Nunga dirajai Halak Assur harajaon ni Israel na sampulu marga. Jala saonari lomo roha ni si Sanherib raja ni Assur, asa rajaanna muse dua marga nai, i ma harajaon Juda. Mulai ma dirajai ibana sada-sada sian kota ni Juda. Alai kota Jerusalem ma na umlomo rohana asa rajaanna. Ndang diboto si Sanherib na sai dijaga Jahowa do kota Jerusalem.

Si Hiskia do raja ni Juda tingki i. Dilehon ibana do godang hepeng tu si Sanherib asa unang dibuat Jerusalem. Nang pe nunga dijalo si Sanherib hepeng i, alai disuru do angka tentarana na jago laho mambuat Jerusalem i. Mabiar ma angka halak na tinggal disi, ala nunga mansai jonok tentara ni Assur tu kota i. Didok si Hiskia ma tu nasida, ‘Unang mabiar hamu. Gogo do nian tentara ni Assur i, alai umgogo do hita sian nasida bahenon ni Jahowa.’

Disuru si Sanherib ma si Rabsake asa laho ibana manginsaki halak Jerusalem. Didokkon si Rabsake ma tu halak Jerusalem, ‘Ndang urupan ni Jahowa hamu. Unang olo hamu dioto-otoi si Hiskia. Ndang adong debata na boi paluahon hamu sian hami.’

Disungkun si Hiskia ma tu Jahowa aha do na ingkon diulahon ibana. Didok Jahowa ma, ‘Unang mabiar hamu tu hata ni si Rabsake i. Ndang boi buaton ni si Sanherib Jerusalem.’ Dibahen si Sanherib ma surat tu si Hiskia. Didok di surat i, ‘Menyerah ma hamu. Ndang diurupi Jahowa be hamu.’ Martangiang ma si Hiskia, didok ma, ‘Jahowa, urupi ma hami asa sude mamboto holan Ho do Debata na sintong.’ Didok Jahowa ma tu ibana, ‘Ndang boi masuk halak Assur tu Jerusalem. Sai jagaonku do kota on.’

Dirimpu si Sanherib, satongkin nai taluhononna ma Jerusalem. Alai bornginna i, disuru Jahowa ma sada suru-suruanna manang malaikatna mambunu  185.000 tentara ni Assur na di luar ni tembok Jerusalem. Mate ma angka tentara ni si Sanherib na jago i. Ujungna mulak ma ibana. Songon naung didok Jahowa, sai dijaga Ibana do si Hiskia dohot kota Jerusalem. Molo di Jerusalem ho tingki i, porsea do ho tu Jahowa?