Nang pe naung godang angka na denggan na binahen ni Jesus di Galilea, alai didok ibana do, “Di angka kota na asing pe ingkon baritahononku do barita na uli taringot tu Harajaon ni Debata.” Didok roha ni Jesus, ndang holan tu halak Galilea ibana marbarita. Alani i, “laho ma ibana marbarita di angka sinagoga di Judea”. (Lukas 4:43, 44) Denggan do i, alana nunga jonok perayaan di Jerusalem tingki i.

Martimbangkon ulaon ni Jesus di Galilea, holan saotik do disurat taringot tu ulaon ni Jesus di Judea. Nang pe godang halak Judea na so marlomo ni roha tu barita ni Jesus, alai tongtong do ibana marbarita jala mangulahon ulaon na denggan manang na didia pe.

Ndang leleng dungkon i, laho ma Jesus tu Jerusalem, ibukota ni Judea, laho mangarayahon Paska taon 31 M. Jonok tu Harbangan Biru-biru i adong do kolam paridian na digoari Betesda. Godang do halak na marsahit, na mapitung, na pampang na ro tu kolam i. Ai porsea do nasida molo masuk nasida tingki gunsang aek i, boi do nasida malum.

Di tingki ari Sabbat, diida Jesus ma sahalak baoa na marsahit saleleng 38 taon jonok tu kolam i. Disungkun Jesus ma ibana, “Olo do ho malum?” Dialusi na marsahit i ma, “Tingki gunsang aekna ndang adong na mamboan ahu masuk tu kolam i Amang. Tingki naeng masuk ahu tusi, nunga parjolo masuk na asing.”​—Johannes 5:6, 7.

Alani i, didok Jesus ma, “Hehe ma ho! Boan ma tikkarmi jala mardalan ma ho.” (Johannes 5:8) Longang do roha ni baoa i mambege i, alai diulahon ibana do i. Satongkin i, malum ma ibana, diboan ma tikkarna jala mardalan ma ibana!

Alai ndang las roha ni halak Jahudi mambege i. Gariada, didok nasida do tu baoa i, “Ari Sabbat do saonari. Alani i, ndang boi boanonmu tikkarmi.” Dialusi baoa i ma, “Halak na pamalumhon ahu i do na mandok tu ahu, ‘Boan ma tikkarmi jala mardalan ma ho.’” (Johannes 5:10, 11) Ai ndang lomo roha ni halak Jahudi tu na pamalumhon halak na marsahit di ari Sabbat.

Disungkun nasida ma muse, “Ise do halak na marsuru ho mamboan i jala mardalan?” Boasa didok nasida songon i tu baoa i? “Ai ndang tarida be Jesus alani torop ni jolma na disi”, jala ndang diboto baoa i ise goar ni baoa na pamalumhon i. (Johannes 5:12, 13) Alai di tingki na asing, boi do jumpangna Jesus. Tingki di bagas joro jumpangna ma Jesus, gabe diboto ibana ma ise baoa na pamalumhon ibana di kolam i.

Dijumpangi baoa i ma muse halak Jahudi i jala dipaboa ma na Jesus pamalumhon ibana. Alani i, didapothon halak Jahudi i ma Jesus. Alai ndang na laho mamboto songon dia Jesus mambahen tanda halongangan i. Naeng mangalului hasalaan ni Jesus do nasida, ai naeng bahenon ni nasida do na hansit tu ibana!