Dung naeng dipamate halak Nasaret ibana, laho ma Jesus tu Kapernaum na jonok tu Laut Galilea na laos digoari “Tao Genesaret”. (Lukas 5:1) Alani i, saut ma surirang ni si Jesaya na mandok laho idaon ni halak na maringanan di topi ni Laut Galilea ma sada panondang na bolon.​—Jesaya 8:23-9:1.

Dibaritahon Jesus do tongtong di Galilea “nunga jonok Harajaon banua ginjang i”. (Mateus 4:17) Pajumpang ma Jesus dohot siseanna na opat i. Ai gabe sijala dengke do nasida dung mulak sian Judea. (Johannes 1:35-42) Saonari, ingkon tongtong ma rap sisean i dohot Jesus, asa boi nasida diajari marbarita. Jala asa boi nasida tongtong marbarita dung ditadingkon Jesus nasida.

Tingki mardalan Jesus di topi ni laut i, diida ma si Simon Petrus, si Andreas donganna saama, dohot angka dongan ni nasida na asing na paiashon jala. Nangkok ma Jesus tu parau ni si Petrus, jala disuru Jesus ma asa dipadao parau i sian darat. Sian parau i ma Jesus mangajari godang halak taringot tu Harajaon ni Debata.

Dung i, didok Jesus ma tu si Petrus, “Boan ma parau on dompak na umbagas jala paturun ma jalamuna i.” Dialusi si Petrus ma, “Guru, nunga loja hami saborngin on, alai ndang adong manang aha dapotnami. Alai alani hatami, hupaturun hami pe jala on.”​—Lukas 5:4, 5.

Dapot ni nasida ma godang dengke pola naeng maribak jala ni nasida i! Dijou ma angka dongan ni nasida na adong di parau na asing laho mangurupi nasida. Dung i, naeng lonong ma parau na dua i ala nunga gok dengke di parau i. Mangida i, marsinggang ma si Petrus tu Jesus, ninna ma, “Laho ma ho sian ahu Tuan, ai jolma pardosa do ahu.” Didok Jesus ma, “Unang mabiar. Mulai sian saonari, gabe sijala jolma ma ho.”​—Lukas 5:8, 10.

Dung i didok Jesus ma tu si Petrus dohot tu si Andreas, “Ihuthon hamu ma ahu, asa hubahen hamu gabe sijala jolma.” (Mateus 4:19) Dijou Jesus do muse si Jakobus dohot si Johannes angka anak ni si Sebedeus laho mangihuthon ibana. Ditadingkon nasida ma jala ni nasida jala gabe sisean ni Jesus ma nasida, na mangalehon sude tingkina laho marbarita.