Laho ma mata-mata ni bangso Israel tu kota Jeriko. Di jabu ni si Rahab do nasida marborngin. Diboto raja ni Jeriko ma on jala disuru ma tentarana tu jabu ni si Rahab. Nunga ditabunihon si Rahab dua mata-mata i di atap ni jabuna. Disuru ibana ma tentara i laho tu inganan na asing. Didok ma tu mata-mata i, ‘Huboto do na didongani Jahowa hamu. Alani i do huurupi hamu. Laho lehononna ma tano on tu hamu. Marjanji ma hamu, paluaonmuna do keluargangku.’

Didok mata-mata i ma tu si Rahab, ‘Marjanji do hami, malua do halak na di jabu on.’ Didok nasida ma muse, ‘Asa malua keluargam, ingkat ma tali na merah on di jandela ni jabumon.’

Disuru si Rahab ma mata-mata i turun sian jandela mamangke tali i. Laho ma nasida martabuni tu dolok-dolok. Disi ma nasida saleleng tolu ari. Dung i mulak ma muse nasida tu si Josua. Dilewati nasida ma Sunge Jordan jala siap-siap ma nasida mambuat tano i. Kota Jeriko ma na parjolo ditaluhon nasida. Didok Jahowa ma  tu nasida asa marbaris mangkalilingi kota i. Dikalilingi nasida ma i sahali sadari saleleng onom ari. Di ari papituhon, pitu hali ma nasida mangkalilingi kota i. Dung i, martarompet ma angka malim. Gogo ma marsuraki angka tentara i. Gabe hancur ma tembok ni kota i! Alai, ndang hancur jabu ni si Rahab. Malua do si Rahab dohot keluargana ala porsea tu Jahowa.