Borhat ma Jesus dohot siseanna tu Laut Galilea, ala diboto laho bunuon ni halak Parise dohot na mangihuthon partai ni si Herodes nama ibana. Alai godang do halak na mangihuthon Jesus. Adong do sian Galilea, sian Jerusalem, sian Idumea na di selatan, sian luat na di sabola timur ni Sunge Jordan, sian Tirus dohot Sidon na jonok tu laut i. Ala godang do halak na dipamalum Jesus, gabe marroan ma halak na marsahit tu ibana. Sai naeng dijama nasida do Jesus ala ndang sabar nasida paimahon naeng dipamalum.​—Markus 3:9, 10.

Alani godang ni jolma i, disuru Jesus ma siseanna paradehon sada parau na gelleng, asa unang tarhapit ibana dibahen godang ni jolma i. Diajari Jesus ma nasida sian parau i. Jala gabe mura ma ibana mangajari halak na adong di topi ni laut i.

Si Mateus manurat, marhite na niulahon ni Jesus i, “saut ma na nidok ni panurirang Jesaya”. (Mateus 12:17) Surirang na dia do na didok si Mateus disi?

“On do naposongku na hupillit, haholonganki, ibana do halomoan ni rohangku! Lehononku ma tondi parbadia tu ibana, jala tangkas ma bahenonna na sintong i tu angka bangso. Ndang olo ibana marbada manang marsurak jala ndang tarbege soarana di angka dalan. Ndang ponggolhononna batang ni tolong na maropuk jala ndang intopanna sumbu na mellep sahat tu na jongjong na sintong i. Sasintongna, tu goarna do mangkirim angka bangso.”​—Mateus 12:18-21; Jesaya 42:1-4.

Jesus do naposo na tarpillit i. Marhite parniulaonna, dipatudu do tu nasida lapatan ni hasintongan i. Ai ndang diantusi nasida be hasintongan alani adat dohot agama na so sintong. Ditambai halak Parise do aturan taringot tu Patik ni Debata. Jala ndang olo nasida mangurupi na marsahit di tingki ari Sabbat! Alai dipalua Jesus ma nasida sian adat na so hombar tu Patik i. Jala dipatudu ibana ma molo Debata i tigor jala dilehon do huaso tu ibana. Alai gabe naeng bunuon ni angka pamimpin agama do Jesus. Tontu ndang sintong ulaon ni nasida i!

Aha do lapatan ni hata “ndang olo ibana marbada manang marsurak jala ndang tarbege soarana di angka dalan”? Dung dipamalum  Jesus angka na marsahit i, ndang dipaloas Jesus nasida ‘paboa-boahon taringot tu ibana’ tu halak na asing. Songon i do dibahen ibana tu angka suru-suruan na jahat. (Markus 3:12) Ndang lomo roha ni Jesus tandaon ni halak ibana, alani barita na so sintong na pinaboa ni halak.

Asing ni i, godang do halak na marsitaonon di tingki i, dipatudos do nasida songon batang ni tolong manang hau-hau na maropuk manang songon sumbu ni api naung mellep. Alai ndang dibahen Jesus lam gale roha ni nasida. Diurupi Jesus do nasida mardongan holong dohot bisuk. Tangkas ma, sude do jolma boi mangkirim tu Jesus!