Di Samaria manang di Galilea do ra Jesus tingki i. Disungkun halak Parise ma tu ibana taringot tu Harajaon ni Debata. Ai dirimpu nasida do songon sada ulaon na balga haroro ni Harajaon i. Alai Jesus mandok, “Harajaon ni Debata ndang ro marhite cara na boi idaon ni sude jolma. Ndang dohonon ni angka jolma, ‘Dison do!’ manang ‘Disan do!’ Ai ida ma, di tonga-tongamuna do Harajaon ni Debata.”​—Lukas 17:20, 21.

Didok roha ni piga-piga halak, di bagasan roha ni angka naposo ni Debata do Harajaon ni Debata. Alai molo songon i do, ndang patut Harajaon i di bagasan roha ni halak Parise. Nang pe songon i, di tonga-tonga ni nasida do Harajaon i. Ai disi do Raja ni Harajaon ni Debata, i ma Jesus.​—Mateus 21:5.

Dung laho halak Parise, dipaboa Jesus ma ra godang hatorangan taringot tu haroro ni Harajaon i. Didok Jesus ma, “Na ro ma tingkina, sihol ma rohamu laho mangida sada sian angka ari ni Anak ni jolma i, alai ndang idaonmuna i.” (Lukas 17:22) Alani i, dipatudu Jesus do na laho ro do Harajaon i di tingki na naeng ro. Andorang so ro ari i, ra naeng botoon ni angka sisean do andigan i masa. Alai ingkon paimaon ni nasida dope sahat tu tingki naung ditontuhon Debata.

Didok Jesus ma muse, “Dohonon ni halak ma tu hamu, ‘Disan do!’ manang ‘Dison do!’ Alai unang ma laho jala unang ma ihuthon nasida. Dos songon hilap na marsinondang sian ujung ni langit tu ujung ni langit, songon i ma Anak ni jolma i di arina i.” (Lukas 17:23, 24) Songon dia do asa unang diihuthon angka sisean i halak na mandok dirina Messias? Jesus mandok, songon hilap sian ujung ni langit sahat tu ujung ni langit do haroro ni Messias. On patuduhon, tangkas do idaon ni nasida haroro ni Harajaon i.

Dipatudos Jesus ma muse pangalaho ni jolma di tingki i songon pangalaho ni jolma di tingki naung salpu. Didok ibana ma, “Dos songon na masa di tingki ni si Noak ma na masa di ari ni Anak ni jolma i. . . . Songon i ma na masa di tingki ni si Lot: mangan minum do nasida, manuhori, manggadisi, manuani, jala pajongjongkon jabu do nasida. Alai tingki kaluar si Lot sian Sodom, ro ma udan api dohot barerang sian langit jala diripashon ma nasida sude. Suang songon i ma di ari i, tingki dipapatar Anak ni jolma i.”​—Lukas 17:26-30.

Ndang alani na mangan, minum, manuhori, manggadisi, jala na pajongjongkon jabu umbahen na diuhum angka halak di tingki ni si Noak dohot si Lot. Ai diulahon si Noak, si Lot, dohot keluarga ni nasida do angka i. Alai, ndang diparrohahon angka halak di tingki i lomo ni  roha ni Debata. Jala ndang parduli nasida tu na laho bahenon ni Debata tingki i. Dipaingot Jesus do angka siseanna asa tongtong manjumolohon lomo ni roha ni Debata. Molo diulahon i, malua ma nasida tingki ro panguhuman ni Debata tu parjahat di ari na naeng ro.

Gabe sipaingot ma na masa di tingki ni si Noak dohot si Lot tu angka sisean. Unang ma gabe habis tingki ni nasida holan laho mangulahon angka ulaon na di portibi on. Jesus mandok, “Di ari i, unang ma turun halak na di atap ni jabu laho mambuat angka artana. Dos songon i, unang ma mulak halak na di ladang tu angka artana. Ingot ma tunggane boru ni si Lot.” (Lukas 17:31, 32) Ujungna gabe batu sira do tunggane boru ni si Lot.

Taringot tu haroro ni Anak ni Jolma i, didok Jesus ma, “Di borngin i molo adong dua halak sapodoman, diboan ma na sada jala ditinggalhon ma na sada nai.” (Lukas 17:34) Alani i, ndang sude jolma malua di ari na naeng ro.

Disungkun angka sisean i ma, “Didia do i masa Tuan?” Dialusi Jesus ma, “Didia adong bangke, disi do angka lali marpungu.” (Lukas 17:37) Ingkon songon lali do sisean ni Jesus, na boi tangkas mananda Kristus i. Di ari na naeng ro, urupan ni Jesus ma angka na marhaporseaon mandapot parbinotoan na sintong na parohon hangoluan.