Nunga loja Jesus sadari i. Dung botari, didok Jesus ma tu angka siseanna, “Laho ma hita tu bariba an.” Na didok disi tu bariba ni Kapernaum.​—Markus 4:35.

Di sabola timur ni Laut Galilea, adong huta na margoar Gerasa. Bagian ni Dekapolis do huta i. Pusat ni adat ni halak Junani do angka kota na adong di Dekapolis. Alai godang do halak Jahudi disi.

Diida halak Kapernaum do Jesus borhat. Alani i, dohot ma nasida borhat. (Markus 4:36) Sasintongna, ndang dao pardalanan ni nasida. Ai holan 21 kilometer do ganjang ni Laut Galilea jala 12 kilometer do bidangna. Alai bagas do laut i.

Dung mardalan kapal i, modom ma Jesus di pudi ni kapal. Ai loja situtu do dihilala ibana mangajari halak sadari i. 

Piga-piga apostel ni Jesus jotjot do marparau. Alai maol do pardalanan ni nasida tingki i. Ai olo do tompu masa badai manang haba-haba di laut i. Ala dolok do di humaliang ni laut i, olo do mangullus alogo sian dolok tu laut i na mambahen masa haba-haba. Jala i ma na masa. Ditombom haba-haba ma kapal i jala “gok ma aek masuk tu parau i gabe naeng lonong ma nasida”. (Lukas 8:23) Nang pe songon i, modom do Jesus.

Nunga hea dihilala nasida masa haba-haba tingki marparau. Alai tung balga situtu do haba-haba tingki i. Mabiar situtu ma nasida jala didungoi ma Jesus. Didok ma, “Tuan, urupi hami, nunga naeng mate hita!” (Mateus 8:25) Dirimpu angka apostel i do nunga naeng lonong nasida!

Dung dungo Jesus, didok ma tu angka apostelna, “Boasa hamu mabiar, hamu siotik haporseaon?” (Mateus 8:26) Dung i, disonggak Jesus ma alogo dohot laut i. Ninna ma, “Hus! So ma!” (Markus 4:39) Gabe so ma haba-haba i jala mansai tenang ma. (Disurat si Markus dohot si Lukas do na masa on. Alai hombar tu na sinurat ni nasida, jolo dipaso Jesus do haba-haba i dung pe i asa dipasingot ibana angka apostelna na hurang porsea i.)

Bayangkon ma pangkilalaan ni angka apostel i! Diida nasida do pintor so haba-haba i dung disonggak Jesus. Gabe mabiar ma nasida jala didok ma, “Ai ise do ibana sasintongna? Haru alogo dohot laut pe mangoloi do tu ibana.” Dung i sahat ma nasida tu bariba ni laut i. (Markus 4:41–5:1) Olo do ra nunga mulak kapal na asing tu barat ni laut i.

Las situtu do rohanta mamboto na marhuaso do Anak ni Debata pasohon haba-haba! Dame ma tahilala tingki mamarenta ibana di Harajaonna tu tano on. Ai ndang adong be hasusaan alani haba-haba.