Nunga balga si Johannes anak ni si Sakaria dohot si Elisabet. Gabe panurirang ma ibana. Disuru Jahowa do ibana paboahon na laho ro Messias. Alai ndang di sinagoga manang di angka kota ibana paboahon i. Di harangan manang di padang belantara do. Marroan ma halak sian Jerusalem dohot luat Judea manangihon ibana. Didok ibana, asa las roha ni Debata, unang be diulahon na jahat. Gabe muba ma angka halak. Dung i, tardidi ma nasida dibahen si Johannes di Sunge Jordan.

Ndang mamora si Johannes. Sian bulu ni unta do pangkeanna jala belalang dohot madu na sian harangan do sipanganonna. Sungkun-sungkun do roha ni angka halak, ise do sasintongna si Johannes. Haru halak Parise dohot halak Saduse pe ro mangida ibana. Didok si Johannes ma tu nasida, ‘Muba ma hamu. Unang ma dirimpu hamu dumenggan hamu sian na asing ala anak ni si Abraham hamu. Nang pe anak ni si Abraham hamu, ndang na gabe anak ni Debata hamu.’

Disungkun angka halak ma tu si Johannes, ‘Aha do na ingkon diulahon hami asa las roha ni Debata?’ Didok si Johannes ma, ‘Molo adong dua bajum, lehon ma sada tu halak na so adong bajuna.’ Diboto ho do boasa didok si Johannes songon i? Asa las roha ni Debata, ingkon dihaholongi nasida do sude jolma.

Didok si Johannes ma tu sijalo pajak, ‘Jujur ma hamu jala unang oto-otoi halak.’ Didok ibana ma muse tu angka tentara, ‘Unang kompasi halak jala unang ma margabus.’

 Ro ma muse angka malim dohot halak Lepi mandok tu si Johannes, ‘Sude halak manungkun ise do ho sasintongna.’ Didok si Johannes ma, ‘Ahu do halak na manggorai di padang belantara, na manogu-nogu angka halak mulak tu Jahowa songon na didok panurirang Jesaya.’

Lomo do roha ni angka halak mambege na diajarhon si Johannes. Gabe dirimpu nasida ma ibana Messias. Alai didok si Johannes ma, ‘Na laho ro ma na umhebat sian ahu. Haru mambungka solopna pe, ndang patut ahu. Aek do hubahen mandidi angka halak, alai tondi parbadia do dibahen ibana mandidi.’