Di timur ni Dolok Jetun, hira-hira tolu kilometer sian Jerusalem, adong ma sada huta na margoar Betania. (Johannes 11:18) Laho ma Jesus tusi, tu jabu ni si Marta dohot si Maria na marhaha maranggi. Marale-ale do Jesus tu nasida dohot tu itona si Lasarus. Las do roha ni nasida di haroro ni Jesus.

Sada hasangapon do molo ro Messias tu jabunta. Alani las ni roha ni si Marta, diparade ma godang sipanganon. Tingki mangalompa ibana, hundul do si Maria manangihon di jonok ni pat ni Jesus. Alani i, didok si Marta ma tu Jesus, “Tuan, na so parduli do ho dipasombu anggingki sahalakku mangaradoti angka ulaon on? Suru jo ibana mangurupi ahu.”​—Lukas 10:40.

Alai si Marta do na dipasingot Jesus asa unang habis tingkina paradehon sipanganon. Didok ma, “Marta, Marta, godang nai diholsohon ho. Hape otik do na tahaporluhon, gariada sada pe sae do. Alai si Maria, dipillit ibana do na dumenggan jala ndang buaton i sian ibana.” (Lukas 10:41, 42) Tangkas do dipaboa Jesus, ndang porlu habis tingki paradehon godang sipanganon. Ai otik pe sipanganon, sae do.

Denggan do na diulahon si Marta, alani burjuna do dibahen songon i. Alai ala holan na mangalompa, gabe ndang ditangihon ibana be Anak ni Debata! Na denggan do na pinillit ni si Maria jala marlaba do i tu ibana saleleng ni lelengna. Parsiajaran na ringkot do on di hita.

Di tingki na asing, dipaboa Jesus ma muse parsiajaran na ringkot. Ro ma sahalak siseanna mandok, “Tuan, ajari ma hami martangiang, songon si Johannes diajari do angka siseanna martangiang.” (Lukas 11:1) Sada satonga taon naung salpu nunga diajarhon Jesus taringot martangiang tingki marjamita ibana di dolok. (Mateus 6:9-13) Alai olo do ra ndang disi sisean i manangihon jamita i. Alani i, dipaboa Jesus ma muse i jala dipaboa ma ringkot ni sai martangiang marhite sada tudosan.

“Autsura adong sian hamu na laho tu jabu ni donganna di tonga borngin jala mandok, ‘Dongan, hupinjam jolo tolu rotimi, ai ro donganku sian pardalananna jala ndang adong silehononku tu ibana.’ Alai dialusi ibana ma sian bagasan, ‘Unang susai ahu. Nunga dikunci pintu jala nunga modom ahu dohot angka gellengku. Ndang tarbahen ahu hehe laho mangalehon manang aha di ho.’ Hudok ma tu hamu, nang pe donganna hamu ndang olo ibana hehe laho mangalehon manang aha tu hamu. Alai ala sai dijugulhon hamu mangido, gabe hehe do ibana jala lehononna do na porlu di hamu.”​—Lukas 11:5-8.

Tudosan on ndang patuduhon na so olo Jahowa manangihon pangidoan ni ale-alena. Alai molo marsitutu hita mangido tu donganta na so olo manangihon pangidoanta, olo do gabe dilehon pangidoanta i. Tarlumobi ma Jahowa, lehononna do molo sai mangido naposona. Didok Jesus ma muse, “Hudok ma tu hamu, sai pangido ma, ai na lehononna do i tu hamu. Sai lului ma, ai na dapotmuna do i. Sai tuktuhi ma, ai na bungkaonna do tu hamu. Ai lehononna do tu ganup halak na mangido, jala dapotan do ganup halak na mangalului, jala bungkaonna do tu ganup halak na manuktuhi.”​—Lukas 11:9, 10.

Dipatangkas Jesus do muse ringkot ni martangiang marhite tudosan na asing. Ninna ma, “Ise sian hamu angka ama na mangalehon ulok  tu anakna molo dipangido dengke? Manang mangalehon hala molo dipangido tolor? Alani i, gari hamu nang pe jahat diboto hamu mangalehon na denggan tu ianakhonmuna, tarlumobi ma Ama na di banua ginjang i, lehononna do tondi parbadia tu halak na mangido tu Ibana!” (Lukas 11:11-13) Pos ma rohanta na olo do Jahowa manangihon pangidoanta jala mangalehon na ringkot di hita!