Tingki diboan si Nebukadnesar angka pemimpin ni Juda tu Babel, dibahen ibana ma sahalak pejabat istana i ma si Aspenas laho mengawasi nasida. Didok si Nebukadnesar ma tu si Aspenas, ingkon sehat jala ingkon malo do angka baoa na poso na adong disi. Dilatik do angka baoa on saleleng tolu taon asa boi gabe pejabat di Babel. Diajari ma nasida manjaha, manurat, dohot marbahasa Babel. Dilehon do tu nasida angka sipanganon dos songon na niallang raja. Adong ma opat baoa, i ma si Daniel, si Hanania, si Misael dohot si Azaria. Diganti si Aspenas ma goar ni nasida gabe goar ni halak Babel, i ma si Beltsasar, si Sadrak, si Mesak, dohot si Abednego. Tongtong  do nasida mangoloi Jahowa nang pe gabe pejabat nasida dibahen?

Sai dioloi baoa na opat on do Jahowa. Diboto nasida do, ndang boi diallang nasida angka sipanganon ni raja. Alana di Patik ni Jahowa, adong piga-piga binatang na so boi diallang. Alani i, didok nasida ma tu si Aspenas, ‘Unang ma angka sipanganon ni raja lehon tu hami.’ Didok si Aspenas ma, ‘Molo ndang diallang hamu i, marsahit ma hamu annon, jala bunuon ni raja ma ahu!’

Alai didok si Daniel ma tu pengawas i, ‘Holan sayur dohot aek ma lehon tu hami saleleng sampulu ari. Boi ma annon idaonmu, bedana hami sian angka baoa na mangallang sipanganon ni raja.’ Ujungna dioloi ma.

Dungkon sampulu ari, umsehat do nasida sian angka baoa na asing. Las do roha ni Jahowa ala tongtong nasida mangoloi ibana. Dilehon Jahowa do parbinotoan tu si Daniel asa mamboto lapatan ni penglihatan dohot lapatan ni nipi.

Dung sae dilatik sude baoa i, diboan si Aspenas ma nasida tu si Nebukadnesar. Mangkatai ma raja tu nasida, jala diida raja i ummalo jala umbisuk do si Daniel, si Hanania, si Misael, dohot si Azaria sian angka baoa na asing. Dipillit ma nasida na opat gabe pejabat ni raja. Jotjot do raja manungkun tu nasida molo adong masalah. Dibahen Jahowa do nasida ummalo sian na asing dohot sian angka peramal.

Nang pe si Daniel, si Misael, si Hanania dohot si Azaria tading di inganan na asing, alai ndang lupa nasida tu Jahowa. Tongtong do diingot ho Jahowa nang pe ndang rap ho dohot natua-tuam?