Dung dua ari di Samaria, mulak ma Jesus tu Galilea. Nunga marbarita ibana di Judea jala lam marsitutu do ibana marbarita di Galilea. Ra, ndang hirim rohana dijalo halak Galilea ibana. Ai didok Jesus do, “Ndang dipasangap jolma sahalak panurirang di hutana sandiri.” (Johannes 4:44) Tingki i, nunga mulak sisean ni Jesus tu huta dohot tu karejo ni nasida.

Alai tongtong do Jesus marbarita. Dibaritahon ibana ma, “Nunga jonok Harajaon ni Debata. Pauba hamu ma rohamuna jala haporseai ma barita na uli i.” (Markus 1:15) Olo do jolma mambege barita i? Sasintongna, godang do halak Galilea na manjalo barita i dohot na pasangaphon Jesus. Tarlumobi, ala nunga diida nasida tanda halongangan manang mukjizat na binahenna tingki ari Paska di Jerusalem.​—Johannes 2:23.

Tingki di Galilea, didia do Jesus parjolo sahali marbarita? Di Kana. Di huta i ma Jesus parjolo sahali mambahen tanda halongangan, i ma mambahen aek gabe anggur. Tingki di Kana Jesus, dibege ibana ma adong sahalak dakdanak baoa na marsahit na posi. Pegawai ni si Herodes Antipas do amang ni dakdanak i. Si Herodes Antipas, i ma raja na mamonggol ulu ni si Johannes Pandidi. Tingki dibege amang ni dakdanak i na di Kana Jesus, ro ma ibana sian hutana di Kapernaum laho mangalului Jesus. Dung jumpang, didok ibana ma tu Jesus, “Tuan, ro ma jo ho andorang so mate anakki.”​—Johannes 4:49.

Didok Jesus ma tu ibana, “Mulak ma ho, nunga malum be anakmi.” (Johannes 4:50) Porsea do amang ni dakdanak i tu hata ni Jesus jala mulak ma ibana tu jabuna. Di pardalanan, ro ma angka naposona jala dipaboa ma naung malum anakna i. Disungkun ibana ma “jam piga malum anakna i”.

Dialusi angka naposona i ma, “Jam sada arian ma nantoari malum mohopna i.”​—Johannes 4:52.

Diingot amang ni dakdanak i ma, pas di tingki sisongon i didok Jesus, “Nunga malum be anakmi.” Dung i gabe sisean ni Jesus ma pegawai ni si Herodes i, angka naposona, dohot sude donganna sajabu.

Dibahen Jesus do dua tanda halongangan di Kana. Na parjolo, mambahen aek gabe anggur. Paduahon, pamalumhon sahalak dakdanak baoa sian na dao. Hira-hira 26 kilometer ma daona. Dibahen Jesus do muse tanda halongangan na asing. Alai ringkot do tanda halongangan na parpudi on. Alana, i patuduhon nunga mulak ibana tu Galilea, jala patuduhon na tutu do ibana panurirang ni Debata. Alai pasangapon ni halak do ibana di hutana sandiri?

Tadapot ma alusna tingki mulak Jesus tu Nasaret. Aha ma na masa tu ibana disi?