Jahowa do Guru na dumenggan sian saluhutna. Alai ditogihon Ibana do hita asa mangajari halak na asing laho mananda Ibana. Bibel mandok, “Nunga boi hamu gabe guru.” (Heb. 5:12) Jadi disuru do hita laho mangajarhon hasintongan taringot Jahowa di keluarga, di huria, dohot tingki marbarita. Tontu mandok mauliate do hita ala dilehon Jahowa tanggung jawab on tu hita. Alai ingkon marsitutu do hita mangulahon i. Songon dia carana?

Taulahon ma songon na didok si Paulus tu si Timoteus, “Marsitutu ma ho manjahahon i di jolo ni natorop, mamodahon jala mangajarhon i.” Didok ibana muse, “Molo diulahon ho i na paluahon dirim do ho dohot na manangihon ho.” (1 Tim. 4:13, 16) Jadi asa boi mangulahon i, ingkon diboto hamu do songon dia carana asa lam denggan manjaha dohot mangajari. Alana, barita na dipasahat hamu boi paluahon angka halak. Alani i, parsiajari ma ganup parsiajaran di buku on.

Buku on mangurupi hamu asa lam denggan manjaha dohot mangajari. Alai ingot ma, sian Jahowa do barita na dipasahat hamu. Ibana do na manogu angka halak tu organisasina. (Joh. 6:44) Jala ndang adong Guru manang “Pangajari” na songon Jahowa. (Job 36:22) Alani i, tongtong ma pangke Hata ni Debata tingki mangajari. Pangido ma tondi parbadia sian Ibana. Tingki mangajari, unang ma pandapotta na tapasahat. Alai paboa ma songon dia pangkilalaan dohot pingkiran ni Jahowa. Molo diulahon hamu songon i, boi ma hamu mangurupi angka halak asa lam mangkaholongi Jahowa.

Jadi, ditogihon do hamu laho pasahathon barita na mansai ringkot di tingki on. Pos do rohanami, boi do hamu marhasil mangulahon on molo “mangasahon gogo ni Debata”.​—1 Ptr. 4:11.

Donganmuna saulaon,

Punguan na Mangaradoti Organisasi