Borhat ma Jesus dohot angka siseanna tu sabola utara tu Galilea. Di tingki i, nunga jonok musim panen. Mamolus ma nasida sian ladang gandum na so disabi dope. Ala male, diputikkon angka sisean ma biur ni gandum i jala diallang. Alai ari Sabbat do tingki i. Jala diida halak Parise do na niulahon ni nasida.

Taingot ma, baru dope naeng dibunu halak Jahudi Jesus tingki di Jerusalem. Ai ditudu nasida do ibana mangalanggar patik taringot tu ari Sabbat. Saonari, naeng disalahon halak Parise ma muse Jesus alani angka siseanna. Didok nasida ma, “Ida ma, diulahon angka siseanmu do ulaon na so boi ulahonon di ari Sabbat.”​—Mateus 12:2.

Didok halak Parise i do, molo mamutikkon biur ni gandum, mamulos jala mangallang i, dos do i songon na mamanen dohot mamiari. (2 Musa 34:21) Pangantusion ni nasida taringot tu ari Sabbat, mambahen halak gabe borat mangulahon patik ni Debata. Hape sasintongna, parohon las ni roha jala patoguhon paralealeon tu Debata do ari Sabbat i. Alani i, dipatudu Jesus ma na sala pangantusion ni halak Parise i marhite paboahon angka contoh sian Bibel. Dipatuduhon Jesus ma, ndang hea dipangido Jahowa tu naposona cara sisongon i diulahon di ari Sabbat.

Na parjolo, dipaboa Jesus ma taringot tu si Daud dohot tentarana. Tingki male nasida, masuk ma nasida tu tabernakel jala diallang ma roti pelean. Roti i nunga dibuat sian jolo ni Jahowa jala nunga diganti dohot roti na baru. Holan angka malim do na boi mangallang  roti i. Alai di tingki i, ndang diuhum Debata si Daud dohot tentarana ala diallang nasida roti i.​—3 Musa 24:5-9; 1 Samuel 21:1-6.

Na paduahon, didok Jesus ma, “Na so hea do dijaha hamu di buku Patik, na so sala angka malim karejo di bagas joro tingki ari Sabbat?” Dipaboa Jesus ma tu nasida ulaon ni angka malim di ari Sabbat. Diseat nasida do binatang laho dipelehon jala diulahon do ulaon na asing di bagas joro. Didok Jesus ma, “Alai hudok ma tu hamu, adong do dison na umbalga sian bagas joro.”​—Mateus 12:5, 6; 4 Musa 28:9.

Sahali nai didok Jesus ma tu nasida hata na sian Surat na Badia na mandok, “Molo diantusi hamu do lapatan ni hata on, ‘Asi ni roha do na huhalomohon ndang pelean’, ndang uhumonmuna halak na so marsala.” Didok ma muse, “Anak ni jolma i do Tuan ni ari Sabbat.” Na nidok ni Jesus dison, i ma taringot tu Harajaonna na laho mamarenta saleleng 1.000 taon na parohon dame.​—Mateus 12:7, 8; Hosea 6:6.

Nunga marribu taon jolma diparhatoban Sibolis. Susa do nasida alani hajahaton dohot porang. Alai molo dung masa Sabbat na umbalga na diparenta ni Kristus i, ndang hilalaon ni nasida be hasusaan!