Leleng do Jesus marbarita di Galilea, ai godang do halak na manjalo ibana disi. Alai sogo do roha ni jolma tu ibana di Judea, ala dipamalum ibana sahalak baoa tingki ari Sabbat. Alani i, marsitutu do “halak Jahudi mangalului dalan laho mambunu” ibana.​—Johannes 5:18; 7:1.

Satongkin nai nama Perayaan Tabernakel. Tingki i, hira-hira bulan September manang Oktober taon 32 M. Perayaan i dibahen saleleng pitu ari, jala dibahen do muse sadari nai parpunguan laho manutup ulaon i. Perayaan i patuduhon naung marujung do musim panen. Jala i ma tingkina laho marlas ni roha dohot mandok mauliate tu Debata.

Tolu hali sataon adong do perayaan di Jerusalem. Jala godang do halak ro tusi di tingki i. Alani i, ro ma angka anggi ni Jesus, i ma si Jakobus, si Simon, si Josep dohot si Judas manjujui Jesus. Ninna nasida ma, “Borhat ma ho sian on, laho ma ho tu Judea. . . . Ai ndang adong halak na mambahen ulaonna di na buni, molo naeng tarbarita ibana. Ala nunga diulahon ho angka i, patudu ma dirim tu portibi on.”​—Johannes 7:3, 4.

Didok angka anggi ni Jesus i pe songon i, ndang ala na “porsea” nasida molo Jesus i Messias. Alai, asa diida halak na ro tu perayaan i do mukjizat manang tanda halongangan na binahen ni Jesus. Alani i, didok Jesus ma, “Ndang adong na mambahen portibi on mangkasogohon hamu. Alai dihasogohon do anggo ahu, ala hupaboa do pambahenan ni nasida na jahat i.”​—Johannes 7:5-8.

Piga-piga ari dung laho angka anggi ni Jesus tu Perayaan i, borhat ma Jesus dohot angka siseanna. Alai, ndang sian Sunge Jordan nasida, sian Samaria do asa unang diboto halak. Tingki naeng marborngin nasida di Samaria, disuru Jesus ma parjolo angka siseanna mangalului inganan marborngin disi. Alai ndang dilean halak Samaria i nasida disi marborngin. Ai diboto nasida do na laho tu perayaan ni halak Jahudi Jesus. Alani i, muruk ma si Jakobus dohot si Johannes. Ninna ma, “Tuan, olo do ho asa hujou hami api turun sian langit laho manutung nasida?” (Lukas 9:54) Alai diorai Jesus do nasida.

Tingki di pardalanan nasida, ro ma sahalak siboto surat mandok tu Jesus, “Guru, ihuthononku do ho manang tudia pe ho laho.” Dialusi Jesus ma, “Adong do liang ni biang tombak jala adong do asar ni angka pidong, alai anggo Anak ni jolma i ndang adong hapeahan ni uluna.” (Mateus 8:19, 20) Na nidok ni Jesus  disi, ingkon rade do siboto surat i manaon hasusaan molo gabe siihuthon Jesus ibana. Alai ndang olo siboto surat i. Alani i, tasungkun ma dirinta, “Rade do ahu manadingkon sasudena laho mangihuthon Jesus?”

Dung i didok Jesus ma muse tu baoa na asing, “Ihuthon ma ahu.” Dialusi baoa i ma, “Tuan, loas ma asa jolo laho ahu mangkuburhon damang.” Didok Jesus ma muse, “Pasombu ma angka na mate i mananom na matena. Alai laho ma ho, baritahon ma Harajaon ni Debata manang didia pe.” (Lukas 9:59, 60) Diboto Jesus do mangolu dope bapa ni baoa i. Ai molo nunga mate, ndang disi ibana mangkatai dohot Jesus. Alai sian alusna i, taboto ma ndang rade ibana mambahen Harajaon ni Debata na rumingkot di ngoluna.

Tingki naeng jonok nasida tu Jerusalem, ro ma muse baoa na asing. Ninna ma, “Huihuthon pe ho Tuan, alai loas ma jolo ahu mandok hata parsirangan tu keluargangku.” Didok Jesus ma, “Halak na mambajak hauma huhut mangida tu pudi, ndang tama masuk tu Harajaon ni Debata.”​—Lukas 9:61, 62.

Molo mambajak sasahalak ingkon tongtong do diida tu jolo asa tigor na dibajakna i. Jala molo so do ibana laho mangida tu pudi, ndang sae be karejona i. Dos songon i ma angka na gabe siihuthon Jesus, unang ma taida tu pudi. Lapatanna, unang ma taharingkothon na adong di portibi on alai, taharingkothon ma Harajaon ni Debata di ngolunta asa tongtong hita di dalan laho tu hangoluan na saleleng ni lelengna.