Di Jerusalem dope Jesus tingki ari Sabbat. Tingki mardalan ibana dohot angka siseanna, diida nasida ma pangido-ido na mapitung sian na tubu. Disungkun siseanna ma tu Jesus, “Guru, alani dosa ni ise do umbahen na mapitung ibana sian mulai tubu? Alani dosana do manang dosa ni natua-tuana?”​—Johannes 9:2.

Sungkun-sungkun do roha ni angka sisean i, na adong do dosa ni sasahalak andorang so tubu umbahen na masa songon i? Dialusi Jesus ma, “Ndang alani dosana manang dosa ni natua-tuana, alai asa tarida do ulaon ni Debata marhite ibana.” (Johannes 9:3) Ndang ala mangulahon dosa ibana manang natua-tuana umbahen na mapitung ibana. Ala naung mardosa si Adam, sude ma jolma gabe mardosa. Susa ma nasida jala adong ma na mapitung. Alai marhite pamalumhon na mapitung i dohot pamalumhon angka na marsahit, gabe boi ma dipatuduhon Jesus huaso ni Debata.

Dipatudu Jesus do na ringkot situtu mangulahon on. Didok ibana, “Saleleng arian dope ingkon taulahon do ulaon ni Ibana na marsuru ahu. Molo dung borngin, ndang adong be manang ise na boi karejo. Saleleng di portibi on dope ahu, ahu do panondang ni portibi on.” (Johannes 9:4, 5) Tutu, ndang adong na boi ulahonon ni Jesus molo dung mate ibana, dos songon na di haholomon. Nang pe songon i, ibana do panondang ni portibi on.

Olo do Jesus pamalumhon baoa i? Olo! Ditijuri Jesus ma tano, dilala ma i jala dibahen ma tu mata ni baoa i. Dung i didok ma, “Laho ma ho marsuap tu kolam Siloam.” (Johannes 9:7) Diulahon baoa i ma na nidok ni Jesus jala marnida ma ibana! Las situtu ma rohana, ala on ma parjolo sahali ibana marnida.

Gabe longang ma roha ni angka halak na jonok tu jabuna dohot na mananda ibana. Didok nasida ma, “Nda on do halak na sai hundul mangido-ido i?” Adong ma na mandok, “Ibana do i.” Na asing muse mandok, “Ndang ibana i, na suman do tu ibana.” Alai didok baoa i ma, “Ahu do i.”​—Johannes 9:8, 9. 

Gabe disungkun nasida ma, “Songon dia gabe boi ho marnida?” Dialusi ibana ma, “Adong sahalak baoa na margoar Jesus, diapushon ibana ma gambo tu matangku, dung i disuru ma ahu marsuap tu kolam Siloam. Laho ma ahu marsuap gabe boi ma ahu marnida.” Disungkun nasida ma muse, “Didia do ibana?” Dialusi baoa i ma, “Ndang huboto.”​—Johannes 9:10-12.

Dung i, diboan nasida ma baoa i tu halak Parise, ai naeng botoon ni nasida do boasa boi  ibana marnida. Dipaboa baoa i ma, “Diapushon ibana ma gambo tu matangku, dung i marsuap ma ahu gabe boi ma ahu marnida.” Las ma nian roha ni halak Parise ala nunga malum pangido-ido i. Alai adong ma sian nasida na manginsaki Jesus, didok ma, “Ndang sian Debata halak na mambahen on, ai ndang diradoti ibana ari Sabbat.” Alai na asing mandok, “Sian dia ma boi halak pardosa mambahen tanda halongangan na songon on?” (Johannes 9:15, 16) Gabe marsalisi ma nasida.

Disungkun nasida ma muse tu baoa i, “Songon dia do pandapotmu taringot tu ibana ala nunga dibahen ho marnida?” Tangkas ma didok baoa i, “Panurirang do ibana.”​—Johannes 9:17.

Alai ndang porsea halak Jahudi. Dirimpu nasida do naung sahata baoa on dohot Jesus laho mangoto-otoi halak. Disungkun nasida ma tu natua-tua ni baoa i, tutu manang ndang ibana mapitung sian na tubu.