Sahat ma Jesus dohot angka siseanna di Betsaida. Diboan halak ma tu Jesus sahalak baoa na mapitung. Dipangido nasida ma asa dipamalum Jesus ibana.

Ditiop Jesus ma tangan ni baoa i jala ditogu tu luar ni huta i. Marsitijur ma Jesus tu mata ni baoa i jala ninna ma, “Adong do na boi diida ho?” Dialusi baoa i ma, “Huida do nian angka jolma, alai songon angka hau na mardalan do nasida huida.” (Markus 8:23, 24) Dung i, dijama Jesus ma mata ni baoa i, gabe tangkas ma ibana marnida. Disuru Jesus ma ibana mulak jala diorai do ibana masuk muse tu huta i.

Sian i, borhat ma Jesus dohot angka siseanna tu sabola utara, tu huta na di Kaesarea Pilippi. Di sabola timur ni huta i do Dolok Hermon. Marsalju do punsu ni dolok i. Hira-hira 40 kilometer ma sidalanan ni nasida. Jala 350 meter ma timbo ni inganan i sian laut. Alani i, boi do piga-piga ari pardalanan ni nasida tu inganan i.

Tingki di pardalanan, martangiang ma Jesus. Marsak do ibana mamingkiri angka siseanna. Ai sia manang sampulu bulan nai mate nama ibana. Tingki i, godang do siseanna naung manadingkon ibana. Adong do na bingung jala mandele. Sungkun-sungkun roha ni nasida, boasa ndang olo Jesus gabe raja ni nasida. Jala boasa ndang olo Jesus mambahen tanda na patuduhon ibana do Messias i.

Tingki ro angka sisean i, disungkun Jesus ma nasida, “Ise do Anak ni jolma i didok halak?” Dialusi nasida ma, “Adong na mandok si Johannes Pandidi. Adong muse na mandok si Elia. Na asing muse si Jeremia manang sahalak sian panurirang.” Di tingki i, adong do na porsea molo Jesus i panurirang naung dipahehe. Alani i, disungkun Jesus ma nasida, “Alai ise do ahu didok rohamuna?” Pintor dialusi si Petrus ma, “Kristus i do ho, Anak ni Debata na mangolu i.”​—Mateus 16:13-16.

Didok Jesus, marlas ni roha ma si Petrus ala Debata do na paboahon i tu ibana. Dung i, didok Jesus ma muse, “Ho do si Petrus jala di ginjang ni batu on do pajongjongonku huriangku, jala na so talu i bahenon ni harbangan ni Kuburan.” Hata i patuduhon, pajongjongonna ma sada huria. Jala molo tongtong do diulahon ruas ni huria i lomo ni roha ni Debata, dapot ni nasida ma hangoluan na saleleng ni lelengna di surgo. Jala didok do muse tu si Petrus, “Lehononku ma tu ho kunci ni Harajaon banua ginjang i.”​—Mateus 16:18, 19.

Ndang na gabe umsangap si Petrus sian angka apostel na asing. Jala ndang na gabe ibana fondasi ni huria, ai Jesus do fondasi ni huria i. (1 Korint 3:11; Epesus 2:20) Alai dilehon Jesus do tu si Petrus tolu kunci. Sada  hasangapon do i di si Petrus. Alana, boi do kunci i mambungka dalan tu godang halak asa boi masuk tu Harajaon banua ginjang.

Dipangke si Petrus ma kunci na parjolo di ari Pentakosta taon 33 M. Dipangke do i tu halak Jahudi dohot halak na maragama Jahudi, asa boi nasida malua. Kunci na paduahon dipangke tu halak Samaria, asa boi nasida masuk tu Harajaon ni banua ginjang. Jala kunci na patoluhon dipangke taon 36 M, tu halak na so marsunat, i ma si Kornelius dohot angka na asing.​—Ulaon ni Apostel 2:37, 38; 8:14-17; 10:44-48.

Dipaboa Jesus do muse tu angka siseanna taringot tu sitaonon dohot hamamatena di Jerusalem. Marsak ma angka sisean i mambege i. Ai ndang diantusi nasida dope na laho hehe Jesus tu surgo. Ditarik si Petrus ma Jesus, ninna ma, “Asi ma roham tu dirim Tuan. Ndang na laho masa i tu ho.” Alai marbalik ma Jesus ninna ma, “Laho ma ho tu pudingku Bolis! Batu partuktuhan do ho di ahu, ai ndang pingkiran ni Debata dipingkirhon ho, pingkiran ni jolma do.”​—Mateus 16:22, 23.

Dung i, dijou Jesus ma angka apostel na asing. Didok ma tu nasida, ingkon marsitaonon do nasida laho mangihuthon ibana, ninna ma, “Manang ise na naeng mangihuthon ahu, ingkon disoadahon do dirina jala dituhuk hau partinaonan i jala tongtong ma diihuthon ahu. Manang ise na naeng paluahon ngoluna, agoan ngoluna do. Alai manang ise na agoan ngoluna alani ahu dohot alani barita na uli, malua do.”​—Markus 8:34, 35.

Tangkas ma, asa tama sasahalak gabe siihuthon Jesus ingkon barani do ibana jala ndang boi mangkaringkothon diri sandiri. Jesus mandok, “Ai manang ise na maila alani ahu dohot alani angka hatangku di tonga-tonga ni sundut na so marsihohot jala pardosa on, Anak ni jolma i pe maila do alani ibana di tingki ro di bagasan hasangapon ni Amana rap dohot angka suru-suruan na badia i.” (Markus 8:38) Tingki ro Jesus, “baloshononna ma tu ganup halak hombar tu na niulana”.​—Mateus 16:27.