matangku.” Dung i didok baoa i ma, “Taboto do, ndang ditangihon Debata pardosa, alai ditangihon Ibana do manang ise na mangkabiari Ibana dohot na mangulahon lomo ni rohana. Sian najolo, ndang hea dope binege adong na boi pamalumhon halak na mapitung sian mulai tubu.” Ujungna didok ma, “Molo ndang ro sian Debata ibana, ndang boi bahenonna songon i.”​—Johannes 9:30-33.

Ndang taralusi halak Parise hata ni baoa i. Gabe didok nasida ma, “Gok dosa do ho tubu, alai naeng ajaranmu hami?” Dung i, dipakaluar nasida ma ibana.​—Johannes 9:34.

Tingki dibege Jesus na masa, didapothon ibana ma baoa i jala disungkun ma, “Porsea do ho tu Anak ni jolma i?” Dialusi baoa i ma, “Ise do ibana Amang, asa boi ahu porsea tu ibana?” Dung i tangkas ma didok Jesus, “Nunga diida ho ibana. Sasintongna, ibana do na mangkatai tu ho.”​—Johannes 9:35-37.

Didok baoa i ma, “Porsea do ahu Tuan.” Marsinggang ma ibana di jolo ni Jesus, patuduhon na porsea jala dipasangap ibana Jesus. Dung i didok Jesus ma, “Laho manguhumi do ahu ro tu portibi on, asa marnida angka na mapitung jala asa mapitung angka na marnida.”​—Johannes 9:38, 39.

Diboto halak Parise do na so mapitung nasida. Alai dirimpu nasida do na didok Jesus panogu-nogu na so denggan nasida. Alani i disungkun nasida ma, “Na nidokmu nuaeng, na  dohot do hami mapitung?” Dialusi Jesus ma, “Molo mapitung hamu, ndang mardosa hamu. Alai ala didok hamu do, ‘Marnida do hami.’ Gabe tongtong ma hamu mardosa.” (Johannes 9:40, 41) Autsugari ndang guru ni halak Israel nasida, ndang mardosa nasida molo ndang porsea na Messias do Jesus i. Alai tangkas do diboto nasida Patik. Alani i, balga do dosa ni nasida.