Dung pajumpang Jesus dohot angka muridna, laho ma si Petrus tu Laut Galilea manjala dengke. Rap do ibana dohot si Tomas, si Jakobus, si Johannes dohot angka murid na asing. Nunga saborngin nasida manangkup dengke, alai ndang adong dope dapotna.

Marsogotna i, diida nasida ma adong baoa jongjong di topi ni laut i. Disungkun baoa i ma, ‘Adong do dengke dapotmuna?’ Dialusi nasida ma, “Ndang adong!” Didok baoa i ma, ‘Sampathon hamu ma jala i tu sabola kanan ni parau.’ Dung dibahen nasida songon i, godang ma dengke dapot ni nasida sampe gok jala i. Gabe ndang boi be ditarik nasida jala i tu parau. Diboto si Johannes ma na Jesus do i. Didok ibana ma, ‘Tuan do i!’ Mangalompat ma si Petrus tu laut jala marlange ma ibana sahat tu topi ni laut. Alai marparau do murid na asing sahat tu topi ni laut.

Dung sahat di topi ni laut, diida nasida ma adong roti dohot dengke  naung masak. Dijalo Jesus ma dengke ni nasida i asa dipanggang. Dung i didok ibana ma, ‘Sarapan ma hamu.’

Disungkun Jesus ma tu si Petrus, ‘Umholong do roham tu ahu sian na manangkup dengke?’ Dialusi si Petrus ma, ‘I do Tuan, holong do rohangku tu ho.’ Didok Jesus ma, ‘Jaga ma anak ni biru-birungki.’ Disungkun ma muse, ‘Holong do roham tu ahu Petrus?’ Didok si Petrus ma, ‘I do Tuan.’ Didok Jesus ma muse, “Parmahani ma anak ni biru-birungki.” Disungkun Jesus do songon i sampe tolu hali. Gabe lungun ma roha ni si Petrus. Didok si Petrus ma, ‘Sude do diboto ho Tuan. Diboto ho do holong rohangku tu ho.’ Didok Jesus ma muse, “Lehon ma mangan anak ni biru-birungki.” Didok Jesus ma muse, “Tongtong ma ihuthon ahu.”