Longang do roha ni halak, ala boi Jesus mangalehon mangan marribu halak marhite tanda halongangan manang mukjizat. Diboto nasida ma molo Jesus i do Messias manang “panurirang na naeng ro tu portibi on”. Jala didok roha nasida ibana do raja na denggan mamarenta rayatna. (Johannes 6:14; 5 Musa 18:18) Alani i, naeng dibahen nasida ma Jesus gabe raja.

Diboto Jesus do sangkap ni angka jolma i. Alani i, disuru ibana ma nasida mulak jala disuru ma siseanna nangkok tu parau. Disuru do nasida borhat tu Betsaida jala mulak tu Kapernaum. Alai, nangkok do Jesus tu dolok sahalakna laho martangiang.

Mandapothon manogot, gogo ma alogo jala balga ma galumbang ni laut i. Diida Jesus ma sian dolok, “mansai loja siseanna mangalugai parau i ala mangalo alogo do nasida”. (Markus 6:48) Ro ma Jesus mandapothon nasida mardalan di ginjang ni laut. Tingki i, nunga “dilugai nasida parau i hira-hira lima sahat tu onom kilometer”. (Johannes 6:19) Tingki diida angka sisean i adong na mardalan di ginjang ni aek, mangangguhi ma nasida. Ninna ma, “Aha do i!”​—Markus 6:49.

Didok Jesus ma tu nasida, “Ahu do on, unang mabiar hamu. Pos ma rohamuna!” Alai didok si Petrus ma, “Tuan, molo ho do i, suru ma ahu asa ro mandapothon ho mardalan di atas ni aek.” Dialusi Jesus ma, “Ro ma ho!” Dung i, kaluar ma si Petrus sian parau i, ro ma ibana mardalan di atas ni aek mandapothon Jesus. Alai tingki diida si Petrus galumbang na balga i, mabiar jala naeng lonong ma ibana. Gogo ma didok ibana, “Tuan, urupi ma ahu!” Ditogu Jesus ma ibana jala ninna ma, “Ale ho siotik haporseaon, boasa gabe ganggu roham?”​—Mateus 14:27-31.

Dung nangkok Jesus dohot si Petrus tu parau i, so ma badai manang haba-haba i. Longang ma muse roha ni angka sisean i. Hape baru dope diida nasida dilehon Jesus mangan marribu halak marhite tanda halongangan. Sasintongna, ndang porlu nasida longang molo diantusi nasida do “lapatan ni angka roti i”. Dung i, marsinggang ma nasida, ninna nasida ma, “Tutu ma ho Anak ni Debata.”​—Markus 6:52; Mateus 14:33.

Ndang sadia leleng, sahat ma nasida di Genesaret, inganan na uli di sabola barat ni Kapernaum. Dung kaluar nasida sian parau, pintor ditanda angka halak do Jesus. Godang do halak na ro sian sude inganan di luat i na mamboan angka na marsahit tu Jesus. Tingki dijama nasida ujung ni abit luar ni Jesus, malum ma nasida sude.

Alai ro ma muse godang halak laho mandapothon Jesus tu Kapernaum. Nasida ma na nilehon ni Jesus mangan marhite tanda halongangan. Dung diboto nasida naung laho Jesus, diihuthon nasida ma kapal na ro sian Tiberias. Dung pajumpang dohot Jesus, disungkun nasida ma, “Guru, sadihari do ho tuson?” (Johannes 6:25) Alai dipasingot Jesus ma nasida. Di parsiajaran na mangihut, taparsiajari ma boasa Jesus mambahen songon i tu nasida.