Ndang mulak dope si Josep dohot si Maria sian Betlehem. Songon Patik ni Debata tu halak Israel, disunat nasida ma poso-poso i dung marumur ualu ari. (3 Musa 12:2, 3) Laos di tingki i, dibahen ma goarna Jesus, songon hata ni si Gabariel.

Nunga salpu sabulan, jala marumur 40 ari ma Jesus tingki i. Saonari, aha ma na laho ulahonon ni natua-tuana? Boanonna ma Jesus tu bagas joro di Jerusalem. Holan piga-piga kilometer do joro i sian inganan ni nasida. Didok do di Patik i, molo dung 40 ari sahalak ina manubuhon anak baoa, ingkon pasahatonna do pelean paiashon diri di bagas joro.​—3 Musa 12:4-8.

Dibahen si Maria do songon i. Diboan ibana do dua pidong laho pelehononna. Hape mangihuthon Patik, ingkon pelehononna do sada biru-biru jantan dohot sada pidong. Alai molo ndang tarbahenna, diloas do sahalak ina holan mangalehon dua anduhur manang dua darapati. Sian on boi ma taida, pogos do si Josep dohot si Maria.

Di bagas joro, didapothon sahalak baoa na matua ma si Josep dohot si Maria. Goarna, si Simeon. Nunga dipaboa Debata hian, idaonna do Kristus manang Messias na dijanjihon ni Jahowa i andorang so mate ibana. Di tingki i, marhite tondi parbadia, dijujui ma si Simeon ro tu bagas joro. Jumpangna ma si Josep dohot si Maria rap dohot poso-poso i. Jala diompa ibana ma poso-poso i.

Huhut diompa, mandok mauliate ma si Simeon tu Debata. Ninna ma, “Saonari, ale Tuan Natumimbul, nunga boi be mate naposomon di bagasan dame songon na nidokmi. Ai nunga huida dalan haluaon na sian Ho na pinaradem di jolo ni sude bangso, ibana do panondang na pasidingkon haholomon na manghungkupi angka bangso jala gabe hasangapon ni bangsom Israel.”​—Lukas 2:29-32.

Longang do si Josep dohot si Maria mambege i. Dipasu-pasu si Simeon ma nasida. Didok ma tu si Maria, “Alani dakdanak on, torop ma halak Israel madabu manang hehe.” Dipaboa ibana do muse, na laho hilalaon ni si Maria na hansit songon na tinusuk ni sada podang na ganjang.​—Lukas 2:34.

Disi, adong do muse sahalak panurirang borua na margoar si Hanna na marumur 84 taon. Ganup ari do ibana ro tu bagas joro. Di tingki i, didapothon ibana ma si Josep dohot si Maria  na rap dohot poso-poso i. Mandok mauliate ma ibana tu Debata. Jala dipaboa ibana ma taringot tu Jesus tu sude halak na manangihon i.

Las situtu do roha ni si Josep dohot si Maria alani na masa di bagas joro i! Tontu sudena i paposhon roha ni nasida molo anakna i, Anak na Dijanjihon ni Debata.