Sian Galilea laho ma Jesus dohot angka siseanna tu bariba ni Sunge Jordan mamolus sian Perea tu selatan. Tingki parpudi sahali Jesus di Perea, dipaboa ibana do tu angka halak Parise uhum ni Debata taringot na marsirang. (Lukas 16:18) Saonari, disungkun halak Parise do muse taringot i laho manjorat ibana.

Didok si Musa, boi do disirangkon sahalak baoa tunggane boruna molo adong na hurang di ibana. (5 Musa 24:1) Alai ndang sarupa pandapot ni halak taringot na laho marsirang. Adong mandok, hasalaan na so balga pe boi do gabe dalan laho marsirang. Alani i gabe disungkun halak Parise ma, “Mangihuthon patik, boi do sirangkonon ni sahalak baoa tunggane boruna asal ma adong alana?”​—Mateus 19:3.

Pandapot ni Debata do na rumingkot di Jesus. Didok ibana ma, “Na so hea do dijaha hamu, sian mulana i do ditompa Panompa i baoa dohot borua? Jala didok do, ‘Alani i, tadingkonon ni baoa ma amana dohot inana asa rap dohot tunggane boruna, jala gabe sada ma nasida na dua.’ Jadi, ndang dua be nasida alai sada nama. Alani i, naung pinadomu ni Debata, ndang jadi sirangon ni jolma.” (Mateus 19:4-6) Tingki diboan Debata si Hawa tu si Adam, ndang adong didok na boi nasida marsirang.

Alai gabe didok halak Parise ma tu Jesus, “Antong, boasa do bahenon ni si Musa parenta asa dilehon surat sirang laho manirangkon tunggane boruna?” (Mateus 19:7) Didok Jesus ma, “Alani tangkang ni rohamuna do umbahen na diloas si Musa hamu manirangkon tunggane borumuna. Alai, ndang songon i hian sian mulana.” (Mateus 19:8) Tingki didok Jesus “sian mulana”, na nidokna ndang sian tingki ni si Musa. Alai sian mulai dibahen Debata do pardongan saripeon di Porlak Eden.

Dung i, didok Jesus ma patik na ringkot, “Hudok ma tu hamu, manang ise na manirangkon tunggane boruna molo so alani na mangulahon seks na so patut jala mangoli muse tu na asing, na mangalangkup do ibana disi.” (Mateus 19:9) Alani i, holan ala mangulahon seks na so patut do boi marsirang.

Gabe didok angka siseanna ma, “Molo songon i do hape pardongan saripeon, dumenggan ma ndang marhasohotan.” (Mateus 19:10) Porlu do botoon ni halak na naeng marhasohotan na ingkon marsada nasida saleleng-lelengna!

Didok Jesus, adong do halak na so boi mangulahon seks ala songon i partubuna. Na asing, ndang boi mangulahon seks ala dibahen halak. Na deba, naeng marhasohotan do, alai ala naeng mangulahon lomo ni roha ni Debata, ndang marhasohotan ibana. Didok Jesus ma, “Manang ise na boi mangihuthon i, diulahon ma.”​—Mateus 19:12.

Dung i diboan angka halak ma dakdanak tu Jesus. Alai gabe muruk do angka siseanna. Ai dirimpu nasida do gabe digugai dakdanak i Jesus. Gabe didok Jesus ma tu nasida, “Loas ma angka dakdanak i ro tu ahu, unang orai hamu nasida. Ai angka halak sisongon i do nampuna Harajaon ni Debata. Tutu do na hudok on tu hamu, manang ise na so manjalo Harajaon ni Debata songon dakdanak on, ndang boi masuk ibana tusi.”​—Markus 10:14, 15; Lukas 18:15.

Parsiajaran na denggan do on! Asa boi masuk tu Harajaon ni Debata ingkon toruk do rohanta jala olo diajari songon dakdanak. Dihaol Jesus do angka dakdanak i jala dipasu-pasu. Jala dihaholongi Jesus do sude halak na “manjalo Harajaon ni Debata songon dakdanak on”.​—Lukas 18:17.