Nunga sada satonga taon Jesus paboahon Harajaon ni Debata tu angka halak. Saonari naeng dipillit ma na laho mandongani ibana marbarita dohot na laho diajari mangurupi angka dongan na di huria. Dipangido Jesus do asa diurupi Jahowa ibana. Alani i lao ma Jesus martangiang tu dolok saborngin i. Marsogotna i, dijou Jesus ma angka na mangihuthon ibana jala dipillit ma 12 halak na gabe muridna. Diingot ho do goar ni nasida? Goar nasida i ma si Petrus, si Andreas, si Jakobus, si Johannes, si Pilippus, si Bartolomeus, si Tomas, si Mateus, si Jakobus anak ni si Alpeus, si Tadeus, si Simon dohot si Judas Iskariot.

Sai rap do Jesus dohot muridna na 12 i. Dung diajari Jesus nasida, disuru ma marbarita. Dilehon Jahowa ma huaso tu nasida laho mangusir suru-suruan na jahat manang malaikat na jahat dohot pamalumhon na marsahit.

 Didok halak Parise do angka murid i halak na so singkola jala ndang terkenal. Alai dibahen Jesus do angka muridna i gabe donganna, diajar-ajari do nasida jala porsea do Jesus tu nasida. Nasida ma na mandongani Jesus andorang so mate. Jala didongani nasida do Jesus dung dipahehe. Godangan sian nasida sahuta do dohot Jesus di Galilea. Piga-piga sian nasida nunga kawin.

Jolma na mardosa do angka murid i. Sipata olo do nasida sala mangkatai manang mangulahon na sala. Olo do nasida ndang sabar tu na asing. Jala hea do nasida marsoal ala naeng gabe na umjago. Alai burju do nasida jala dihaholongi nasida do Jahowa. Dung mate Jesus, nasida ma na parjolo gabe anggota ni huria Kristen jala na mangulahon ulaon na ringkot disi.