Godang do ulaon ni Jesus dohot siseanna na opat i di Kapernaum. Dung naeng borngin, marroan do halak mamboan angka na marsahit tu Jesus asa dipamalum. Gabe ndang adong be tingkina laho martangiang tu Amana.

Alani i, ndang tiur dope ari, nunga laho Jesus tu inganan na lungun martangiang sahalakna. Alai holan satongkin do ibana boi martangiang. Ai dung diboto angka sisean i na so disi Jesus, “dilului si Simon dohot angka donganna ma ibana”. Ra si Petrus do na manguluhon nasida laho mangalului Jesus. Ai di jabuna do Jesus maringanan.​—Markus 1:36; Lukas 4:38.

Dung pajumpang nasida dohot Jesus, didok si Petrus ma, “Sude do halak mangalului ho.” (Markus 1:37) Lomo do roha ni halak na di Kapernaum asa leleng Jesus disi. Ai las do roha ni nasida tu ulaon ni Jesus. Alani i, “sai diambati do ibana [Jesus] asa unang ditadingkon nasida”. (Lukas 4:42) Alai holan laho pamalumhon na marsahit do umbahen na ro Jesus tu tano on? Manang holan disi do ibana marbarita? Songon dia do alus ni Jesus?

Didok Jesus ma tu siseanna, “Laho ma hita tu inganan na asing, tu angka kota na jonok tuson, asa marbarita ahu disi, ai alani i do umbahen na ro ahu.” Jala didok do muse tu halak na sai mangambati ibana i, “Di angka kota na asing pe ingkon baritahononku do barita na uli taringot tu Harajaon ni Debata, ai alani i do ahu disuru.”​—Markus 1:38; Lukas 4:43.

Alani i, pasahathon barita taringot tu Harajaon ni Debata do na tinuju ni Jesus ro tu tano on. Ai marhite Harajaon i, dipabadia ma goar ni Amana jala Harajaon i ma na pasaehon sude sahit ni jolma. Dos songon si Musa, dibahen Jesus do tanda halongangan manang mukjizat na patuduhon tu angka jolma molo ibana na sinuru ni Debata.​—2 Musa 4:1-9, 30, 31.

Ditadingkon Jesus ma Kapernaum jala laho tu kota na asing. Rap do ibana dohot opat siseanna, i ma si Petrus, si Andreas donganna saama, si Johannes dohot si Jakobus donganna saama. Saminggu andorang so i, nunga ditogihon Jesus nasida asa mangihuthon ibana.

Godang do na manjalo barita na dipasahat Jesus dohot siseanna di Galilea. Sahat tu inganan na dao, “tarsar ma barita taringot tu Jesus di sandok luat di Siria”, tu luat na sampulu kota na digoari Dekapolis, dohot tu luat na di bariba ni Sunge Jordan. (Mateus 4:24, 25) Gabe torop ma halak sian angka luat i dohot sian Judea na mangihuthon Jesus dohot siseanna. Godang do na marsahit dohot na sinonggopan ni suru-suruan na jahat diboan tu Jesus. Jala dipamalum Jesus ma nasida.