Nunga dua taon Jesus marbarita. Alai tongtong dope ibana marbarita. “Didalani Jesus do sude kota dohot huta [di luat Galilea] laho mangajari di angka sinagoga ni nasida, mamaritahon barita na uli taringot tu Harajaon jala pamalumhon nasa sahit dohot nasa hagaleon.” (Mateus 9:35) Dung diida ibana angka na masa di angka kota, diboto ibana ma na ringkot do marbarita na uli tu nasida. Alai songon dia ma mangulahon i?

Songon biru-biru na so adong parmahanna do nasida diida Jesus. Dipasombu jala ndang disarihon. Asi ma roha ni Jesus mangida nasida. Diida Jesus ma, ringkot do nasida diurupi laho mamboto pangkirimon marhite hasintongan. Didok ibana ma tu angka siseanna, “Bidang do nian sisabion, alai otik do angka panabi. Alani i, pangido ma tu Nampuna sisabion i asa disuru angka panabi tu sisabionna i.”​—Mateus 9:37, 38.

Diboto Jesus do ise na boi mangurupi angka jolma i. Dijou ibana ma apostelna na 12 i, jala disuru ma dua halak sapardalanan laho marbarita. Didok Jesus ma tu nasida, “Unang ma laho hamu tu angka bangso na asing jala unang ma masuk tu kota ni halak Samaria. Alai, holan tu halak Israel na songon biru-biru na lilu i ma hamu laho. Laho ma hamu jala baritahon ma, ‘Nunga jonok Harajaon banua ginjang i.’”​—Mateus 10:5-7.

Harajaon na pinaboa ni Jesus di tangiangna i do Harajaon na pinaboa ni nasida. Tutu, “nunga jonok Harajaon” i, ai nunga ro Jesus Kristus, Raja na pinillit ni Debata. Alai,  songon dia do angka apostel i boi paposhon roha ni jolma molo nasida wakil ni Harajaon i? Dilehon Jesus do huaso tu angka apostel i laho pamalumhon na marsahit dohot pahehehon halak na mate. Jala ndang dijalo nasida hepeng tingki mangulahon i. Alai, songon dia do angka apostel i mangalului na ringkot tu nasida ganup ari? Umpamana songon sipanganon.

Dipaboa Jesus do tu angka siseanna i asa unang pola diboan nasida manang aha pe tingki marbarita. Ndang porlu boanon ni nasida mas, perak, manang tombaga. Ndang porlu boanon ni nasida inganan ni sipanganon, solop ni nasida manang baju gantina. Boasa? Jesus mandok, “Ai tama do parkarejo mandapot sipanganonna.” (Mateus 10:10) Halak na manjalo barita i ma na paradehon na porlu tu angka siseanna i. Alani i do didok Jesus, “Molo masuk hamu tu sada jabu, disi ma hamu sahat tu na borhat hamu sian inganan i.”​—Markus 6:10.

Dipaboa Jesus do muse songon dia nasida pasahathon barita i. Jesus mandok, “Tingki masuk hamu tu sada jabu, pangkulingi ma parjabu i. Molo dijalo parjabu i do baritamuna, mian ma hadameonmuna di nasida. Alai molo ndang olo nasida manjalo, mulak tu hamu ma damemuna i. Molo adong na so manjalo manang na so manangihon hamu, laho ma hamu sian jabu manang sian kota i jala paspashon ma orbuk sian patmuna i.”​—Mateus 10:12-14.

Molo sude jolma di sada huta manang di sada kota ndang manjalo nasida, ingkon diuhum do huta manang kota i. Jesus mandok, “Situtu do na hudok on tu hamu, umborat do panguhuman tu kota i sian tu Sodom dohot Gumora di Ari Paruhuman.”​—Mateus 10:15.