Rimangi ma situasi on: Tingki markaca si Julia, didok ma nunga pamokmokhu ibana. Di bagasan rohana, ”Ingkon huorui do mokmokhu.” Hape, natuatuana dohot angka donganna mandok ”marniang” do ibana.

Di pudian ni ari, diet ekstrem ma ibana asa moru mokmokna hirahira ”dua kilogram” nai. Gabe ndang mangan ibana saleleng pigapiga ari . . .

Molo hamu gabe si Julia, aha do na ingkon ulahononmuna?

Ndang sala mamparrohahon penampilan. Alana, di Bibel dipaboa do taringot penampilan ni halak na uli, umpamana si Sarah, si Rahel, si Josep, si Daud, dohot si Abigail. Di Bibel pe dipaboa, adong borua ”na uli situtu” na margoar si Abisag.​—1 Rajaraja 1:4.

Godang do na poso holsoan tu penampilanna. On boi gabe masalah. Parrohahon ma:

• Sada penelitian paboahon, adong 58 persen anak boru na mandok pamokmokhu. Hape, holan 17 persen do na songon i.

• Penelitian na asing paboahon, adong 45 persen borua na marniang, mandok pamokmokhu!

• Laho mangorui borat badan, pigapiga na poso gabe anoreksia. Anoreksia, i ma sahit na mambahen sasahalak ndang olo mangan.

 Molo anoreksia hamu, pangido ma pangurupion. Paboa ma tu natuatuamuna manang halak na dihaporseai hamu. Bibel paboahon, ”Sai masihaholongan do na mardongan jala songon na marhahamaranggi do di sitaonon.”​—Poda 17:17, Bibel siganup ari.

Sasintongna, roha ni sasahalak do na mambahen halak na asing marlomo ni roha tu ibana. Parrohahon ma si Absalom, anak ni Raja Daud. Dipaboa do di Bibel:

”Ndang adong di sandok Israel nanggo sahalak songon uli ni si Absalom. . . . Ndang adong tihasna.”​—2 Samuel 14:25.

Alai, si Absalom on halak siginjang roha, pasangaphu tu dirina, jala jahat! Ndang adong parange na denggan na dipaboa Bibel taringot ibana. Dipatorang do di Bibel molo ibana halak na so umboto ila, ndang unduk, jala gok hosom ni roha.

Alani i, dilehon Bibel ma poda na denggan tu hita:

”Nunga gabe jolma na imbaru hamu.”​—Kolosse 3:10, Bibel siganup ari.

”Ndang pola pabagakbagakonmuna rupamuna . . . , alai rohamuna na ias i do haulionmuna.”​—1 Petrus 3:3, 4, Bibel siganup ari.

Tutu do, ndang sala mamparrohahon penampilan. Alai, na rumingkot sian penampilan, i ma roha dohot parange ni sasahalak. Tu joloan ni ari, angka parange na denggan di partondion do na mambahen halak marlomo ni roha tu hamu, ndang alani bagak ni rupamuna! Sahalak borua na margoar si Phylicia mandok, ”Tutu do, uli ni rupanta mambahen hita diparrohahon halak. Alai, parange dohot rohanta na denggan do na jotjotan diingot halak.”

Hea do hamu marsak alani penampilanmuna?

Hea do tubu di rohamu laho mangulahon operasi plastik manang diet ekstrem asa bagak penampilanmuna?

Molo boi, aha do na laho diuba hamu taringot penampilanmuna? (Pillit ma.)

• TIMBOMUNA

• BORATMUNA

• OBUKMUNA

• PAMATANGMUNA

• BOHIMUNA

• KULITMUNA

Molo alusmuna ”hea” di dua sungkunsungkun na parjolo, jala lobi sian tolu na dipillit hamu di sungkunsungkun na patoluhon, pingkiri ma on: Ndang sai negatif pandapot ni halak tu hamu songon pamingkirionmu tu dirimu. Mura do hita holsoan alani penampilanta.​—1 Samuel 16:7.