Diida si Jairus do dipamalum Jesus borua na marsahit i. Alani i, pos ma rohana boi do pamalumon ni Jesus boruna i, nang pe didok rohana, “Nunga mate be borungku saonari.” (Mateus 9:18) Tutu do boi urupan ni Jesus ibana?

Tingki mangkatai dope Jesus tu borua na pinamalumna i, ro ma piga-piga halak sian jabu ni si Jairus. Ninna nasida ma, “Nunga mate borumi! Boasa dope susaanmu Guru i?”​—Markus 5:35.

Tontu lungun situtu ma roha ni si Jairus! Nang pe sahalak pamimpin ibana, alai ndang adong be na boi sibahenonna. Ai nunga mate boruna i. Alai, didok Jesus ma tu ibana, “Unang ho mabiar, alai patudu ma haporseaonmu.”​—Markus 5:36.

Dung i laho ma Jesus tu jabu ni si Jairus. Nunga godang halak disi. Sai tangis jala mangandungi ma nasida alani lungunna. Masuk ma Jesus tu jabu i jala ninna ma, “Ndang na mate dakdanak on, alai na modom do.” (Markus 5:39) Gabe diparengkeli angka jolma i ma Jesus alani hatana i. Diboto nasida do naung mate dakdanak i. Tutu do i, alai marhite huaso ni Debata, na laho patuduhonon ni Jesus ma tu nasida molo halak na mate boi dipahehe, dos songon na mandungoi halak na renges modom.

Disuru Jesus ma kaluar angka jolma i. Alai ditogihon Jesus ma si Petrus, si Jakobus, si Johannes dohot natua-tua ni dakdanak i masuk tu inganan ni dakdanak i dipeakkon. Ditiop Jesus ma tangan ni dakdanak i, ninna ma, “‘Talita kumi,’ lapatanna, ‘Ale borua na metmet, hudok ma tu ho, hehe ma ho!’” (Markus 5:41) Pintor hehe ma boruna i jala mardalan. Tontu las situtu do roha ni si Jairus dohot tunggane boruna mangida i! Dung i disuru Jesus ma asa dilean mangan dakdanak i. On patuduhon tutu do mangolu boruna i. 

On ma haheheon na paduahon na binahen ni Jesus. Songon na somal, diorai Jesus do asa unang dipaboa-boa nasida tanda halongangan na binahenna i. Alai, dipaboa natua-tua ni dakdanak i do na masa i tu “sude luat i”. (Mateus 9:26) Tontu, hita pe songon i do, molo dipahehe halak na tahaholongi las do rohanta paboahon i tu na asing.